كوردستانیانی ئه‌ورووپا نه‌ورۆزی به‌رخۆدانیان پیرۆز كرد
كوردستانیانی ئه‌ورووپا به درووشمی «هه‌موو شوێنێك عه‌فرینه، هه‌موو شوێنێك به‌رخۆدانه» له زۆر شار نه‌ورۆزیان پیرۆز كرد.
له شاره‌كانی دیوسبۆرگ، فرایبۆرگ، هامبۆرگ، زاربروكه‌ن و شتوتگارت-ی ئه‌ڵمانیا، كۆپنهاگنی پایته‌ختی دانمارك، ده‌نهاگ-ی هۆڵه‌ندا، ستراسبۆرگ، مارسیلیا و نایس و رێننس-ی فه‌ڕه‌نسا، ڤیه‌ننای پایته‌خت و ئینسبروك-ی نه‌مسا و وه‌ڵاتی ئوسترالیا كوردستانیان و دۆستانیان ڕژانه مه‌یدانه‌كانی نه‌ورۆز و به ڕۆحی به‌رخۆدانی عه‌فرین نه‌ورۆزیان پیرۆز كرد.
كوردستانیان به درووشمی «بژی به‌رخۆدانی عه‌فرین» و «هه‌موو شوێنێك عه‌فرینه، هه‌موو شوێنێك به‌رخۆدانه» و چه‌ندان درووشمی دیكه به چالاكی ئاپۆرائاسا جه‌ژنی نه‌ورۆزی به‌رخۆدانیان پیرۆز كرد. كوردستانیان سڵاویان بۆ به‌رخۆدانی عه‌فرین نارد و داگیركاری ده‌وڵه‌تی توركیا و چه‌ته‌كانیان ئیدانه كرد.
له چالاكییه‌كاندا ئاگری نه‌ورۆز كرایه‌وه و ئاماده‌بوان له ده‌وری ئاگر گۆڤه‌ندیان كرد. چه‌ند درووشم و سترانی شۆڕشگێڕیان گوت و سه‌رنجی ڕێبوارانیان بۆ سه‌ر به‌رخۆدانی عه‌فرین و كۆمه‌ڵكوژییه‌كانی ده‌وڵه‌تی توركیا ڕاكێشا.
s.m
