هێزەکانی ڕزگاری عەفرین دەربارەی چالاکی هێزەکانی لەدژی داگیرکەران لەعەفرین ودەورووبەری ڕاگەیەنراوێکی بڵاوکردەوە.

هێزەکانی ڕزگاری عەفرین لە ڕاگەیەنراوەکەی خۆیدا ئەوەی خستەڕوو کە، شەڕڤانەکانی لە زنجیرە چالاکییەکدا  جموجووڵی سوپای داگیرکەری تورک و بارەگاکانی لەعەفرین و دەورووبەری کردووەتە ئامانج. لەوچالاکییانەدا ژمارەیەک لە داگیرکەران کوژراون.

لە ڕاگەیاندراوەکەدا هاتووە: ڕۆژی ٢٢ی ئەیلوول هێزەکانمان چالاکییان لەدژی بارەگای سوپای داگیرکەری تورک لە گوندی کیمارێ-ی سەربە ناوچەی شێراوا ئەنجامدا، لە ئەنجامدا ئەو حەشارگەیە ڕووخێندرا و ٢ سەربازی سوپای تورک کوژران.

هەروەها هاتووە: هەمان ڕۆژ هێزەکانمان لەسەر ڕێگای گوندی باسووتێ بۆ عەفرین زرێپۆشێکی سوپای تورکیان کردە ئامانج، لەو چالاکییەدا گورز لە زرێپۆشەکە وەشێندرا.

لە بەردەوامی هاتووە: هەر ڕۆژی ٢٢ی ئەیلوول شەڕڤانانمان لە بەردەم بارەگایەکی سوپای تورک لە دەوروبەری گوندی مەریەمین-ی سەربە ناوچەی شەرا چالاکییان ئەنجامدا، لە ئەنجامی ئەو چالاکییەدا ٢ سەربازی سوپای تورک کوژران و یەکێکی تریش برینداربوو.

لە کۆتاییش هاتووە: لە ڕۆژانی ٢٠ بۆ ٢٢ی  ئەیلوول سوپای تورک و چەتەکانی بە هاوەن و مووشەکی گراد، ناوچە مەدەنییەکانی گوندەکانی؛ مالکیە، شەوارخ و عەین دەقنە لە ناوچەی شەرا، گوندەکانی عاقیبە، بێنێ، سۆخانکێ لە ناوچەی شێراوا و گوندەکانی هەرێمی شەهبا لە تل ڕەفعەت و بیلۆنی-یان تۆپباران کردووە کە بووەتە هۆی زیانی مادی بۆماڵ و زەوی و زاری دانیشتووان.

ک-ش