دوای نیوەڕۆی دوێنی لەسەر بانگەوازی کۆلەکتیڤی ژن ژیان ئازادی بۆ جاری دووەم لە شاری لەندەنی پایتەختی بەریتانیا رەوندی کوردی و دۆستانی کورد بەشدارییان لە خۆپیشاندانێکی جەماوەریدا بۆ پشتیوانی شۆڕشی ژن، ژیان، ئازادی کرد.

‎خۆپیشاندەران لە شەقامەکانی لەندەن بە بەرزکردنەوەی ژمارەیەک پۆستەر و لافیتە و وتنەوەی دروشم پشتیوانییان لە شۆڕشی ژن، ژیان، ئازادی لە رۆژهەڵاتی کوردستان و ئێران دەکرد. هاوکات داوای ئازادیی گیراوانی سیاسیان دەکرد و سەپاندنی سزای لەسێدارەدانیان بەسەر خۆپیشاندەراندا ئیدانە کرد.

‎خۆپیشاندەران لە بەردەم کەناڵی بی بی سی تا سەنتەری تەلەگراف سکوێر ڕۆیشتن و بە بەردەوامی لە شەقامەکاندا دروشمی ژن ژیان ئازادی-یان دەوتەوە.

نەتەوە جیاوازەکانی ئێران وەک بەلوچ، عەرەبی ئەهواز، کورد و فارس بەشدارییان لە خۆپیشاندانەکەدا کرد و ئەو نەتەوانە و چەند چالاکوانێکی فمینیست و مرۆڤی ئازادیخواز بە زمانی ئینگلیزی، دژی سەرکوتکارییەکانی کۆماری ئیسلامی ئیران ڕاگەیاندراویان خوێندەوە و وتەیان پێشکەش کرد و سیاسەتی نادیموکراتیانەی ئیرانیان بەرامبەر بە کورد و گەلانی تری ئێران شەرمەزار کرد.

‎چالاکوانان بە دروشمەکانی 'ژن، ژیان، ئازادی' ، 'ئازادی بۆ گیراوانی سیاسی کورد لە ئیران'، 'شەهید نامرن'، 'بژی ڕێبەر ئاپۆ'  دوای سێ کاتژمێر لە خۆپیشاندان و گردبونەوە کۆتاییان بە چالاکیەکەیان هێنا.

ژ.ت