بۆ کۆتایهێنان بە گۆشەگیریى سەر ئۆجالان و پشتگیریکردن لە چالاکییەکانى مانگرتن، ئەمڕۆ لە ئیستەنبول کۆبوونەوەیەکى جەماوەری رێکدەخرێت. گەل لە ئێستاوە بەرەو گۆڕەپانى کۆبوونەوە جەماوەرییەکە دەڕوات.
رێکخستنى پارتى دیموکراتیکى گەلان (هەدەپە) لە ئیستەنبول بۆ سەرنجڕاکێشانە سەر گۆشەگیریى سەر عەبدوڵا ئۆجالان رێبەری گەلی کورد و پشتگیریکردن لە لەیلا گیوڤەن هاوسەرۆکى کۆنگرەى کۆمەڵگەى دیموکراتیک (کەجەدە) و زیندانییە مانگرتووەکانى تر لە گۆڕەپانى ئازادی لە باکرکۆی ئیستەنبول کۆبوونەوەیەکى جەماوەری رێکدەخات.
کۆبوونەوە جەماوەرییەکە لە ژێر دروشمی "ئێمە بۆ رەنج، ئاشتی و دادپەروەری پێکەوە کۆبووینەتەوە" بەڕێوەدەچێت و پەیامی "تاریکیى گۆشەگیری ناهێڵێن!، مەشخەڵانى ئازادی هەڵدەکەین! بە بەرخودانی شۆڕش گەل سەردەکەوێت!" دەخرێتەڕوو.
پۆلیس شەقامی ئینجیرلای بۆ گۆڕەپانى کۆبوونەوە جەماوەرییەکە داخستووە و خاڵی پشکنینى تیادا داناوە. لەسەر هەرشەقام و کۆڵانێکدا ئۆتۆمبێلێکى زرێپۆشی جۆری تۆما و چەند ئۆتۆمبێلى تری زرێپۆش راوەستاون و پۆلیسیش بە ئەسپ بە شەقام و کۆڵانەکاندا دەگەڕێن.
ئەو هاووڵاتییانەى کە روویان لە باکرکۆی کردووە دەبێت لە ٣ خاڵی خاڵی پشکنینى پۆلیسەکانەوە تێپەڕن. هاووڵاتییان لەدوای تێپەڕینى خاڵەکانى پشکنین و بە گەیشتنیان بۆ گۆڕەپانەکە دەستیان بە وتنەوەى دروشم کردووە.
هاوکات گەل بە ئۆتۆمبێل بەرەوە بارەگاى هەدەپە لە ناوچەى باکرکۆی دەڕۆن و بەشێوەى جەماوەری روویان لە گۆڕەپانى کۆبوونەوە جەماوەرییەکە کردووە. لە گۆڕەپانەکەدا پلاتفۆرمێکى گەورە ئامادە کراوە و پۆستەرێک کە لەسەری نووسراوە "لەیلا گیوڤەن مافدارە، دەبێت کۆتایى بە گۆشەگیری بهێنرێت" بەرزکراوەتەوە.
ر.م
