دووەمین دانیشتنى ئۆپۆزسیۆنى سوریا بۆ گفتوگۆکردن لەبارەى داهاتووی سوریاوە لە شاری عەین عیسا لە رۆژئاواى کوردستان و باکووری سوریا دەستیپێکرد. ئۆپۆزسیۆن بە پێشەنگایەتیى ئەنجوومەنى سوریای دیموکراتیک (مەسەدە) کۆبوونەتەوە.

لە هەموو ناوچەکانى سوریاوە ١٠٠ کەس بە نوێنەرایەتیى حیزب و لایەنە سیاسی و پێکهاتەکانەوە بەشداری کۆبوونەوەکە بوون. کۆبوونەوەکە دوای خۆناساندنی نوێنەرەکان و دەقەیەک بێدەنگی بۆ بەرزراگرتنى یادی شەهیدانى ئازادی دەستى بەکارەکانى کرد.

لە ناوچەکانى باکوور و رۆژهەڵاتی سوریا، لە تارسوس، شام (دیمەشق)، لازقییە، حومس، حەما، شەهبا و هەروەها لە بەلجیکا، ئەڵمانیا، سویسرا، تورکیا، لوبنان و میسرەوە ٩٠ نوێنەری گەلانى عەرەب، کورد، سوریانی، ئاسووری، ئەرمەنی و تورکمەنی ئۆپۆزسیۆنى سوریا بەشداری کۆبوونەوەکە بوون.

کۆبوونەوەکە بە ناونیشانی "سوریا لەگەڵ سوریاییەکان گفتوگۆ دەکات" بەڕێوەدەچێت. ریاز دەرار و ئەمینە عومەر هاوسەرۆکانى مەسەدە لەسەرەتاى کۆبوونەوەکەدا وتەیان پێشکەشکرد.

کۆبوونەوەکە بۆ ماوەی ٢ رۆژ بەردەوام دەبێت و بابەتەکانى "دۆخی مرۆیى لە سوریا، مۆدێلی بەڕێوەبردنى سوریا، دۆخی ئابووریى سوریا، دەستوورى بنەڕەتیى نوێى سوریا، دۆخی ژنان لە سوریا و هاوکاریى رێکخستنە ئۆپۆزسیۆنەکانى سوریا" گفتوگۆیان لەبارەوە دەکرێت.

کۆبوونەوەی یەکەمی ئۆپۆزسیۆنى سوریا بۆ گفتوگۆکردن لەبارەى داهاتووی سوریا لە رۆژی ١٩ی تەمووزی ٢٠١٨ بەڕێوەچوو.

نوێنەرانى رووسیا، ئێران و تورکیاش لە ئاستانە لە کۆبوونەوەدان

هاوکات دەوڵەتانی رووسیا، ئێران و تورکیا لە شاری ئاستانەی پایتەختی کازاخستان لەبارەی دۆخی سوریاوە لە کۆبوونەوەدان. بابەتى کۆبوونەوەى ئەو ٣ دەوڵەتە لە ئاستانە، بابەتى ئیدلبە.

بەپێى زانیارییەکان رووسیا لەو کۆبوونەوەیەدا بەڵێنى پیشووی دەوڵەتى تورک لەبارەی 'جیاکردنەوەى گروپە چەکدارەکان لە ئیدلب' دەکاتە رۆژەڤ و بابەتى دانوستانەکە.

ر.م