کەجەدەکە ئەوروپا بۆ 'کۆبوونەوەی گەلان' لە ماستریخت بانگەوازێکی بڵاوکردەوە

کۆنگرەى کۆمەڵگەى دیموکراتیکى کوردستانیان لە ئەوروپا رایگەیاند، "لەدژی هێرشە فاشیستەکانی ئاکەپە و مەهەپە بەرامبەر ڕۆژئاوا و باشووری کوردستان و ڕژێمی قەیوم، بانگ لە هەمووان دەکەین لە کۆبوونەوەى گەلان لە ماستریخت دەنگیان بەرزبکەنەوە."

ڕاگەیەندراوەی دیوانی هاوسەرۆکایەتیی کۆنگرەى کۆمەڵگەى دیموکراتیکى کوردستانیان لە ئەوروپا (کەجەدەکە ئەوروپا / KCDK-E) بەم شیوەیەیە:

"گەل و بەشەکانی کۆمەڵگا کە لە ڕابردوودا یەکتریان نەدەناسی، لەدژی یەکتری بوون و نەیاندەتوانی لەژێر کاریگەریی سیاسەتی قڕکەر خۆیان ڕزگار بکەن، بەڵام لە ئێستادا دەستیان بە ناسینی یەکتری و خۆنزیککردنەوە لەیەکتری کردووە و بەیەکەوە تێدەکۆشن. گەلەکەمان لە دژی فاشیزم بە دروشمی دیموکراسی لە دەوری یەکتری کۆبوونەوەتەوە، نەک تەنها ژیانێکی دیموکراتیکیان خوڵقاندووە، بەڵکو ڕژێمی فاشیستیی ئاکەپە – مەهەپەیان بەرەو لەناوچوون بردووە.

بە حسابی خۆیان بە بڕیاری ئەنجوومەنی ئاسایشى نەتەوەیى (مەگەکە - MGK) لە ٣٠ی تشرینی یەکەمی ٢٠١٤ / ٨ی گەڵاڕێزان دا تەڤگەری ئازادیی گەلی کورد و سیاسەتی دیموکراتیکیان لەناودەبرد. پلانی هێرشی گشتی، کە دەوڵەتی تورک لە چوارچێوەی بڕیارەکەدا دابووی تا ئێستاش بەردەوامە. بە تێکبردنی ئیرادەی کوردان و هەڵوەشاندنی شارە کوردییەکان، هەوڵیاندا کوردستانی داگیرکراو  جارێکیتر داگیر بکەن. گەلەکەمان لە شەرت و مەرجێکی نادیموکراتیانەدا لە هەڵبژاردنەکاندا، شارەوانییەکانی بە شێوەیەکی سەربەز هەڵبژارد. بەڵام دەستیان بەسەر شارەوانیەکانیشدا گرت. پلانی چاکسازیى رۆژهەڵات (شارک ئیسلاحات)ی ساڵی ١٩٢٥یان نوێکردەوە. بە دامەزراندنی پارێزگاری داگیرکەر، دەستیان بەسەر ئیرادەی گەلدا گرت. لە هەڵبژاردنەکانی ئەستونبوڵدا گەلی کورد گورزێکی کاریگەرییان لە فاشیزمی ئاکەپە – مەهەپەدا. ئەمەش بوو بە هیوایەک بۆ هێزە دیموکراتەکان. سەرکەوتنی هەڵبژاردنەکان بە شێوەیەکی ستراتیژی ترسی فاشیزمی لەسەر گەلانی تورکیا نەهێشت و ڕۆشنبیران، نووسەران، ئۆپۆزسیۆن و کەسایەتیە ئایینیەکان، ژنان و سیاسەتمەداران پشتڕاست بوونەوە، کە دەتوانن بە تێکۆشان سەربکەون.

لە رێگەی قەیومەوە، داگیرکەریەکەیان نیشان دەدەنەوە

ڕژێمی ئاکەپە – مەهەپە دەترسن هەموو بەشەکانی کۆمەڵگا، کە قوربانی فاشیزمن لە دەوری یەکتری کۆببنەوە. هەوڵ دەدات بەم پیلانانە لەسەر دەسەڵات بمێنێتەوە. ئەو کوردانەی خۆیان رێکخستووە و خاوەنی بیر و هزری ژیانی ئازاد و دیموکراتن، لە لایەن دەوڵەتەوە سەد ساڵە وەک لەمپەڕ لەپێش سیاسەتی (ژیۆ – ستراتیژیک) دەبینرێن. بۆیە لە ڕێگەی تەنها هێشتنی کوردانەوە، هەوڵیاندا دیموکراسی لەناو ببەن. بەو هۆیەشەوە لە ١٩ی ئابی ٢٠١٩ / ٢٨ی گەلاوێژ قەیومیان لەشوێنی هاوسەرۆکی گەورە شارەوانیەکانی ئامەد، مێردین و وان دانا و جارێکێ تر داگیرکەریەکەیان نیشان دایەوە.

