خزمی زیندانیان لە ئیستەنبوڵ لە چوارچێوەی کەمپەینی "ئازادی بۆ عەبدوڵا ئۆجالان، چارەسەری سیاسی بۆ پرسی کورد" لەبەردەم زیندانی ژنانی باکریکۆ چالاکی "دەنگت بخەپاڵ ئازادی"یان ئەنجامدا، کۆمەڵەی پشتگیری لە بنەماڵەی زیندانیان و حکومدراوانی مەڕمەڕە و پارتی یەکسانی و دیموکراسی گەلان (دەم پارتی) و پارتی هەرێمە دیموکراتیکەکان (دەبەپە)، تەڤگەری ژنانی ئازاد (تەژەئا)، کۆمەڵەی مافناسان بۆ ئازادی (ئۆهەدە) و چەندین ڕێکخراوی جڤاکی مەدەنی بەشداربوون.

سەدان کەس بە چەپڵە و هەلهەلە ڕێپێوانیان کرد تا بەردەم زیندانی باکریکۆ، پانکارتی "بۆ شکاندنی گۆشەگیری دەنگت بخەپاڵ ئازادی" هەڵگیرا و یەلەکی "گۆشەگیری تاوانی دژی مرۆڤایەتییە"یان پۆشی. هەروەها چەندین جار درووشمی "ماف، یاسا، دادپەروەری" و "ژن، ژیان، ئازادی" بەرزکرایەوە.

هاوسەرۆکی دەم پارتی ئیستەنبوڵ موراد کالماز گوتی: "بۆ کۆتاییهێنان بە پێشێلکاری مافەکان لە تورکیا و هەڵگرتنی گۆشەگیری سەر بەڕێز عەبدوڵا ئۆجالان، لەپێش زیندان چالاکی دانیشتن ئەنجام دەدەین".