کۆمسیۆنەکێ باشووری پەی ئازادی زیندانیەکێ هەولێری و بادینانی دەستبەکارێ بیێ

کۆمسیۆنەکێ باشووری سەر بە (کەجەدەکە - ئەورووپا)ی، پەی ئازادی زیندانییە مەدەنیێ و سیاسییەکێ پانیشتو کوردستانی دەستبەکارێ بیێ و بانگەوازیشان دان و وازیارێنێ کوردێ و ئازادیوازێ پەشتیوانێ و هامکارێشان بانێ پەی فشار وستەی سەرو (پەدەکە)ی.

کۆمسیۆنەکێ باشووری سەر کۆنگرەو گلێرگەو دیمۆکراتی کوردی جە ئەورووپا کە بە (کەجەدەکە - ئە) ئەشناسیان، سەبارەت وەرتەستک کەردەی ئازادی و سەرکوت و دەستگیر و زیندانیکەردەی جە پانیشتو کوردستان بە تایبەتی جە هەولێر و بادینان بانگەوازیشان دان و بە کەردەیی جە بەرو وڵاتی دەستبەکارێ بیێ.

جە بانگەوازیەکەنە ئاماژە بە ئا بارودۆخە خراپەیە دریان کە جە باشورەنە هەن و ڕۆشنایی وزیان سەرو دەسەڵاتداریی سه‌رکوتکەر و پۆلیسیی (پەدەکە)ی جە هه‌ولێر و بادینان و دەستنیشان کریان: کۆمسیۆنەکێ باشووری سەر بە (کەجەدەکە - ئە)ی، جە ٢٠٢٠/١٠/٢٧یەوە بەکەردەیی پەی ئازادی ڕۆچنامەنویسێ و  چالاکوانێ و زیندانیێ سیاسیێ و خەڵکی ناڕازی پانیشتو کوردستانی بەگردیی و هەولێر و دهۆکی بە تایبەتی دەستەکارێ بیێنێ و جە وڵاتە جیێ جیێکێ ئەورووپای و جیهانی کار و خەبات و کۆشایشان دان دەستپنەکەردەی و جە ئی چوارچوەنە سەردای چەنڎین کۆنسوڵخانێ و سازیێ و ناوەندێ و دامودەستگایێ ئەورووپایێ و میاندەوڵەتیێشان کەردێنێ.

هەرپاسە دەستنیشان کریان: جە سەردایەکانە ئا لایەنێ جە بارودۆخەکەی هایدارێ کریێنێوە و دۆسیەکێ شێروان شێروانی و بەدەل بەرواری و سەرجەم دەستگیرکریێ و زیندانییە سیاسیەکێ باشوری درینێ پنەشان و سەرنج وزیان سەرو ناڕەزایەتی گلێرگەی مەدەنی جە باشوور  و ئەشکەنجە و هەڕەشێ و تەنانەت تیرۆرکەردەی خەڵکی ناڕازی و پنەوازی فشار وستەی سەرو (پەدەکە) پەی دمایی ئاوردەی بە ئا بارودۆخەیە.

کۆمسیۆنەکێ باشووری سەر کۆنگرەو گلێرگەو دیمۆکراتی کوردی جە ئەورووپا  (کەجەدەکە - ئە) جە بانگەوازیەکەشانە وازیارێ و داواکارێنێ، تا سەرجەم کوردێ ئەرەنیشتێ بەرو وڵاتی و دۆستێ و ئازادیوازێ و ئەنته‌رناسیۆنایستەکێ بشانە بەپیری بناگەوازیەکەیەوە و هامبەشانە و پێوەرە فشار بوزانە سەرو ناوەندە ئەورووپیێ و جیهانیەکان تا ئاڎێچێ فشار بوزانێ سەرو دەسەڵاتداری (پەدەکە)ی و داواش ونە بکەران، تا بەزوویی کۆتایی گەندەڵی و چەوەسانی گەلی، سەرکوت و وەرتەسک کەردەی ئازادی، دەستگیر و زیندانیکەردەی، تۆقانی و هەڕەشێ و کوشتوبڕی باوەرۆنە و سەرجەم دەستگیرکرێ و زیندانیکریێکێ دهۆکی و هەولێری ئازادێ بکەرۆنە.