هاوسەرۆکانى گشتیى هەدەپە لەبارەى هەڕەشەکانى ئەردۆغان بۆ سەر هەدەپە راگەیاندراوێکیان بڵاوکردەوە. ئەردۆغان رایگەیاندبوو 'ئەوانەى پشتیوانییان لە هەدەپە کردووە و بوونەتە هۆى ئەوە هەدەپە بچێتە پەرلەمان دەبێت باجەکەى بدەن'. ئەردۆغان بەو شێوەیە هەڕەشەى لە دەنگدەرانى هەدەپە کرد.

لە راگەیاندراوەکەدا هاتووە "ئەو قسە و هەڕەشەیەى ئەردۆغان قبوڵ ناکرێت. هەدەپە ٦ ملیۆن دەنگى بە دەستهێناوە و ئەو دەنگدەرانە لەگەڵ بنەماڵەکانیان دەبنە ٢٠ملیۆن کەس. ئەو قسانە هیچ پەیوەندییەکیان بە رۆشنبیریى سیاسی و دیموکراتیکەوە نییە.

ئەو کەسانەى دەیانەوێت لە رێگەى دەسەڵاتى ترسێنەر و تۆقێنەرەوە حکومڕانى بکەن، دەبێت ئەوە بزانن بە رێگایەکى هەڵەدا دەڕۆن.

هەدەپە بە ٦٧ پەرلەمانتارەوە چووەتە پەرلەمان و رێگاى نەدا هاوپەیمانیى ئاکەپە – مەهەپە دەستوورى بنەڕەتیى بەپێى ویستى خۆیان بگۆڕن. ئەنجامى هەڵبژاردن ئەوەى روون کردووەتەوە، کە هەدەپە لە زۆر شار و ناوچەدا دەتوانێت (لە هەڵبژاردنى شارەوانییەکاندا) شارەوانییەکان بەدەست بهێنێت و دەتوانێت دەسەڵات تێکبشکێنێت.

بۆ ئەوەى داڕمانى ئابووری و هەروەها درۆ و دەلەسەکانیان لە سیاسەتى دەرەوەدا بشارنەوە پەلامارى هەدەپە دەدەن، بەڵام گەلەکەمان ئەو کارانە پوچەڵ دەکاتەوە.

هەدەپە و دەنگدەرەکانى لە دژى هەڕەشە و کارەتێکدەرانەکان درێژە بە تێکۆشانى دیموکراسیانە و ئاشتاییانە دەدەن".

ر.م