وەزارەتی بەرگری ئەمریکا ڕایگەیاند، ئێران بە ١٢ موشەک لە بارەگای عەین ئەسەدی و ئەربیلی دایەوە. جۆناسان هۆفمەن وتەبێژی پنتاگۆنیش لەبارەی بارودۆخەکە قسەیکرد و ڕایگەیاند:

"ئاشکرایە موشەکەکەیان لە ئێرانەوە ئاڕاستەکراون و ئامانجیان بارەگاکانی عەین ئەسەدی و ئەربیلن کە بارەگای ئەمریکا و هاوپەیمانانن. ئێمە لێکۆلینەوە لەسەر زیانەکان دەکەین. پنتاگۆن ئامادەکاری بۆ هێرشەکان کردبوو و هەردوو بارەگای سەربازیش بەرامبەر هێرشەکان ئامادەکاریان کردبوو.

سوپای پاسداران:ئەمریکا وڵامبداتەوە، هێرشی گەورەتر ئەنجامدەدەین

سوپای پاسداران لە ڕاگەیەنراوێکدا وتی، "ئەگەر ئەمریکا وڵامی هێرشەکان بداتەوە، بە بەهێزی و توندتر هێرش دەکەینەوە."

لە ڕاگەیەنراوەکەدا هاتووە، لە چوارچێوەی تۆڵەکردنەوەی قاسم سولەیمانیدا بە مووشەک بارەگای عەین ئەسەدی ئەمریکا کراوەتە ئامانج  و لە هەموو بارودۆخێکدا سەرچاوە هێرشبەرەکانی دوژمن دەبنە ئامانج. ئیسرائیلیش تاوانبارە و لە ئەمریکای جیاناکەیەنەوە."

سوپای پاسداران وتیشی، "ئەگەر لە ناو خاکەکەیاندا هێرش ئەنجامبدرێت. ئەوان لە دوبەی، ئیمارات و ئیسرائیلیش دەدەن."

ف.ق