هاوسەرۆکانی ناڤ-دەم بە بیریان هێنایەوە کە حکوومەتی هه‌رێمی ڕاینی باكوور - وێستفالیای ئه‌ڵمانیا هەوڵ دەدات کە قانوونێكی نوێ بۆ هێزەکانی پۆلیس دەربکات. بۆ شەرمەزارکردنی ئەو هەوڵانەش، ڕۆژی شەممەی داهاتوو ڕێپێوانێک ساز دەکەن.
قانوونی نوێی پۆلیس كه هه‌وڵ ده‌درێت دەربکرێت، ناڕه‌زایه‌تی به‌دوای خۆیدا هێنا. هاوسەرۆکانی ناوه‌ندی كۆمه‌ڵگه‌ی دیموكراتی كوردانی ئه‌ڵمانیا (ناڤ-دەم) ده‌رباره‌ی ئەرکی نوێی هێزەکانی پۆلیس لە هه‌رێمی ڕاینی باكوور - وێستفالیا (NRW)ی ئه‌ڵمانیا، به‌یاننامه‌یه‌كیان بڵاوکردەوە. له به‌یاننامه‌كه‌دا هاتووە: «نزیکەی ١٠٠ ڕێکخراو، لە شاری دۆسلدۆرف ڕێپێوانێک ساز دەکەن و هه‌وڵه‌كان بۆ دەرکردنی قانوونێكی نوێ ده‌رباره‌ی ئەرکی هێزەکانی پۆلیس، شەرمەزار دەکەن.»
لە به‌یاننامه‌كه‌دا هەڵکوتانە سەر ڕێکخراو و دەزگه کوردییەکان لە ئەڵمانیا بە بیرهێنراوەتەوە و ڕاگەیەندراوە کە لە ئەڵمانیا فشار لەسەر دەزگه کوردییه دیموکراتییەکان، چالاکان، ڕێکخراوه دیموکراتییه‌كانی کۆچبەران، ڕێکخراوە شۆرشگێڕییەکانی تورکیا، مرۆڤە پێشکەوتنخوازه‌كان، شۆڕشگێڕان، دژە فاشیستەکان و ئاشتیخوازانی ئەڵمانیا زیادیان کردووە.
لە درێژه‌ی به‌یاننامه‌كه‌دا، ناڤ-دەم ڕایگه‌یاندووە، حکوومەتی هه‌رێمی ڕاینی باكوور - وێستفالیا، بە قانوونێكی نوێی ئەرکی هێزەکانی پۆلیس، دەیه‌وێت فشار و زۆرداری لەسەر دەزگه دیموکراتییەکان سەختتر و قورستر بكات. ناڤ-ده‌م ڕایگه‌یاند: بێ ئەوەی له‌نێو ڕای گشتیدا گفتوگۆی لەبارەوە بکرێت، دەیانەوێت قانوونێكی نوێی ئەرکی پۆلیس ڕاسته‌خۆ لە پەرلەمانی په‌سه‌ند بكه‌ن.
«دەیانەوێت ئەڵمانیا بە تەواوی بکەنە دەوڵەتێکی پۆلیسی»
هاوسەرۆکانی ناڤ-دەم دەستنیشانیان کرد کە ئەگەر ئەو قانوونه پەسەند بکرێت، زۆر ئەرک ڕادەستی هیزەکانی پۆلیس دەکرێت و بە بێ بڕیاری دادگه پۆلیس دەتوانێت دەست لە مافە دەستوورییەکان وەربدات. ناڤ-ده‌م هێمای بۆ ئه‌وه كردووه كه ئەرکی پشكنین و دەستوەردان لە ژیانی کەسەکان، ژیانی تایبەتی، لە ساڵی ١٩٤٥ەوە تا ئێستا لەو ئاستەدا ڕادەستی کەس نەکرابوو.
«له‌م ڕێیه‌وه دەیانەوێت ئەڵمانیا بە تەواوی بکەنه دەوڵەتێکی پۆلیسی و خه‌ڵك کۆنترۆڵ بکەن. بەگوێرەی ئەو قانوونه نوێیەی کە پلانی بۆ داده‌نرێت، هێزەکانی پۆلیس نەک تەنها زوو ده‌ستێوه‌ردان ده‌كه‌ن، بەڵکو دەتوانن پشکنینی دی ئێن ئەی بە ڕەنگی پێست، چاو و قژ بەدەست بهێنن و لە کاتی لێپرسینەوەدا بەکاری بهێنن. هەروەها ڕێگە بە هێزەکانی پۆلیس دەدرێت کە بۆمبی دەستی و هەندێک جۆری دیكه‌ی تەقەمەنی بە کاربێنن. لەبەرئەوە هاوشێوه‌ی هه‌رێمه‌كانی دیكه، له هه‌رێمی ڕاینی باكوور - وێستفالیاش دژ بە قانوونی نوێی ئەرکی هێزەکانی پۆلیس ده‌وه‌ستینه‌وه. ئێمە نامانەوێت مافە بنەڕەتییه‌كانی ملیۆنان مرۆڤ ئاستەنگ بکرێن. نابێت بە ناوی ئاسایش و سیستەمەوە، خه‌ڵك بە كۆمه‌ڵ کۆنترۆڵ بکرێت.»
«نزیکەی ١٠٠ ڕێکخراو لەدژی ئەو قانوونه نوێیە لە دەوری یەکتر کۆدەبنەوە»
هاوسەرۆکانی ناڤ-دەم داوایان لە حکوومەتی هه‌رێمی ڕاینی باكوور - وێستفالیا كرد كه ئەو پرۆژە قانوونه پەسەند نەکات و نەیکاتە قانوونێكی کارپێکراو.
«ڕۆژی ٧ ی تەمووز دوایین هەڵسەنگاندن لەسەر پرۆژە قانوونه نوێیەکەی تایبەت بە ئەرکی هێزه‌كانی پۆلیس لەو هه‌رێمه‌ی ئەڵمانیا دەکرێت. له‌و ڕۆژەدا نزیکەی ١٠٠ ڕێکخراو لە دەوری یەکتر کۆدەبنەوە و خۆپیشاندانێکی گەورە ئەنجام دەدەن. داوا لە هەموو چالاک، ڕێکخراوە جەماوەرییە دیموکراتییەکانی کۆچبەران، ڕێکخراوە شۆرشگێڕییەكانی توركیا، کەسانی پێشکەوتنخواز، شۆڕشگێڕان، دژە فاشیستەکان و ڕێکخراوە ئاشتیخوازەکانی ئەڵمانیا به‌تایبه‌تی ڕێكخراوه كوردییه دیموكراتییه‌كان دەکەین کە به هه‌موو هێزی خۆیان به‌شداری له‌و چالاكییه بكه‌ن.»
s.m
