ئەمەل دەدە ژنێکى تورکمانى خەڵکى منبجە و لەسەر  بارودۆخى منبج بۆ ئاژانسى هەواڵى فورات (ANF) دوا. دەدە باسى ئەوە شەڕە قورسەى کرد لە منبج روویداوە و رایگەیاند، دواى رزگارکردنى منبج بە ماوەیەکى کەم شارەکە لە مین و بۆمبى چێندراو پاککرایەوە. پرد دروستکرا، خوێندنگەکان نۆژەنکرانەوە و لە رێگەى کۆمیتەکانى دەستەى بەڕێوەبەریى مەدەنیى منبجەوە چەندین خزمەتگوزاری پێشکەشکران.

ئەمەل دەدە راشیگەیاند، ٤ بۆ ٥ مانگ لە دواى رزگارکردنى شارەکە، ئەوان وەک ئەنجوومەنى مەدەنی سەرلەنوێ خۆیان بە رێکخستن کرد و لەو بارەیەوە وتى "ئێمە ئەنجوومەنى یاسادانان و بەڕێوەبردنمان دامەزراند. ئێمە بەڕێوەبەریى مەدەنى دیموکراتیکى منبجمان راگەیاند. دواتر کۆمیتەکانمان دروستکرد. ژمارەى گوندەکانى منبج زۆر زۆرە. لە ناوەندى شار و لە گوندەکاندا دەستە دروستکران. لە ناو دەستەکاندا و بەپێى پێویستیى شوێنەکان کۆمیتە دامەزرێندرا".

ژنان لە هەموو ئاست و جومگەکاندا جێگە و پێگەیان هەیە

دەدە باسى ئەوەیکرد، بەڕاستى گەلی منبج پێویستى بە خۆبەڕێوەبەری هەبوو و وتیشی "هەر چۆن ئێمە بۆ رزگارکردنى منبج خوێنى خۆمان رژاند، بۆ بونیاتنانی ژیان و سیستمە خۆبەڕیوەبەرییەکەمان بە پێداگری و فیداکارییەکى گەورەوە کارمان کرد. بارودۆخى ئارام خوڵقێندرا. ژنان بوونە خاوەنی ماف و پێگەى خۆیان لە ناو بەڕێوەبەری و هەموو ئاست و جومگەکانى ژیاندا. ژنان بە سایەى فەلسەفە و بۆچوونى رێبەرەکەمان  جێگە و پێگەى خۆیان لە ناو ئەو سیستمەدا چەسپاند. ئێمە وەک ژنانى منبج باش دەزانین، کە باوکان و براکانمان و هیچ کەسێکى تر مافەکانی خۆمانیان پێنەداوین، بەڵام ژن ئێستا لە ناو بەڕێوەبەرى، سەربازی، سیاسەت و ئاسایش و ئابووری و هاتوچۆدا جێگە و پێگەى خۆی هەیە و کار دەکات".

ئەمەل دەدە ئەندامى دەستەى ئەنجوومەنى یاسادانان باسى ئەوەشیکرد، ئەوان پێکەوە و بە رەنج و ئیرادەى خۆیان منبجیان سەرلەنوێ ژیاندووەتەوە و لە بەردەوامیى قسەکانیدا وتى "ئێمە وەک بەڕێوەبەریى مەدەنیى منبج لە ماوەى ٢ ساڵدا ئەو کارانە، کە دەوڵەتە گەورەکان نەیانکردووە و پێیان نەکراوە، ئەنجاممان داون. لە منبج ئارامی، خۆشویستن، سیاسەت، خزمەت و بە کورتی سەرلەنوێ ژیان بە شێوەیەکى دیموکرایتک و ئازاد ئافرێنرا".

"هیچ کات لە منبج بەڕێوەبەرییەکى دیموکراتیکى لەمجۆرە بوونى نەبووە"

دەدە لەبارەى سیستمى هاوسەرۆکایەتییەوە ئەوەى خستەڕوو "ئێمە بەهۆی ئەم سیستمەوە بووینە خاوەنى بەڕێوەبەرییەکى دیموکراتیک. رێژەى بەشداریى ژنان لە بەڕێوەبەراتییەکەدا ٥٠%. بەڕێوبەرایەتییەکەمان لە ١٣٢ کەس پێکدێت. هەموو گەلانى منبج بە پێى ژمارەى دانیشتوانیان بەشدارن لەبەڕێوەبەرییەکەیدا. ٧١ کەسیان لە هاووڵاتییانى گەلی عەرەب، ٤١ کەسیان لە هاووڵاتییانى گەلی کورد، ١٠ کەسیان لە هاووڵاتییانى گەلی تورکمان، ٨ کەسیان لە هاووڵاتییانى گەلی چەرکەس و ١ کەسیش هاووڵاتییەکى گەلی ئەرمەنە. سەیر بکەن لە منبج تەنها یەک بنەماڵەى ئەرمەنى دەژین، بەڵام ئەو بنەماڵەیە لە ناوبەڕێوەبەرێتییەکەدا نوێنەریان هەیە. هیچ کات لە منبج بەڕێوەبەرییەکى دیموکراتیکى لەمجۆرە بوونى نەبووە و دانەمەزراوە".

