مانگرتن له خواردن كه له شاری ستراسبۆرگ له‌پێناو هه‌ڵگرتنی گۆشه‌گیریی سه‌ر ئۆجالان به‌ڕێوه‌ده‌چێت، له ڕۆژی ٣١هه‌مدا به‌رده‌وامه. هاوكات ئه‌مڕۆ له به‌رده‌م په‌رله‌مانی ئه‌ورووپا چالاكییه‌ك ساز كرا.
له‌پێناو هه‌ڵگرتنی گۆشه‌گیریی سه‌ر ڕێبه‌ری گه‌لی كورد عه‌بدوڵا ئۆجالان و ئازادكردنی، مانگرتنی بێسنوور و بێ نۆبه‌تی په‌رله‌مانتاری پارتیی دیموكراتیی گه‌لان (هه‌ده‌په) له‌یلا گیوڤه‌ن، زیندانییانی دۆزی په‌كه‌كه و پاژك، به‌رخۆدێرانی هه‌ولێر و ستراسبۆرگ له خواردن به‌رده‌وامه.
له شاری ستراسبۆرگی فه‌ڕه‌نسا ئه‌مڕۆ بۆ هه‌مان مه‌به‌ست له به‌رده‌م بینای په‌رله‌مانی ئه‌ورووپا گردبوونه‌وه‌یه‌ك دژی گۆشه‌گیریی سه‌ر ئیمراڵی به‌ڕێوه‌چوو. كوردستانییانی ئه‌ڵمانیا، فه‌ڕه‌نسا، به‌لجیكا، سوسیرا و هۆڵه‌ندا دانی به‌یانی خۆیان گه‌یانده ستراسبۆرگ و به‌شدارییان كرد له گردبوونه‌وه‌كه. هاوكات ئه‌ندامانی كۆما به‌رخۆدان دیار دێرسم و هۆزان شه‌مدین له‌گه‌ڵ چه‌ندین هونه‌رمه‌ندی دیكه به‌شدارییان له چالاكییه‌كه‌دا كرد.
ئاماده‌بوان درووشمه‌كانی «بێ سه‌رۆك ژیان نابێ»، «ئازادی بۆ ئۆجالان»، «فاشیست ئه‌ردۆغان»، «به‌رخۆدان ژیانه» و «به‌سه گۆشه‌گیری، گوترانه‌وه. هه‌روه‌ها مانگرتوانی ستراسبۆرگ-یش هاتنه شوێنی گردبوونه‌وه‌كه.
جێی باسه زیاتر له ١٤ ده‌زگه‌ی مێدیایی ئه‌ورووپا ڕووماڵی ئه‌م گردبوونه‌وه‌یه‌یان كرد.
s.m
