بە پێی ئەو زانیاریانەی گەیشتوونەتە بەر دەستمان، گروپی چەتەکانی لیوای سەمەرقەند کە سەر بە دەوڵەتی داگیرکەر تورکە، کۆتایی هەفتەی رابردوو، لە گوندی مەزنی سەر بە ناوچەی شێراوا ٧ کەسی رفاندووە  کە دوانیان منداڵن.

ناوی ئەو کەسانەی رفێنراون بەم شێوەیەیە: ئەحمەد عەزیز و کورەکەی خالید عەزیز، عەبدولکەریم حەمادە و کوڕەکەی رێزان حەمادە، نزار شکری چیلۆ. بەڵام ناوی دوو لە منداڵە رفێنراوەکان نەزانرا.

دەوڵەتی داگیرکەری تورک لەگەڵ گروپە چەتەکانی، بە بەراورد لەگەڵ ماوەی رابردوو، زیاتر خەڵکی مەدەنی دەرفێنن و ئامانجیش وەرگرتنی فیدیەیە.

رێکخراوی مافی مرۆڤی سوریا-عەفرین رایگەیاند، ٣٠ حوزەیران لە گوندی دارگری سەر بە ناوچەی مەعبەدای عەفرینیش هەر یەک لە جەمال عومەر ئەلیکۆی ٢٨ ساڵان، سەبری ئەحمەد محمدی ٤٠ ساڵان، محێدین عەلیکۆی ٥٥ ساڵان و فیدانی دایکی، عەبدۆ محمد عەبدولای ٣٥ ساڵان و فاتیمەی دایکی، عەماد قادر حسێنی ٣٥ ساڵان و ئەمینەی دایکی رفێنران.

عەفرین و دەوروبەری لە مانگی ئازاری ٢٠١٨وە لە لایەن دەوڵەتی تورکەوە داگیرکراوە. لە ناوچەکە بە شێوەیەکی سیستماتیک تاوانی دژی مرۆڤایەتی ئەنجام دەدرێت و دەست بەسەر ماڵ و موڵکی هاوڵاتیە مەدەنیاندا دەگیرێت و بە تاڵان دەبرێت. لە ناوچە داگیرکراوەکان، "رژێمی تیرۆر" بونیاد نراوە.

لە گوندی رەجۆی سەر بە ناوچەی مەعبەداش، ٩ی حوزەیران ٨ کەسی دیکەی مەدەنی لە لایەن هێزەکانی دەوڵەتی داگیرکەری تورکەوە رفێنربوون و داوای فیدیە لە کەسەکاریان کرابوو.

بە پێی چەند زانیاریەکیش کە لە کۆتایی مانگی ئایاردا راگەیێنران، لە ساڵی ٢٠١٨دا ١١ ژن، بۆ ماوەی ٢ ساڵ بە شێوەیەکی دڕندانە ئەشکەنجە دراون. ئەو ١١ ژنە کە بە مەبەستی وەرگرتنی فیدیە لە خانەوادەکانیان رفێنرابوون، لە ماوەی ئەو دوو ساڵەدا لە کەسوکارەکانیان شاردرابوونەوە.

ز.ش