"ئێمە منبجمان رزگارکرد و سەرلەنوێ ژیانمان تیادا ئافراند"

ئەمەل دەدە لەبارەى هەڕەشەکانى تورکیا لە دژى منبج و ئەو رێککەوتنەى لە نێوان تورکیا و ئەمریکادا واژۆکراوە وتى، لە دواى ئەوەى ئەوان منبجیان سەرلەنوێ ژیاندەوە هێزەکانى هاوپەیمانیى نێودەوڵەتیش هاوکارییان کردن و لە بەردەوامیى قسەکانیدا وتیشی "ئێمە نکۆڵی لە هاوکارییەکانیان ناکەین، بەڵام ئێمە وەک گەلی منبج ئەو رێککەوتنە قبوڵ ناکەین. منبج بە خوێنى ژنان و پیاوانى منبج رزگارکرا. ئەو دامودەزگا و رێکخراوانەى ئەمڕۆ لە منبجدان لەلایەن گەلی منبجەوە بەڕێوەدەبرێن. ئەگەر رێککەوتنێک لەسەر ئێمە بکرێت، ئەوا پێویستە بەلانیکەمەوە ئێمە لایەنێکى ئەو رێککەوتنە بین. ئێمە منبجمان رزگارکرد و سەرلەنوێ ژیانمان تیادا ئافراند".

"سوپاى ئازادى سوریا و دەوڵەتى تورک هیچ جیاوازییەکیان لەگەڵ داعش دا نییە"

دەدە رایگەیاند، ئەوان ئەو راستییەیان بە بەرپرسانى هاوپەیمانیى نێودەوڵەتى وتوە و راشیگەیاند "ئێمە پێمان وتن 'ئەگەر ئەو چاوپێکەوتن و رێککەوتنە بکرێت، دەبێت ئێمە لایەنێکى ئەو رێککەوتنە بین و قسە و بۆچوونى ئێمەى تیایدا بێت' ئەوانیش دەزانن کە منبج ئارامە. ئێمە چەندین جار پێمان وتون، گەلی منبج دەوڵەتى تورک و چەتەکانى ئەو دەوڵەتەى ناوێت. ئێمە بە نمونە ئەوەمان بۆ روون کردوونەتەوە و پێمان وتون 'باشە دەوڵەتى تورک توانیویەتى ئارامیى جەرابلوس، باب و عەزاز دابین بکات تاوەکو بێت ئارامی بۆ منبج دابین بکات؟ لەو شوێنانە کردەوەى دژە دیموکراتیکییانە، دزی، تاڵانى و کۆمەڵکوژی روو دەدەن. ئێمە لەوانمان پرسی، کە لە نێوان ئەوان و دەوڵەتى تورک دا لەسەر منبج رێککەوتنێکى نووسراو هەیە یان نا. ئەوانیش وتیان شتێکى وا نییە. وتیان، سوپاى تورک و سوپاى ئازادى سوریا نایەنە منبج. سەربازانى تورک تەنها لەو دیوى رووبارى ساجور پاسەوانی دەدەن. بەڵام ئەوەى ئێمەى نیگەران کردووە ئەوەیە، کاتێک بەرپرسانى هاوپەیمانیى نێودەوڵەتى وتیان 'ئێمە رێگا نادەین جارێکیتر تیرۆریستەکان بگەڕێنەوە بۆ ئێرە' ئەو قسەیان ئەوان تەنها بۆ سەرنجدانە بە نەگەڕانەوەى داعش، بەڵام ئەوە لە کاتێکدایە ئێمە دەزانین ئەوەى داعشى دروستکردووە تورکیایە. کاتێک داعش لێرە بوو تورکیا پێى نیگەران نەبوو و سنوورى خۆى بە ئارام دەزانی. دواى ئەوەى منبج رزگارکرا دەوڵەتى تورک دەستیکرد بە قسەکردن لەبارەى ئارامی و ئاسایشەوە. ئێمە وەک گەلی منبج سوپاى ئازادى سوریا، هێزەکانى قەڵغانى فورات بە باشى دەناسین. دەوڵەتى تورک، سوپاى ئازادى سوریا و گروپە چەتەکانى تر، هیچ جیاوازییەکیان لەگەڵ داعشدا نییە".

"ئێمە بڕوامان بە ئیرادەى خۆمان هەیە"

ئەمەل دەدە لەبارەى داهاتووە وتى "ئێمە دەستبەردارى منبج و بەهێزکردنى دیموکراسی لە منبج نابین. ئێمە بڕوامان بە ئیرادەى خۆمان هەیە و پشتمان بە ئیرادەى خۆمان بەستووە. ئێمە بە هێزەکانى خۆمان دەستمان پێکرد. لە راستیدا ئەوە تەنها سەرەتاییەکە. ئێمە تازە بە تازە هەستمان بەهێز و ئیرادەى خۆمان کردووە. ئێمە بەو هێزە بەردەوام دەبین و سەریشدەکەوین. بێگومان پرۆژەشمان بۆ داهاتوو هەیە. ئێمە سیستمەکەى خۆمان دامەزراندووە و کاریش بۆ بەرەوە پێشبردنى دەکەین".

ر.م