جە هەورامان سەدان هکتارێ جە و جە زاگرۆس هەزاران هکتارێ دارستانێ سۆتێ

زیاتەر جە ٣٠٠ هکتارێ جە دارستانەکێ ”بورین و مەڕەخێڵ“ی کە ناوچێوی پارێزنیان و سەر بە پاوە-یەن ئێرشان گێرتەن و سۊتێنێ و جە ”زاگرۆس“ یچ ٨ شەوانە ڕوێن هەزاران هکتارێ جە دارستانەکان مەسۆچانێ.

سەرچەمەکێ هەواڵی جە هەورامانەوە ئاشکراشان کەرد:" دارستانەکێ ”بورین و مەڕەخێڵ“ی کە ناوچێوی پارێزنیان و سەر بە شارچەو باینگان-یەن جە شارستان (قەزا)و پاوە-ی، ئێرشان گێرتەت و سۆتێێنێ".
سەرچەمەکێ باس جە ئانەیە مەکەرانێ؛ بە هامکاری هاموڵاتیان ئایرەکە مەهار کریان، بەڵام زیاتەر جە ٣٠٠ هکتارێ جە دارستانەکان سۊتێنێ و زیانی فرەی ژیوگەیی بە ناوچەی پارێزنیاو ”بورین و مەڕەخێڵ“ی کەفتەن و تا ئیسە هۆکار و سەرچەمەو ئێرکەوتەکەی نەزانیان.

شارستانو پاوە-ی سەر بە هەرێمو هەورامانی جە دیمو وەرهۆرز (ڕۆژهەڵات) و کوردستانی، ٧٩ هەزار هکتارێ دارستانێ و جەنگەڵێ و باغێش هەنێ و یۆن جە سەرسەوزتەرین ناوچەکێ کوردستانی و ئێرانی.

جە لایێ تەرەوە، زیاتەر جە ٨ شەوانە ڕوێن، ڕووبەرێوی فراوان جە دارستانێ، جەنگەڵێ و لەوەڕگایەکێ زنجیرە کەشەکێ زاگرۆسی ئێرشان گێرتەن و هەزاران هکتارێ جە دارستانێ زیانشان پنە یاوان و سەدان جۆرێ جە ڕوەکێ و گیاندارێ زیانمەندێ بیێنێ و دلێنەشیێنێ. ئایرەکە تا ئیسە جە بەشێوە جە دارستانێ، جەنگەڵێ و لەوەڕگایەکێ پارێزگاکانو (کەهگیلویە و بویر ئەحمەد، خوزستان، بوشەهر، سنە، کرماشان و ئیلام)ی بەردەوامەن و کۆنترۆڵ نەکریان.
دەسەڵاتدارێ ئێرانی نەک بەجددی هەوڵ پەی کۆنترۆڵ کەردەی ئایرەکەی نەمەڎانێ، بەڵکو ئاستەنگیێ پەی هاموڵاتیان دروست مەکەرانێ کە بە وێبەخشانە گەرەکشانە ئێرەکە بکوشانێنەوە و دارێ و درەختێ و گیانەوەرێ دارستانەکان بپارێزنانە.