دانیشتنی دادگاییکردنی دەمیرتاش لە دادگای مافی مرۆڤی ئەوروپا بەڕێوەچوو.

دانیشتنی دادگاییکردنی سەلاحەدین دەمیرتاش هاوسەرۆکی پێشووی هەدەپە لە باڵەخانەی دادوەرانی باڵای دادگای مافی مرۆڤی ئەوروپا بەڕێوەچوو.

شاندی هەدەپە و سەزایی تەمەلی هاوسەرۆکی هەدەپە، باشاک دەمیرتاش هاوسەری سەلاحەدین دەمیرتاش و شاندی جەهەپە کە سەزگین تانریکۆلۆ پەرلەمانتاری جەهەپەشی تێدابوو، بەشدارییان لە دانیشتنەکەی دادگادا کرد.

پارێزەران پڕۆفیسۆر دکتور باشاک چالی و دکتور کەرەم ئاڵتنپارماک و ماحسونی کارامان و ڕەمەزان دەمیر و ئایگول دەمیرتاش بەرگرییان لە سەلاحەدین دەمیرتاش کرد.

پارێزەران بەرگرییان کرد

پارێزەران ڕایانگەیاند، بۆ ئەوەی دانوستانەکان لەنێوان عەبدوڵا ئۆجالان رێبەری گەلی کورد و بەرپرسانی دەوڵەت دا سەربکەوێت، دەمیرتاش ڕۆڵی گێڕاوە.

پارێزەران وتیان، دەمیرتاش بە شێوەیەکی نایاسایی دەستبەسەرکراوە و کراوەتە ئامانج و لە کارە سیاسییەکانی بێبەشکراوە.

پارێزەران هەروەها ڕایانگەیاند، ئەردۆغان فەرمانی دا و دۆسیە ئامادەکران و کودەتای ٤ی تشرینی دووەمی ٢٠١٦ / ١٤ی گەڵاڕێزان ئەنجامدرا و سیاسەتمەداران دەستگیرکران.

پاریزەران باسیان لە ٩ بیانووی دەوڵەتی تورک بۆ دەستگیرکردنی دەمیرتاش کرد و ئاماژەیان بەوەدا، قسەکانی دەمیرتاش سیاسین. کاتێک دەمیرتاش هاوسەرۆکی دووەمین پارتی ئۆپۆزسیۆنی تورکیا بوو ئەو لێدوانانەی داوە. قسەکانی سەرۆکی ئۆپۆزسیۆن کراوە بە بیانووی دەستگیرکردن.

میجاتۆڤیچ: یاسای تورک بووەتە میکانیزمی چەوساندنەوە

کۆمسیاری مافی مرۆڤی ئەوروپا دونجا میجاتۆڤیج بەشداری دانیشتنی دادگای کرد و ڕایگەیاند، لە تورکیا زیان بە سەروەری دادگاکان گەیشتتووە و دادگا بۆ چەوساندنەوەی لایەنە ئۆپۆزسیۆنەکان بەکاردەهێنرێت.

هەرووەها نزیکەی ٢٩ پەرلەمانتار لە فراکسیۆنی سۆسیالیست و پارتی سەوز لە پەرلەمانی ئەوروپادا چاودێریی دانیشتنەکەیان کرد.د

ژ.ت