نەخشەڕێگای ڕووسیا بۆ دانووستانی نێوان خۆبەڕێوەبەری و ڕژێمی سوریا

سەرچاوە میدیاییەکان باس لەوە دەکەن، ڕووسیا نەخشەڕێگایەک کە لە چەند بەندێک پێکهاتووە، خستوەتەڕوو بۆ ناوبژیوانی و دانووستانی نێوان ڕژێمی سوریا و نوێنەرانی باکور و ڕۆژهەڵاتی سوریا.

بەپێی هەواڵێکی ڕۆژنامەی (شەرقولئەوسەت)، شاندێکی ڕووسی بە سەرۆکایەتی سەرکردەیەکی سەربازی، کۆتایی مانگی ڕابردوود کۆبوونەوەیەکی خێرای لەگەڵ نوێنەرانی باکور و ڕۆژهەڵاتی سوریا ئەنجامداوە.

سەرچاوەی ئەو ڕۆژنامەیە ئەوەشی ئاشکرا راگەیاندووە کە شاندەکە 'نەخشەڕێگا'یەکی پێ بووە کە لە چەند خاڵێک پێکهاتووە بۆ ناوبژیوانی و دانووستانی نێوان ئیدارەی خۆبەڕێوەبەریی باکور و رۆژهەڵاتی سوریا و ڕژێم، کە لەم خاڵانە پێکهاتووە:

*              بەشداریکردنی نوێنەرانی باکور و ڕۆژهەڵاتی سوریا لە لێژنە دەستورییەکاندا.

*              نوێنەرایەتیکردنی بزووتنەوەی سیاسی کورد لە حکومەتی سوریا.

*              جێگیرکردنی پاسەوانی سنووری سوری بە درێژایی سنوور لە سمێلکاوە هەتا منبج.

*              دەستپێکردنی وتوێژ لەنێوان حکومەتی سوریا و خۆبەرێوەبەری باکور و ڕۆژهەڵاتی سوریا.

*              پێکهێنانی لێژنەی هاوبەشی ئابووری و سەربازی.

*              دەرکردنی بەڵگەی فەرمی بۆ کورد.

*              دەرکردنی بەڵگەی پەروەردەیی فەرمی بۆ خوێندکارانی خوێندنگە کوردییەکان.

*              هەماهەنگیکردن بۆ بەکارهێنانی داهاتی وزە، بە دیاریکراویش بەنداوی فورات.

*              دەرچوونی سوپای سوریا لە خوێندنگە و کۆمەڵگە پەروەردەییەکانی ناوچەکانی ژێر دەسەڵاتی خۆبەڕێوەبەریی.

*              کردنەوەی ڕێگەی وشکانی کە شاری حەلەب بە عێراق دەبەستێتەوە و لە شارۆچکەی ئەلبوکەمال تێدەپەڕێت.

ئەو ڕۆژنامەیە هەروەها ئەوەشی ڕاگەیاندووە: شاندەکەی ڕووسیا سەرەتا چوونەتە دیمەشقی پایتەختی سوریا، ڕۆژانی ٢٥ و ٢٦ی کانونی یەکەمی ساڵی ڕابردوو ژمارەیەک کۆبوونەوەی چڕیان ئەنجامداوە، دواتر لە ڕۆژی ٢٦ی مانگ سەردانی قامیشلۆیان کردووە، لەگەڵ ژمارەیەک بەرپرس و کەسایەتی خۆبەڕێوەبەری باکور و ڕۆژهەڵاتی سوریا کۆ بوەتەوە.

تەوەری وتوێژەکان لەبارەی سێ خاڵی سەرەکییەوە بووە:

یەکەمیان: قسەکردن لەبارەی چارەنووسی حەوت خۆبەڕێوەبەری خۆجێی، وەکو پەیکەری دەسەڵات و بەڕێوەبردنی شارەکە، کە ڕووبەڕێکی نزیکەی ٢٠% ی وڵات بەڕێوە دەبات.

دووهەم: ڕێزگرتن لە تایبەتمەندی "هێزەکانی سوریای دیموکرات" و پۆلیسی ناوخۆ "ئاسایش" و ڕۆلی داهاتوویان و ناوچەی ژێر کۆنترۆلیان و بەشداریکردنیان لە شەڕەکانی دەرەوەی سنوورەکەیان.

سێیەم و گرنگترینیان: سوریای ساڵی ٢٠١١ وەکو سوریای ئێستای ساڵی ٢٠٢٠ نییە، لە کاتی درێژەدانی ڕژێم بەو ڕێبازە ئاسایشییە، ڕێبازی یەکلاکردنەوە سەربازی، ناوچەکە بەگشتی بەرەو شەڕێکی بێکۆتایی دەڕوات، کارەساتێکی هەمەلایەنە دەبێت.

بەپێی هەمان ڕۆژنامە پێویست بوو کۆبوونەوەیەکی بەرفراوان بکرێت کە نوێنەرانی حکومەتی ناوەندی و نوێنەرانی (خۆبەرێوەبەری باکور و ڕۆژهەڵاتی سوریا) و لایەنە سیاسییە کوردی، عەرەبی، ئاشوری و مەسیحی ییەکان تێیدا بەشدار بن، هەروەها بانگهێشتی ڕێبەران و سەرکردە خۆجێیەکان بکرێت بۆ خستنەڕووی "نەخشەڕێگا" و ڕاگەیاندنی وتەی سەرەتایی ڕێکەوتنەکە.

چاوەروان دەکرێت، شاندی ڕووسی لە ڕۆژانی داهاتوودا پێشنیاری نوێی هەبێت.

ز.ش