کریس مایەر بەڕێوەبەری ناوەندی شەڕی دژی داعش لە وەزارەتی بەرگری ئەمریکادا ئاماژەی بەوەدا، وڵاتەکەی لە چوارچێوەی شەڕی دژی چەتەکاندا هاوکاریەکانی بۆ هێزەکانی سوریای دیموکراتیک (قەسەدە) بەردەوامە و چەکیان بۆ دەنێرێت.

مایەر لە کۆنفرانسێکی ڕۆژنامەنووسیدا باسی لە هەڕەشەکانی دەوڵەتی تورک لەسەر ڕۆژئاوا کرد و وتی، "ئەوان لەگەڵ تورکیا دەستیان بە دەوریەی هاوبەش کردووە و ئامانجیشیان ڕێگریکردنە لە هەر هێرشێکی کتوپڕ. هەروەها، ئەگەری هێرشی دەوڵەتی تورک بۆ سەر سوریا کەم بووەتەوە.

کریس مایەر ڕاشیگەیاند، لە چوارچێوەی شەڕی دژی داعشدا، هاوکاری چەک بۆ قەسەدە بەردەوامە و زانیاری لەبارەی ئەم بابەتە، بە تورکیاش ڕادەگەیەنرێت و وتیشی، "کشانەوەی هێزەکانی یەکینەکانی پاراستنی گەل (یەپەگە) لە سنورەکان بۆشایی ئەمنی دروست دەکات و بۆ کەمکردنی ریسکێکی بەم جورە پێویستە لەگەڵ تورکیا دانوستان بکرێت."

مایەر لە کۆتایی قسەکانیدا ئەوەشی ڕاگەیاند، میکانیزمی ئەمنی لەگەڵ تورکیا لەسەر سنورەکان دروستکراوە و لەهەمان کاتدا میکانیزمەکە بۆ پاراستنی قەسەدەیە و وتی، "نامانەوێت لە شەڕی دژی داعشدا، ریسکی نوێ تاقیبکەینەوە."

ف.ق