لە شاری ستۆکهۆڵم گردبوونه‌وه‌یه‌ك دژی ڕژێمی ئێران بەڕێوەچوو 

له‌ شاری ستۆكهۆڵم دژی گوشاره‌كانی ڕژێمی ئێران گردبوونه‌وه‌یه‌ك ساز كرا.

دوێنێ بە بەشداری نوێنەرانی پارتی و لایەنەکانی رۆژهەڵاتی کوردستان و ئێران لە شاری ستۆکهۆڵمی پایتەختی سوێد گردبوونه‌وه‌یه‌ك بەڕێوەچوو. بەشداربوان گوشارەکانی رژێمی ئێرانیان لەسەر چالاکانی بواری كرێكاران و ژینگەپارێزی ئیدانه‌ كرد.

گردبوونه‌وه‌كه‌ به‌ گوتنه‌وه‌ی درووشمەکان ده‌ستی پێكرد. دواتر هەریەکە لە نوێنه‌رانی پارتیی ژیانی ئازادی كوردستان (پەژاک)، كۆمه‌ڵگه‌ی ژنانی ئازادی ڕۆژهه‌ڵاتی كوردستان (کەژار)، پارتی گەلی بەلووچ، پلاتفۆڕمی دیموکراتیکی گەلان و بزووتنەکانی ئێران گوته‌یان پێشکەش كرد.

له‌ گوته‌كانیاندا، وێڕای شەرمەزارکردنی سیاسەتی سەرکوتکارانه‌ی حکوومەتی ئێران، داوا لە کۆمەڵگه‌ی جیهانی بەتایبەت ناوەنده‌کانی مافی مرۆڤ کرا هه‌ڵوێستیان هەبێت لە بەرانبەر شەپۆلی گرتن و ئەشکەنجەدانی چالاکانی کرێکاری و ژینگەیی. هەروەها بەشداربوان درووشمیان گوتەوە و داوایان لە پارتییه‌سیاسییه‌كان، ئازادیخوازان و گەلانی ئێران کرد بێدەنگی بشکێنن و لە دژی رژێمی ئێران برژێنە سه‌ر شەقام و مەیدانەکان.

s.m