لە دانیشتنی بڕیاری دۆزی کۆبانێ بە پاساوی چالاکییەکان دژی هێرشی داعش لە ٦-٨ ی ٢٠١٤، لەنێویاندا هاوسەرۆکانی گشتی پێشووی هەدەپە فیگەن یوکسەکداغ و سەڵاحەدین دەمیرتاش و ١٨ زیندانیکراو لە کۆی ١٠٨ سیاسەتمەدار دادگایی کران، سەدان ساڵ سزای زیندانیکردن بەسەر سیاسەتمەداران سەپێنرا. بەم بۆنەیەوە لە شارەکانی شەرناخ و ڕحا و ئامەد و سێرت و ئێلح و جولەمێرگ و شارۆچکە و ناوچە جیاجیاکان، بۆ شەرمەزارکردنی بڕیارەکان چالاکی جۆراوجۆر ئەنجامدرا.

پارت و ڕێکخراو و کەسێتییەکان بەشداری چالاکییەکان بوون و درووشمەکان بۆ پشتیوانی لە بەرخۆدانی سیاسەتمەدارانی زیندانیکراو و شەرمەزارکردنی بڕیارەکان بەرزکرانەوە.

لە چالاکییەکاندا دووپاتکرایەوە، ئەم بڕیارانە لەلایەن ئاکەپە-مەهەپەوە دراون، لەبری دادگاییکردنی داعش سیاسەتمەدارانی ئازادیخواز و دیموکراتیخواز دادگایی دەکرێن.

هاوکات جەختکرایەوە ئەم بڕیارانە تۆڵەی سەرکەوتنی کۆبانێ و شکستی داعشە، ئەمەش دەریدەخات ئاکەپە و مەهەپە لەگەڵ داعش یەکن. 

هەروەها دووپاتکرایەوە هاوشێوەی بەرخۆدانی سیاسەتمەداران لە زیندان، گەل و ژنان و گەنجان شەقامەکان پڕ دەکەن لە بەرخۆدان و تا ئازادکردنی زیندانیان درێژە بە تێکۆشان دەدەن، بانگەواز لە هەمووان کرا بەشداربن لە تێکۆشان لەپێناو ئازادی و دادپەروەری.

هاوکات لای خۆیەوە، کۆمەڵەی عەلەوییە دیموکراتیکەکان (داد) ڕاگەیاندراوێکی نوسراوی بڵاوکردەوە و ڕایگەیاند دۆزی کۆبانێ بە تەواوی دۆزێکی سیاسییە، سزادانی کەسانێکە دژی مردن بەرگری لە ژیان دەکەن و دژی هێزی قڕکەری داعش وەستانەوە، ئەگەر داعش سەرکەوتبا کورد و عەلەوییەکانی کۆمەڵکوژ دەکرد. داوای کرد دەستەبجێ سیاسەتمەداران ئازاد بکرێن.