له بیسته‌مین ساڵیادی پیلانگێڕیی نێوده‌وڵه‌تیی ١٥ی شوباتی ١٩٩٩ی دژ به ڕێبه‌ری گه‌لی كورد عه‌بدوڵا ئۆجالان، زیندانییانی سیاسیی كورد له زیندانه‌كانی ئێران ده‌ستیان به مانگرتن له خواردن كرد.
به گوێره‌ی زانیارییه‌كانی ئاژانسی هه‌واڵی فورات (ANF) ١٧ زیندانیی سیاسی كه له چوارچێوه‌ی دۆسیه‌ی پارتیی ژیانی ئازادی كوردستان (په‌ژاك) و پارتیی كرێكارانی كوردستان (په‌كه‌كه) له شاره‌كانی ئوورمیه، خۆی، ته‌ورێز و كاشمر زیندانی كراون، به‌مه‌به‌ستی شه‌رمه‌زاركردنی پیلانگێڕیی نێوده‌وڵه‌تیی دژ به ئۆجالان، بۆ ماوه‌ی ڕۆژێك ده‌ستیان به مانگرتن له خواردن كرد.
زه‌ینه‌ب جه‌لالیان و عه‌لی ئه‌حمه‌د سلێمان له زیندانه‌كانی شاری خۆی و ئوورمیه له‌نێو ئه‌و زیندانییه سیاسییانه‌دان كه ئه‌مڕۆ ده‌ستیان به مانگرتن له خواردن كردووه.
جێی باسه، له ساڵی ٢٠٠٠-ه‌وه ئازادیخوازانی گه‌لی كورد و شه‌ڕڤانانی ئازادی هه‌موو ساڵێك له ١٥ی شوباتدا به‌شێوه‌یه‌كی سمبولی له هه‌ر چوار لای وه‌ڵات مان له خواردن ده‌گرن.
s.m
