پەدەکە و تورکیا و ئێراق خەریکێ چێشیەنێ

بە هەماهەنگی پەدەکە و ئێراق و تورکیای دەربازەی سنوری (ئۆڤاکۆی) کە خاڵەو پنەیاوای یەرێ سنورێ باشور، باکور و ڕۆژاڤاو کوردستانین بکریۆوە و هاموەخت چەنڎین دەڤەرێ و دەگایێ سورچیایەتی، سۆرانی و پەنگاوو پێخمەی تەسلیمێ بە تورکیای بکریانێ

ئەگەر جە ویەردەنە پەدەکە بەنهێنی و ئەوەشاریای و شەرمەوە و جە تاریکیەنە پەی ئەرەگێرتەی پانیشتو وڵاتی (باشورو کوردستانی) هامکاری ڕژێمە ئەرەگێرەکەو تورکیایش کەردەبۆنە، ئانە ئارۆ بە ئاشکرا و بەڕۆچی ڕۆشن و بەبێ پەروا و بەبێ شەرم ئا هەمکاریەیە پێشکەش مەکەرۆن.
جە ئی بارەوە زانیاریێ وردێ  و یاگێ باوەڕی یاوێنێ ئاژانسەکەمان فوڕات نیوز (ئانەفە-ANF) و پەلیانەو تەڤدا پرێس-ی. بە پاو زانیاریەکان، پەی دژایەتیکەردەی جمیەرو ئازادی کوردی و زیاتەر تەسلیمکەردەی پانیشتو وڵاتی بە دوژمنی ئەرەگێری و جە هەنتری ئەوەبڕیەی بەشەکێ کوردستانی، دەروازەی سنوری ئۆڤاکۆی کە خاڵەو پنەیاوای یەرێ سنورێ باشور، باکور و ڕۆژاڤاو کوردستانین، بکریۆنەوە و هامکات چەنڎین دەڤەرێ و دەگایێ سورچیایەتی، سۆرانی و پەنگاوو پێخمەی تەسلیمێ بە تورکیای بکریانێ.

سەبارەت بە دەروازە سنوریەکەی ئانەفە وەڵاوش کەردەنەوە: دمای ئانەیە جە ٩ ئی مانگۍ بەبێ بەشداری شەنگالیەکان، میانو حکومەتو ناوەندی ئێراقی و پەدەکە-یەنە، ڕێککەوتێو سەبارەت بە ڕاوەبەردەی شەنگالی ئیمزا کریا کە بەشێوازێ جە شێوازەکان تەسلیم کەردەی شەنگالی بێ بە حکومەتی ناوەندی ئێراقی، هەڵبەتە بەبێ وەرچەمگێرتەی ئیرادەو شەنگالیەکان، جە ئیسەنە بەرکەوتەن کە ڕێککەوتەکەی فراوانتەرەن جە ئانەیە کە تەنیا بە شەنگالی و دەوروبەریشەوە سنوردار بمانۆوە و ئاشکرا بییەن؛ چێر بەچێر ئێراق، تورکیا و پەدەکە بە موبارەکبایی ئەمەریکای و نەتەوە یۆگێرتەکان، (لۆزان)ێوی تازەشان ئیمزا کەردەۆ کە سەرجەنۊ سنورەکێ میساقی میللیی تورکەکان تۆخێ و زینڎێ بکەرۆنەوە.
جەی ئی چوارچێوەنە، ڕژێمە ئەرەگێرەکەو تورکیای بە هامکاری پەدەکە-ی و حکومەتو ئێراقی هەنگامەی یەکەمەشان جە هەرێمو شەنگال نیێ بێ بە ئا ئامانجە جمیەری ئازادی و ئێزیدیەکێ جە هەرێمەکەنە پەراوێژێ بوزیانێ و بێکاریگەرێ بکریانێ و جە شەنگالەوە زەمینە پەی نیای هەنگامەی دووەمێ بنریۆنە. هەر دمابەدمای ڕێککەوتەکەی، یەکسەر هەنگامەی دووەمەیچ نریا و بە پاو ئا هەنگامێ، جە یاگێوەنە بەنامێ (ئۆڤاکۆی) کە خاڵەو پنەیاوای یەرێ سنورێ باشور، باکور و ڕۆژاڤاو کوردستانیەنە، دەروازێوی سنوری میانو ئێراقی و توریایەنە بکریۆنەوە.
هەنگامەکێ جەلاو سەرۆکایەتیی وەڵێبەردەی ستراتیژیی سەر بەوەزارەتو بەروو تورکیایەوە چوون پڕۆژێوی ستراتیژی کارش سەر مەکریۆن و ئامانج چنەش جە هەنتری ئەوەبڕیەی هەر یەرێ بەشێ کوردستانی یانی باکور، باشور و ڕۆژاڤایەن.
ڕژێمو تورکیای جە ساڵەو ٢٠١٧ی و جە دمای ڕفڕاندۆمەکەو پانیشتو کوردستانی، نەخشەو ئا دەروازە سنوریەیشە متێ بێرە و جە ٢١٨نە حەیدەر عەبادی سەرۆککوەزیرانو وەختو ئێراقی پەی هەمان مەبەستی سەردای تورکیایش کەردەبێ. پاسە پیلانش پەی کریان، ئەگەر دەربازەکە بکریۆوە، ئاوەختە سنوورو خاپور (ئیبراهیم خەلیل)ی بێکاریگەر بکریۆنە و دەرەنجام جە دوور مەودانە بوزیۆرە. بڕیارە ئیتر جەی دوما خەتەو بازرگانی جە (ئۆڤاکۆی)ـەوە دەست پنەبکەرۆنە و بە دەربازنەبییەی بە دهۆک-ـەرە یەکسەر بلۆوە وەرهۆرزو شەنگالی و دماتەر تا تەلعەفەر، موسڵ، تکریت، سامەڕا و بەغداد و بەسرە، درێژە ببۆوە.

