په‌رله‌مانتاری فراكسیۆنی سه‌وزه‌كان له په‌رله‌مانی ئه‌ورووپا ژۆن له‌مبه‌رت ڕایگه‌یاند، پێویسته به‌زووترین كات ئۆجالان ئازاد بكرێت كه ماوه‌ی ٢٠ ساڵه به‌شێوه‌یه‌كی ناحقووقی له ئیمڕاڵی به‌ند كراوه.
دیداره‌كانی هاوسه‌رۆكی كۆنگره‌ی نه‌ته‌وه‌یی كوردستان (كه‌نه‌كه) نیلۆفه‌ر كۆچ و به‌ڕێوه‌به‌ری ناوه‌ندی لێكۆڵینه‌وه‌ی كورد له له‌نده‌ن عه‌لی گیول ئۆزبه‌ك له په‌رله‌مانی ئه‌ورووپا به‌رده‌وامن. كۆچ و ئۆزبه‌ك له برۆكسل له‌گه‌ڵ په‌رله‌مانتاری به‌ریتانیی فراكسیۆنی سه‌وزه‌كان له په‌رله‌مانی ئه‌ورووپا ژۆن له‌مبه‌رت كۆبوونه‌وه.
نیلۆفه‌ر كۆچ ڕایگه‌یاند، له دیداره‌كه‌یاندا له‌سه‌ر ڕووداوه سیاسییه‌كان قسه‌یان كردووه و سه‌رنجیان خستووه‌ته سه‌ر دۆخی توركیا، سووریا، عێراق و ئێران. گوتیشی، سه‌ردانی په‌رله‌مانتارانی په‌رله‌مانی ئه‌ورووپا بۆ ڕۆژاڤا به‌رده‌وام ده‌بێت.
هاوكات عه‌لی گیول ئۆزبه‌ك سه‌رنجی خسته سه‌ر هه‌ڵبژاردنی خۆجێیی له باكووری كوردستان و توركیا و ڕایگه‌یاند، پێویسته په‌رله‌مانی ئه‌ورووپا له دژی ڕێكاره دژه‌دیموكراتی و ناحقووقییه‌كان له توركیا كار بكات.
«چه‌ندین ساڵه پشتگیری له دۆزی مافه‌كانی گه‌لی كورد ده‌كه‌م»
دوای كۆبوونه‌وه‌كه، ژۆن له‌مبه‌رت په‌رله‌مانتاری فراكسیۆنی سه‌وزه‌كان له په‌رله‌مانی ئه‌ورووپا بۆ ئاژانسی هه‌واڵی فورات (ANF) دوا و ئاماژه‌ی بۆ ئه‌وه كرد كه ئازادی، ئاشتی و دیموكراتیی ئۆجالان شتێكی وه‌هایه كه ده‌ستی لێ به‌رنه‌درێت. به ئازادبوونی ئۆجالان ده‌توانێت ڕۆڵی گرینگ بگێرێت له دانوستانی ئاشتی.
ژۆن له‌مبه‌رت ڕایگه‌یاند، ئه‌و پشتگیری له دۆزی گه‌لی كورد ده‌كات و پێشتر ده‌یان جار سه‌ردانی كوردستانی كردووه.
له‌مبه‌رت ڕایگه‌یاند: «بۆ ئه‌وه‌ی گه‌لی كورد و ڕێبه‌ره‌كه‌یان ئۆجالان كه له‌پێناو ئازادی، دیموكراتی و ئاشتی تێده‌كۆشن، له‌نێو هه‌لومه‌رجی یه‌كساندا سه‌رله‌نوێ ده‌ست به دانوستان بكه‌ن، پێویسته به‌په‌له ڕێبه‌ری گه‌لی كورد عه‌بدوڵا ئۆجالان كه ٢٠ ساڵه به‌شێوه‌یه‌كی ناحقووقی له ئیمڕاڵی به‌ند كراوه، ئازاد بكرێت.»
s.m
