دایكان لەو باوەڕەدان چەند ساڵێكە نەتەوەی كورد بۆ گەیشتن بەئازادی لەسێبەری حكومەتی هەرێمی باشوری كوردستاندا بەرەو لەناوچوون دەچن. دایكان دەڵێن داگیركەران چەندەش هەوڵبدەن ناتوانن گەلی كورد لەنێو ببەن؛ چونكە ئەم گەلە خاوەن ئێرادەیەكی پۆڵایینە.
فەتحیە عەلی یەكێك لە دایكانی ئاشتیە و زۆر پەڕۆشی داهاتووی گەل و وڵاتەكەیەتی. دایە فەتحیە هێرشە داگیركاریەكانی دەوڵەتی داگیركەری تورك لەبەرامبەر باشوری كوردستان ریسوا و شەرمەزار دەكات و داوا لەدەسەڵاتدارانی باشوری كوردستان دەكات كە لەمە زیاتر وڵاتەكەمان تاڵان نەكەن و نەیفرۆشن و رێگە بەهاتنە ناوەوەی داگیركەران بۆ نێوكوردستان نەدەن.
دایە فەتحیە لەوتووێژێكدا لەگەڵ ئاژانسی هەواڵی ژنها ئاماژەی بەهەوڵە داگیركاریەكان لەدژی خاكی كوردستان دەكات و جەخت لەسەر ئەوە دەكاتەوە كە دۆژمنان چاویان لەخاكی كوردستان بڕیووە و هەركاتەش هەندێ خۆفرۆشیش هەبوونە كە هاوكاری دۆژمنیان كردوە بۆ شكاندنی سنورەكان و داگیركردنی خاكی كوردستان.
دایە فەتحیە ئاماژەی بەو كردوە كە لەمانگی گۆڵاندا چەندین كۆمەڵكۆژی لەوانە؛ ئەنفاڵ، كۆمەڵكۆژی هەڵەبجە و بارزان پێكهاتوون و بەزۆربوونی هەوڵە داگیركاریەكان لەدووبارەبوونەوەی ئەم كۆمەڵكۆژیانە دەترسن. تا ئێستاكە برینەكانمان ساڕێژ نەبوون، بەڵام ئێستاكەش چاومان لێیە كە دەیانەوێت وڵات و گەلەكەمان لەناو ببەن. بەدەیان شۆڕشمان كردوە و شەهیدی زۆرمان داوە، تا ئەم نیمچە ئازادیەی ئێستا بەدەست بخەین، بەڵام بەهۆی پەدەكەوە ئەو نیمچە ئازادیەش لەمەترسیدایە.
دایە فەتحیە هێرشەكانی دەوڵەتی تورك و پشتیوانیەكانی پەدەكە لەو داگیركاریانە ریسوا و شەرمەزار دەكات و دەڵێت:"پەدەكە بەم كارەی خەیانەتێكی نیشتیمانی دەكات و دەبێت هێز و لایەنە كوردیەكانی تریش لەبەرامبەر بەم داگیركاریانەی ئێستا خاوەن هەڵوێستی جددی بن".
دایە فەتحیە ئاماژەی بەو گەریلایانەش كرد كە لەباشوری كوردستانەوە بەشداری ریزەكانی بەرخۆدان بوونە دەكات و جەخت لەسەر پێویستی كاردانەوەی و بەرخۆدانی هاوڵاتیانی باشوری كوردستان دەكات و دەڵێت:"هەرچەندەش بەدرێژایی مێژوو دۆژمنان و داگیركەران هەوڵیانداوە گەلی كورد لەناو ببەن، بەڵام هەوڵەكانیان بێ ئەنجام بووە، لەبەر ئەوەی كە گەلەكەمان خاوەن ئێرادەیەكی بەهێزە. بەڵام لەئێستاكە باشوری كوردستان بەهۆی ئەم حكومەتە بەرژەوەندیخواز و پاڵپشتیكەرەی داگیركەران، گەنجانی كورد هەموو بێكارن و بەقووڵكردنەوەی رێژەی فەقیری هەوڵیانداوە هەستی نەتەوەیی گەنجان لەناو بەرن.