ڕژێمی فاشیستیی قەیوم جارێکی تر بە دەستبەسەرداگرتنی ئیرادەی گەلی کورد لە پاسوور و قەرەیازی هەوڵی دا خۆی لەسەر پێ بگرێت. وەک هەموو کۆمەڵکوژی و قڕکردنەکانی جارێکی تر بە درۆ و فێڵ جووڵایەوە. هەوڵ دەدات یاری بە عەقڵی گەلەکەمان بکات. بە تێکدانی حەساسیەتی کۆمەڵگا هەوڵی ڕەشکردنی هەدەپە دەدات. کۆمەڵگا لە دژی یەک بەکاردەهێنێت و هەوڵ دەدات لەسەر دەسەڵات بمێنێت و کوردانیش قڕ دەکات. بەڵام بە پشتگیریی گەلەکەمان و هێزە دیموکراتەکانی تورکیا، لە ئامەد، مێردین و وان، بە بەرخۆدانی گەورە ڕژێم تێکچووە و بە هۆیەشەوە هەوڵ دەدات بە هێرشێکی گشتی ئەنجام بەدەستبهێنێت.

تێکۆشانی گەلان لە چوارجێوەی نەتەوەی دیموکراتیک بەردەوامە

کۆنگرەى کۆمەڵگەى دیموکراتیکى کوردستانیان لە ئەوروپا (کەجەدەکە ئەوروپا / KCDK-E) لە ڕاگەیەندراوەکەیدا باسی سیاسەتی داگیرکەریی دەوڵەتی تورک لەدژی ڕۆژئاوای کوردستانیش دەکات و دەڵیت، "دەولەتی تورک زۆر هەوڵیدا ڕۆژئاوا داگیربکات و ببێتە دەسەلات، بەڵام سەرنەکەوت.

کورد، عەرەب، ئاشووری – سوریانی – ئەرمەنی، چیچان، چەرکەز، تورکمان، موسوڵمان، عەلەوی، کریستیان و ئێزدی و ژن هەموویان لە چوارچێوەی نەتەوەی دیموکراتیکدا لە دەوری یەکتری کۆبوونەتەوە و بەیەکەوە بۆ داهاتووی خۆیان تێدەکۆشن.

دەوڵەتی داگیرکەر بە سیاسەتەکانی بەرامبەر ڕۆژئاوای کوردستان، هەوڵدەدات لە باشووری کوردستانیش ئامانجە داگیرکەرییەکانی جێبەجێبکات، بەڵام سەرناکەوێت.

ڕژێمی فاشیستی ئاکەپە – مەهەپە بە سیاسەتە قڕکەرەکانی لە تورکیا و ڕۆژهەڵاتی ناوەڕاست بووەتە هۆکاری شەڕ و نائارامی، گەلی کوردیش بە پەرسپەکتیڤ و رێنوێنیى نەتەوەی دیموکراتیکی عەبدوڵا ئۆجالان رێبەری گەلی کورد  و تێکۆشانەکەی، لە سوریا، ئێران و عێراق و تورکیا بووەتە هێزێ ئارامی. لە ئەوروپا و جیهانیش بووەتە هێزی بنەڕەتیی ئاشتی و دیموکراسی."

بانگەواز بۆ کۆبوونەوەی ماستریخت

"بانگەوازمان بۆ هەموو کەسێکە لەدژی کودەتای سیاسیی ئاکەپە – مەهەپە، لەدژی ئۆپەراسیۆنە قڕکەرەکانی سیاسی و قەیومەکان، بەیەکەوە تێبکۆشن و بەرخۆدان بکەن.

هەروەها داوا لە ژنان و گەنجان و هەموو گەلان دەکەین ٢١ی ئەیلولی ٢٠١٩ / ٣٠ی خەرمانان لە شاری ماستریخت-ی هۆڵەندا لە دەوری یەکتری کۆببەوە و ژیانێکی ئازاد بەیەکەوە بنیات بنێن.

ژ.ت