ته‌رمی مه‌ودا له بڕۆكسل به‌خاكسپێردرا
ته‌رمی ئه‌و منداڵه‌كورده‌ی له لایه‌ن پۆلیسی به‌لجیكا كوژرا، به مه‌ڕاسیمێك له به‌لجیكا به‌خاكسپێردرا.
مه‌ودا شه‌مدین، ئه‌و منداڵه ته‌مه‌ن ٢ ساڵه‌ی له هه‌فته‌كانی ڕابردوو له لایه‌ن پۆلیسی به‌لجیكا كوژرا، ئه‌مڕۆ به مه‌ڕاسیمێكی به‌رفره‌وان له گه‌ڕه‌كی لیوسه-ی بڕۆكسل به‌خاكسپێردرا، مه‌ڕاسیمه‌كه كه به خۆپیشاندانێك ده‌ستی پێكرد، له لایه‌ن ناوه‌ندی دیموكراتی كوردستانیانی به‌لجیكا - NAV-BEL و یه‌كێتیی ژنانی كورد له به‌لجیكا - YJK-B ڕێكخرا و جگه له ئاماده‌بوونی دایك و باوكی مه‌ودا، ده‌یان كوردستانی و ڕێكخراوه‌كانی كۆمه‌ڵگه‌ی سیڤیلی به‌لجیكا ئاماده بوون. ئاماده‌بوان كوشتنی مه‌ودای ته‌مه‌ن ٢ ساڵانیان به‌توندی ئیدانه كرد.
ڕێپێوانه‌كه تا گۆڕستانی Cchaerberck به‌رده‌وام بوو و دواتر له‌وێ مه‌ودا به‌خاكسپێردرا.
مه‌ودا شه‌مدین (ته‌مه‌ن ٢ ساڵان) خه‌ڵكی شاری ڕانیه‌ی باشووری كوردستانه. ئه‌و خێزانه به‌هۆی خراپی دۆخی باشووری كوردستان ماوه‌ی چه‌ند ساڵێكه ڕوویان له ئه‌ورووپا كردووه و تا ئێستا له هیچ وه‌ڵاتێكی ئه‌ورووپی مافی په‌نابه‌ره‌تی پێنه‌داون.
چه‌ند هه‌فته‌یه‌ك پێش ئێستا ئه‌و خێزانه له‌گه‌ڵ ده‌یان په‌نابه‌ری دیكه كه له ئۆتۆمبێلێكدا بوون و به نایاسایی سنووره‌كانی به‌لجیكایان بڕی بوو، له لایه‌ن پۆلیسی به‌لجیكاوه ده‌ستڕێژیی گوله‌یان لێ كرا. له ئه‌نجامدا مه‌ودای ته‌مه‌ن ٢ ساڵان ژیانی له‌ده‌ستدا.
له دوای كوژرانی مه‌ودا، ئه‌و ڕووداوه ڕۆژه‌ڤی مێدیا و ڕێكخراوه‌كانی كۆمه‌ڵگه‌ی سیڤیلی ئه‌ورووپا به‌تایبه‌تی به‌لجیكای داپۆشی و ناڕه‌زایی ڕای گشتی لێكه‌وته‌وه.
له خۆپیشاندانه‌كانی به‌لجیكا كه له دژی ئه‌و ڕووداوه ئه‌نجامدران، ڕێكخراوه‌كانی كۆمه‌ڵگه‌ی سیڤیل داوایان كرد وه‌زیری ناوخۆ و وه‌زیری كۆچبه‌رانی به‌لجیكا ده‌ستله‌كاربكێشنه‌وه.
s.m
