پەرلەمانتاری هەدەپەی ئەدەنە تولای هاتیمۆگولار لەبارەی بڕیاری لەنوێ دەستگیرکردنی هاوسەرۆکانی پێشووی هەدەپە سەلاحەدین دەمیرتاش و فیگەن یوکسەکداغ قسەی کرد.

هاتیمۆگولار ڕایگەیاند، لە تورکیا سیستمی دادوەریی سەربەخۆ نییە و دادوەریی بەپێی قسەکانی کەسێک و نوێنەرەکەی دەجولێتەوە. هاتیمۆگولار باسی لەوەش کرد، دادگا لە دۆسیەیەکدا دەمیرتاشی بێگوناح کرد، دادگای باڵاش بێگوناحییەکەی قەبوڵ کرد، ژمارەی دۆسییە گۆڕا و لەنوێیوە دادگا دەستی پێکردەوە. لەبارەی ڕۆژی دۆسییەکەشدا هاتیمۆگولار وتی: "زانیاریمان پێگەیشت و ئێمەش لەگەڵ هاوکارانی پەرلەمانتارمان بە پەلە چووینە دادگا. لە دادگا وتیان یەکسەر بیخەنە ناو کۆنفرانسی ڤیدیۆیی، بەڵام چەندین کاتژمێر ئێمە لە ڕێڕەوەکە وەستاین.

بەگوێرەی ئەو زانیارییانەی گەیشتونەتە من و قسە دەکەم: لەوێ ٤ کاتژمێر هەوڵیان دا دادوەر ڕازی بکەن. بەهۆی ئەوەی دادوەر ئەو بڕیارەی دا، لەبەر ئەوەی دەزانێت سبەی یان کاتیکی دیکە بە چ شێوەیەک دادگایی دەکرێت. لەبەر ئەوە ئێمە ٣-٤ کاتژمێر لە ڕێڕەوەکانی دادگا وەستاین. دواتر دادوەر هات و دۆخێکی سەیری یاسایی ڕووی دا".

هاتیمۆگولار ڕایگەیاند، بە هەموو شێوەیەک گوشار دەخرێتە سەر حزبەکەیان و بڕیارەکانی دادگای مافی مرۆڤی ئەوروپای وەبیر هێنایەوە. هاتیمۆگولار ئاماژەی بەوەش کرد، لە تورکیا دەسەڵات یاری بە سیستمی دادوەری دەکات، دادگا بوەتە بوکەڵە بەدەستی دەسەڵاتەوە. هاتیمۆگولار وتی: "هەوڵ دەدەن دادگای مافی مرۆڤی ئەوروپا و دادگاکانی ئەوروپا بخەڵەتێنن. بەڵام ئەوان خۆشیان دەزانن کەس بەوان ناخەڵەتێ." هاتیمۆگولار باسی لەوەش کرد کە باوەڕی بە سیستمی دادوەری تورکیا نییە و ئیتر هەموو کەسێک ئاگاداری ئەوەیە.