عادل عەبدولمەهدی سەرۆک وەزیرانی عێراق بە بڵاوکردنەوەى راگەیاندراوێکى فەرمی، ٤ خاڵی گرنگی خستەڕوو و ڕایگەیاند، بەبێ هەماهەنگیی پێشوەختە لەگەڵ عێراق دا جوڵە و کاری هەموو هێزیکی دەرەکی لە ناو خاکی عێراق دا قەدەغەیە.
خاڵەکانی ڕاگەیاندراوەکەی عادل عەبدولمەهدی سەرۆک وەزیرانى عێراق لەبارەى هێزی بیانى لە خاکی عێراق دا:
١- قەدەغەیە هیچ هێزێکی بیانی بەبێ رێککەوتنى پێشوەختە، جوڵە و کار لە ناو خاکی عیراق بکات.
٢- قەدەغەیە هەر دەوڵەتێکی هەرێمی یاخود بیانی لە ناو خاکی عێراق چالاکیی هەبێت دژی هەر لایەنێک، نابێت (دەوڵەتە هەرێمی و بیانییەکان) هیچ پێگەیەکان بەبێ ڕەزامەندیی حکومەتی عێراق هەبێت.
٣- دروستکردنی هەر هێزیکی چەکدار قەدەغەیە، کە لە ژێر فەرماندەیی هێزە چەکدارەکانی عیراقدا نەبێت.
٤- قەدەغەیە هەر هێزیک کە لە ناو حکومەتی عیراقدا بێت چالاکیی چەکداریی هەبێت بەبێ ئاگایی و کۆنترۆڵکردنی هێزی عێراقی.
ئەو راگەیاندراوەى عادل عەبدولمەهدی سەرۆک وەزیرانى عێراق لە کاتێکدایە، بەردەوام دەوڵەتی تورکیا سەروەریی خاکی عێراق و هەرێمی کوردستان پێشل دەکات و سنوورەکان دەبەزێنیت و لە رێ فڕۆکە و کۆپتەر و تۆپخانەوە گوندەکان بۆردوومان دەکات.
جگە لەوانەش تورکیا چەند ناوچەیەکى گرنگی لە باشووری کوردستان داگیر کردووە و چەندین بنکەى سەربازیى لە خاکی باشووری کوردستاندا دروستکردووە.
هەروەها دەوڵەت و سوپای تورکیا لە رێی هێزیکی هەرێمییەوە هەوڵی دروستکردنى گروپی چەکداری سەر بە تورکیا لەو ناوچانەدا دەدات و هێزێکى زۆری لە سەرباز و سیخوڕەکانی بە ناوچەکەدا بڵاوە پێکردووە.
تاوەکو ئێستا پەرلەمانى هەرێمى کوردستان، چەندین لایەن، کەسایەتى و رێکخراوی مەدەنی لە باشووری کوردستان و عێراق داوایانکردووە هێزەکانى تورکیا لە خاکى باشووری کوردستان بچنە دەرەوە و بنکە و بارەگاکانیان دابخەن. چەندین هەڵمەتیش لە دژی هێرش و کوشتارەکانى دەوڵەتى تورک بۆ سەر هاووڵاتییانی باشووری کوردستان بەڕێوەچوون.
بە هۆی ئەو کوشتارەى هێزەکانى سوپای تورکیا لە باشووری کوردستان ئەنجامی دەدەن، چەندین جار ناڕەزایەتی و توڕەیی هاووڵاتییان لە دژی هێزەکانى سوپای تورکیا روویانداوە، کە دیارترین توڕەیى هاووڵاتییانی ناوچەکانى شیلادزێ و دێرەلوک بوو لە دژی بنکە سەربازییەکانى سوپای تورک و چوونە سەر بنکەى سوپای تورکیا لە شیلادزێ و ئاگریان تێبەردا و سەربازەکانى سوپای تورکیایان دەرکرد.
ر.م