پارتیی چه‌پ: پێویسته‌ حكوومه‌تی ئه‌ڵمانیا به‌كرده‌وه‌ هه‌وڵی هه‌ڵگرتنی گۆشه‌گیریی سه‌ر ئۆجالان بدات

په‌رله‌مانتارێكی پارتیی چه‌پی ئه‌ڵمانیا ڕایگه‌یاند، پێویسته‌ حكوومه‌تی ئه‌ڵمانیا له‌پێناو كۆتایی هێنان به‌ گۆشه‌گیریی سه‌ر ئۆجالان هه‌وڵه‌كانی خۆی به‌كرده‌وه‌ بخاته‌گه‌ڕ.

به‌ر له‌ چه‌ند ڕۆژێك گۆشه‌گیریی سه‌ر ڕێبه‌ری گه‌لی كورد عه‌بدوڵا ئۆجالان بوو به‌ ڕۆژه‌ڤی په‌رله‌مانی فیدڕاڵی ئه‌ڵمانیا. پارتیی چه‌پ بۆ ئه‌وه‌ی هه‌ڵوێستی حكوومه‌تی فیدڕاڵ و سه‌رۆك وه‌زیر ئه‌نگێلا مێركڵ ده‌رباره‌ی گۆشه‌گیری بزانێت، پرسیارنامه‌یه‌كی پێشكه‌ش كرد.

دوای ئه‌و هه‌نگاوه‌ی پارتیی چه‌پ، ڕاوێژكاری وه‌زیری ده‌ره‌وه‌ی ئه‌ڵمانیا ڕایگه‌یاند، پێویسته‌ ئۆجالان بتوانێت پارێزه‌ر و خانه‌واده‌كه‌ی به‌ڕێكوپێكی ببینێت. میشائیل رۆت به‌ ناوی حكوومه‌تی ئه‌ڵمانیا ڕایگه‌یاند، حكوومه‌تی توركیا كه‌ په‌یمانه‌ نێوده‌وڵه‌تییه‌كانی ئیمزا كردووه‌، پێویسته‌ كۆتایی به‌ گۆشه‌گیریی تووندی سه‌ر ئیمڕاڵی بێنێت و ئۆجالان بتوانێت چاوپێكه‌وتن له‌گه‌ڵ پارێزه‌ران و خانه‌واده‌كه‌ی بكات.

په‌رله‌مانتاری پارتیی چه‌پ له‌ په‌رله‌مانی ئه‌ڵمانیای فیدڕاڵ گۆكای ئاكبوولووت پشتیوانی له‌و هه‌ڵوێسته‌ی حكوومه‌تی ئه‌ڵمانیا كرد و ڕایگه‌یاند، «چاوه‌ڕوانی لێدوانێكی وه‌ها بووین له‌ لایه‌ن حكوومه‌ته‌كه‌ی مێركڵ، دوای ئه‌م لێدوانه‌ش چاوه‌ڕوانین كه‌ به‌كرده‌وه‌ هه‌نگاو بنێن بۆ كۆتایی هێنان به‌ گۆشه‌گیری.»

s.m