سەزاى تەمەلی هاوسەرۆکى گشتیى پارتى دیموکراتیکى گەلان (هەدەپە) لە چوارچێوەى کارەکانیدا بۆ هەڵبژاردنى ٢٤ى حوزەیران لە رحا لەلایەن گەلەوە بە جۆش و خرۆشەوە پێشوازیى لێکرا.
تەمەلی سەرەتا سەردانى ناوەندى ئۆزان کرڤاری کرد و دواتر چوو بۆ ناوچەى سێوەرەگ و لە بنکەى بانگەشەى هەڵبژاردندا پێشوازیى لێکرا و دواى ئەوە دەستیان کرد بە سەردانى هاووڵاتیان و لەلایەن هەزاران هاووڵاتیی ئەو شارەوە پێشوازیی لێکرا و تەمەلی لە قسەکانیدا بۆ ئەو هەزاران هاووڵاتییە وتی "دواى هەڵبژاردنى ٢٤ى حوزەیران ئاکەپە تەریک دەکەوێت".
لە دواى ئەوەش سەردانى ناوچەى وێرانشارى کرد و لە شەقامەکانى وێرانشاردا لەلایەن هەزاران کەسەوە پێشوازیى لێکراو و لە کۆبوونەوەیەکى جەماوەریدا قسەى بۆ هاووڵاتیان کرد و لە دواى ئەوەش چوو بۆ شاری سەرێکانی. پۆلیس هەوڵێدا لە سەرێکانی رێگری دروست بکات و رێگە لە سەردانکردن و کۆبوونەوەى گەل بگرێت، بەڵام هەزاران هاووڵاتى لە بەردەم بنکەى بانگەشەى هەڵبژاردنى هەدەپە کۆبوونەوە و تەمەلی قسەى بۆ ئەو هاووڵاتییانەکرد. دواى قسەکانى تەمەلی پۆلیس هێرشى کردە سەر کۆبوونەوەى جەماوەر و چەندین کەسیان دەستگیرکرد.
سەزای تەمەلی هاوسەرۆکى گشتیى هەدەپە دواى ئەوە چووە شارى رحاى ناوەندى پارێزگاى رحا و لە ناوەندى دەستەى گشتیى هەڵبژاردنى هەدەپە لە کارائۆپروی بە جۆش و خرۆشەوە پێشوازیى لێکرا. عومەر ئۆجالان پاڵێوراى هەدەپە بۆ رحا سەرەتا چەند وتەیەکى پێشکەش کرد و رایگەیاند، دەسەڵات لە رحا لەق دەکرێت.
دوابەدواى ئەوە، سەزای تەمەلی هاوسەرۆکى هەدەپە رایگەیاند، هەموو رۆژانى هەفتە و هەموو کاتژمێرەکانى شەو و رۆژ کار دەکەن و وتى "لە ٢٤ى حوزەیراندا ئێمە لە سندوقەکاندا وەڵامیان دەدەینەوە".
تەمەلی ئاماژەى بەوەشکرد، دەسەڵات دەستیکردووە بە لابردنى سندوقى هەندێک ناوچە و سندوقەکانیان بۆ ناوچەى تر گواستووەتەوە، بەڵام ئەوان سندوقەکان بۆ هەر شوێنێک ببەن، ئەوا هەدەپەییەکان دەچنە ئەوێ و دەنگى خۆیان بەکار دەهێنن.
تەمەلی راشیگەیاند، ئەو بەربەستەى بۆیان دانراوە، بەربەستى فاشیەتە و بە دڵنیاییەوە ئەو بەربەستە هەڵدەوەشێننەوە. وتیشى "هەدەپە کار بۆ ئەوە دەکات ١٨٠ پەرلەمانتار رەوانەى پەرلەمان بکات. چونکە ئامانجمان ئەوەیە کە شکست بە دیکتاتۆرى بهێنین و رێگرى لە سەرکەوتنى دیکتاتۆریەت بکەین".
سەزاى تەمەلی سەرلەبەیانیى ئەمڕۆ لە شاری رحاوە بەرەو پارێزگاى سەمسور کەوتەڕێ و لەوێ بەردەوام دەبێت لە کارەکانى بۆ هەڵبژاردنى ٢٤ى حوزەیران.
ر.م