هەڵبەتە بە نزیکبییەی جە ١٠٠هەمین ساڵەو پەیمانامەی لۆزان-ی، ڕژێمو تورکیا تەنها خەیاڵ و وەرمش زینڎەکەردەی میساقی میللین کە ئەرەگێرتەی موسڵی و کەرکوکی و ئەوەبڕیەی ڕۆژاڤا و باشوری جەوێش مەگێرۆنە. ئەوەکەردەی دەروازە سنوریەکەو ئۆڤاکۆی بەشێن جە بەدیئاوردەی ئا خەیاڵ و وەرمیە و جە دەروازەکەوە تا شەنگال، تەلعەفەر، موسڵ، تکریت و بەغداد، خەتەو شەمەندەفەری و ئوتوبان دروستێ بکریانێ و تەلعەفەری تورکوماننشین ببۆنە بە دلێڕاسی پڕۆژە و پیلانەکەی. شۆنیشەرە گوایا پەی پارێزنای ئاساییش و ئەمنیەتو ئا خەتە بازرگانیێ، جەسنورەکێ ڕۆژاڤای و باشوریەنە خەندەق بدریانێ ونە و دیوارێ و خاڵێ و بنکێ چەمداریێ و سەربازیێ دروستێ بکریانێ و بە ئاشێوازە بە یەکجاری ئا دووە بەشەو کوردستانی جە هەنتری ببڕیانێرە. 
هەرپاسە کە وەڵتەر ڕژێمو تورکیای جە سنورەکێ ڕۆژهەڵاتی و باکوریەنە ١٣٩ کیلۆمەترێ و جە سنورەکێ باکوری و ڕۆژاڤایەنە ٨٣٢ کیلۆمەترێ دیوار و دەیان سەربازگێ و سەدان خاڵێ و بنکێ چەمداریش دروست کەردێنێ، هەمان چێویچ جە میانو باشوری و ڕۆژائاڤایەنە دووبارە بکەرۆنەوە.

جەلایێ تەرەوە پەلیانەو (تەڤدا پرێس)ی وەڵاوش کەردەنەوە: جەدمای شکست و مەڕیای سپا ئەرەگێرەکەو تورکیای جە هەفتانین، چەنڎین هەفتێن پەدەکە کەوتنە پیلان ئەرەمتەی پەی پەلکێشکەردەی زیاتەرو سپا بەزیاکەو تورکیای پەی قوڵایی هەرێمو کوردستانی و جە ئا چوارچێوەنە هێزە چەکدارەکێ پەدەکەی جە بەرزایەکێ و دەگایەکێ دەڤەرەکێ سورچیایەتی و سۆرانی و پەنگاوو بێخمەی مەرزیێنێرە و بڕیارە دماتەر ئا یاگا تەسلیمێ سپاو تورکیای بکەرانێ. 
بە پاو زانیارەکێ تەڤدا پرێسی، ئا شۆن و یاگێ کە بڕیارەن تەسلیمێ تورکیای بکریانێ بریتیێنێ جە، چەندین بەرزایێ و کەشێ سورچیاتی، سۆرانی، سەرنیشتو خەلیفانی، سپیلک، پەنگاوو پێخمەی و ڕاو بلە و بارزانی، هەرپاسە دەگایەکێ، (گۆڕەز، جۆنەر، کانی کولك، کنەك، خەلان، بەورکان، سرێشمە، ساوا و هەنار)ی و جە سەرجەم ئا یاگانە چەکدارەکێ پەدەکەی وەڵاوێ بیێنێوە و بازگێشان نیێنێرە. هامکات بە پاسەوانی هێزەکێ پەدەکەی، هێزەکێ تورکیای سەرقاڵێ دروستکەردەی بنکێ و بارەگایێ سەربازیێنێ.
تەڤدا پرێس زانیاری زیاتەرش دان و دەستنیشاش کەردەن: تا ئیسە دووێ لیوێ چەکدارێ پەدەکەی برینێ ئا شۆن و یاگێ کە نامێشان بریێنێ و بڕیارەن لیوایێوە تەرە پەیوەستو دووە لیواکەی ببۆنە. هامتەریب چەنی ئانەیە، هێزەکێ پەدەکەی و تورکیا دەستشان دان تۆقنای ژەن و زارۆڵەی و دەستگیرکەردەی خەڵکی مەدەنی و ئاستەنگی دروستکەردەی پێشان.