نەتەوە یەکگرتووەکان لە راپۆرتێکدا داوای لە بەرپرسانی ئێران کرد، چارەنووس و شوێنی بەخاکسپاردنی ئەو ٤ زیندانییە سیاسییە کوردە ئاشکرا بکات، کە ١٠ ساڵ لەوە پێش لە سێدارەى داون.
لە ڕاپۆرتی دەستەی تایبەتى نەتەوە یەکگرتوەکان لەبارەی کەسانى بە زۆر بێسەروشوێنکراودا، چوار زیندانیی سیاسی کورد بە ناوەکانی فەرزاد کەمانگەر، شیرین عەلەم هولی، عەلی حەیدەریان و فەرهاد وەکیلی بە کەسانى بە زۆر بێسەروشوێنکراو ناسێنراون.
لەو چوارچێوەیەدا نەتەوە یەکگرتووەکان بەرپرسیارێتیى ئاشکراکردنی چارەنووسی ئەو ٤ کەسە و سەلماندنی بانگەشەی لەسێدارەدانیانی خستە ئەستۆی ئێران و راشیگەیاند، ئەگەر بانگەشەکەیان ڕاست بێت لەبارەى لەسێدارەدانیانەوە، پێویستە شوێنی بەخاکسپاردنەکەیان بە بنەماڵەکانیان ڕابگەیەنرێت.
ئەو دەستەیە لە دانیشتنی ژمارە ١١٨، بەپێی بەڵگەنامەی ژمارە (A/HRC/WGEID/118/1) ٤ زیندانیی سیاسی کوردی لە سێدارەدراوی وەکو بێسەروشوێنکراوی زۆرملێ بە رەسمی پەسەند کرد.
لەو ڕاپۆرتەدا هاتووە، بێسەروشوێنکردنی زۆرەملێیانە پێشێلکردنی بەردەوامی مافەکانی مرۆڤە و پەیوەندیی بە تێپەربوونی کاتەوە نییە، تا ئەو کاتەی کەسە بێسەروشوێنکراوەکە نەدۆزرێتەوە، یان چارەنووسی بەتەواوی روون نەبێتەوە لێکۆلینەوەکان لەبارەیانەوە بەردەوام دەبن.
فەرزاد کەمانگەر، مامۆستا و چالاکی مافەکانی مرۆڤ، شیرین عەلەم هولی، فەرهاد وەکیلی و عەلی حەیدەریان، لە ٩ی ئایاری ٢٠١٠ / ١٩ی بانەمەڕ (گوڵان) دوای پرۆسەیەکی دادگاییکردنی پڕ لە پێشێلکاری و سەرباری ناڕەزایی بەرفراوانی جەماوەری کورد و رۆژهەڵاتی کوردستان و ناڕەزایەتییە جیهانییەکان، بە نهێنی و بەبێ ئاگاداری پارێزەر و بنەماڵەکانیان لە دەورووبەری گەراجی زیندانی ئێوین لەسێدارە دران.
دوای تێپەڕبوونی ١٠ ساڵ بەسەر لەسێدارەدانیاندا، هێشتا شوێنی بەخاکسپاردنی ئەو ٤ تێکۆشەرە کوردە بە بنەماڵەکانیان ڕانەگەیاندراوە و تەنات رژێمی ئێران هیچ بەڵگەیەکی لەبارەى لەسێدارەدانیانەوە پێشکەشی دامەزراوە نێونەتەوەییەکان نەکردووە.
ژ.ت