'شەڕی ناوخۆ لەبەرژەوەندی دۆژمنە'
كاتێك داعش هێرشی كردە سەر هەرێمی كەركوك، پێشمەرگە و گەریلا شانبەشانی یەكدی شەڕی ئەو گروپە چەتانەیان كرد. دایە فەتحیە دەڵێت:"ئێستاكە حكومەتی هەرێمی باشوری كوردستان و پەدەكە هەوڵدەدەن گەیلاكان و پێشمەرگە رووبەرووی یەكدی بكەنەوە و داواش لەپێشمەرگەكان دەكەم، بەو هەوڵە نەزۆكانە هەڵنەخەڵەتێن و رووبەرووی برا و خۆشكە گەریلاكانیان نەوەستنەوە و رووی چەكەكانیان لەداگیركەران بكەن و یەكگرتوو بن".
فەتحیە عەلی دەڵێت؛ پەدەكە دەبێت بزانێت كە ئەگەر گەریلاكان لەو چیانە نەمێنن ئەوا ئەردۆغان پەدەكە لەنێو دەبات، لەبەر ئەوەی ئامانجی راستەقینەی دەوڵەتی داگیركەری تورك داگیركردنی هەموو كوردستان و لەناوبردنی گەلی كوردە بەم بۆنەوە دەبێت پەدەكە بەخۆیدا بچێتەوە و دژ بەشەڕی ناوخۆی لەنێو كورداندا بێت.
لەسەر بێدەنگی گەل لەباشوری كوردستان فەتحیە دەڵێت:"هاوڵاتیان بێدەنگ نەبوون، بەڵكۆ ئەوانیان ناچار بەبێدەنگی كردوە. دەڵێن ئەگەر حكومەت بێدەنگ بێت ئێمە چی بكەین و چی لەدەستمان دێ. بەڵام دەبێت هاوڵاتیان بزانن كە دەنگی گەل دۆژمن بەزێنە. حكومەت و رایەدارانی باشوری كوردستان لەبەر بەرژەوەندیەكانی خۆیان بێدەنگن و تەنانەت رێگەشیان بۆ دۆژمن خۆش كردوە. ئەگەر حكومەتی هەرێم ئەگەر بەتەنیا هاوكاریەكانی بۆ داگیركەران راوەستنێت و بێدەنگیش بێت، ئەوا داگیركەران ناتوانن بگەێننە ئامانجەكانیان و سەرناكەون.
دایە فەتحیە، خۆشكی شەهید و یەكێك لەدایكانی ئاشتی ئاماژە بە رۆڵی ژنان لەبەرامبەر بەداگیركاری دەكات و دەڵێت:"ژنانی كورد لەبەشەكانی تری كوردستان، باكور و رۆژئاوا لەدژی داگیركاری هەنۆكەیی دەوڵەتی توركی داگیركەر زۆر قۆربانیانداوەو تێكۆشانی مەزن بەرێوە دەبەن، بەڵام ژنان لەباشوری كوردستان بێدەنگن و دەڵێت:"دایكانی باكور و رۆژئاوای كوردستان"گیان لەسەردەست ئامادەی پاراستن و پشتیوانین لەژنان و خاكی باشوری كوردستان، بەم بۆنەوە دەبێت ژنانی باشوری كوردستانیش ئەزموونەكانی ئەوان لەتێكۆشاندا بۆخۆیان بەبنەما بگرن و خۆیان بەرێكخستن و لەدژی داگیركەران تێكۆشان بكەن. ئەردۆغان لەسەر هەوڵە داگیركاریەكانی راناوەستێت و هەوڵدەدات، كەركوك و موسڵیش داگیر بكات، بۆیەش لەسەر ژنان و گەنجانە خاوەن هەڵوێست بن و بەدەنگی ناڕەزایەتیان لەدژی داگیركەری تێكۆشان بكەن.
هـ . ب
