کەناڵی تلگرامی سەندیکای کرێکاران ئەمڕۆ ڕایگەیاند، کە ژمارەیەک لە کرێکارانی خانەنشینی کارگەی 'هەفت تەپە'ی ئەهواز-ی سەربە پاریزگای خوزستان لە بەردەم کارگەکە چادریان هەڵداوە، هەرئەمڕۆ گردبوونەوەیەکی نارەزایی دژی دەستگیرکردنی کرێکاران بەڕێوەچوو.

کرێکاران چادریان هەڵداوە و ڕێگە نادەن قامیشی شەکر بڕواتە ناو کارگەکەوە لە ئەهواز.

هەروەها زیاتر لە مانگێکە، دوو نوێنەری کرێکاران و ڕۆژنامەنووسێک لە شارۆچکەی شوش-ی سەر بە ئەهواز لە پارێزگای خوزستان لەلایەن هێزە ئەمنییەکانەوە دەستگیرکراون، بۆ ئازادبوونیان کەسوکاریان گردبوونەوەیەکیان ئەنجامدا.

خانەوادەی کرێکارانی زیندانیی لە بەردەم دادگای شاری شوش-ی گردبوونەوە و داوای ئازادی کرێکارانیان کرد.

ئەوەش جاری یەکەم نییە کە کرێکارانی خانەنشینی کارگەکە خۆپێشاندان دەکەن، مانگێک لەمەوبەریش دیسان ئەو کەسانە گربوونەوە و داوای پاداشتی دوو ساڵی ڕابردوویان کردبوو کە پێیان نەدراوە.

هەر ئەمڕۆش لە چوارچێوەی ناڕەزایەتییەکانی گەلانی ئێران بەرامبەر سیاسەتەکانی دەوڵەت، دۆخی نالەباری ئابوری، ژیانی سەخت، بێکاری، هەژاری، هەروەها گرانبوونی شتومەک و گەندەڵی کاربەدەستان، لە چەند شوێنیکی ئێران چەند خۆپێشاندان بەڕێوەچووە.