دواهه‌مین قۆناغی هه‌ڵمه‌تی گه‌رده‌لوولی جزیر له‌ چێوه‌ی «شه‌ڕی نه‌هێشتنی تێرۆر»دا به‌رده‌وامه‌. په‌یامنێری ئاژانسی هه‌واڵی هاوار (ANHA) ڕایگه‌یاند، باكووری گوندی باغۆزی سه‌روو له‌ لایه‌ن شه‌ڕڤانانی هێزه‌كانی سووریای دیموكراتی (قه‌سه‌ده‌) ڕزگار كراوه‌ و له‌ كاتی پاك كردنه‌وه‌ی ناوچه‌كه‌ له‌ پاشماوه‌ی چه‌ته‌كاندا، كۆگه‌یه‌كی گه‌وره‌ی چه‌ك و ته‌قه‌مه‌نی له‌ لایه‌ن هێزه‌كانی قه‌سه‌ده‌ دۆزراوه‌ته‌وه‌.

گوندی باغۆز ده‌كه‌وێته‌ ڕۆژهه‌ڵاتی شارۆچكه‌ی هه‌جین له‌ سنووری ڕۆژهه‌ڵاتی دێره‌زۆر. چه‌ته‌كانی داعش كه‌ له‌و ناوچه‌یه‌ ته‌نگه‌تاو بوون و گیریان خواردووه‌، هاوڵاتییانی سیڤیل وه‌ك قه‌ڵغان بۆ پاراستنی خۆیان به‌كاردێنن و ده‌وروبه‌ری خۆیان مینڕێژ ده‌كه‌ن. شه‌ڕڤانانی قه‌سه‌ده‌ش ڕۆژ به‌ ڕۆژ زیاتر پێشڕه‌وی ده‌كه‌ن و ڕووبه‌رێكی كه‌می ناوچه‌كه‌ له‌ژێر كۆنتڕۆڵی چه‌ته‌كانی داعشدا ماوه‌.

s.m