کۆنسەی سەرۆکایەتی گشتی کەجەکە یادی شەهید دیار غەریبی کردەوە

کۆنسەی سەرۆکایەتی گشتی کەجەکە رایگەیاند، لە یەکەمین ساڵیادی شەهیدبوونی هاوڕێ هەڵمەتدا، کوردستان لە هەموو کات زیاتر پێویستی بە پێشەنگی شۆڕشگێری وەکو هەڵمەت و زین و قاسم هەیە.

کۆنسەی سەرۆکایەتی گشتی کەجەکە لە راگەێنراوێکدا شەهید دیار غەریب (هەڵمەت) ئەندامی کۆنسەی سەرۆکایەتی گشتی کەجەکەی بەبیر هێنایەوە کە لە ٥ی تەموزی ساڵی ٢٠١٩ لە ئەنجامی هێرشێکی ئاسمانیدا شەهید بوو. لە راگەێنراوەکەدا ئاماژە بەوەکرا کە، بۆ ئەوەی گەلی کورد راستی خۆی و راستی دوژمنی داگیرکەر بناسێت، هەڤاڵ هەڵمەت لە بواری ئایدولوجی، پەروەردە و ئەکادیمی و هاوکات لە رووی پراتیک و سیاسیشدا، هەوڵێکی زۆریدا.

لە راگەیێنراوەکەی کۆنسەی سەرۆکایەتی گشتی کەجەکەدا هاتووە:

"لە یەکەمین ساڵیادی شەهیدبوونی دیار غەریب ئەندامی کۆنسەکەمان، ئێمە جارێکی دیکە یادی ئەو پێشەنگەی پارتەکەمان دەکەینەوە. بە رێز و حورمەتەوە خۆمان لە بەرامبەر هەموو شەهیدانی تێکۆشانی ئازادی دەچەمێنینەوە. لە کەسایەتی هەڤاڵ هەڵمەتدا، وابەستەبوونی خۆمان بۆ هێڵی ئازادی جارێکی دیکە دووپات دەکەینەوە. لەم کاتەدا کە هێرشەکانی دەوڵەتی فاشیستی تورک لە بەرامبەر شکۆمەندیەکانی گەلەکەمان لە هەموو کات زیاتر پەرەیان سەندووە، دوو هاوڕێی دیکەی هێژا و پێشەنگمان، قاسم ئەنگین و زین ئاڤێستامان لە دەستدا. ئەو دوو هاوڕیەمان کە ئەندامی بەڕێوەبەرایەتی پەکەکە بوون، میراسێکی پیرۆزیان لە دوای خۆیان بەجێهێشت. ئێمە وەکو هاوڕێکانیان لەم دۆزەدا، لە کەسایەتی ئەو دوو هەڤاڵەدا بەڵێن دەدەین کە هەر جۆرە هێرشێک لە دژی راستی کورد ئەنجام بدرێت، تێکی دەشکێنین. کوردستانێکی ئازاد و هەرێمێکی دیمۆکراتیک کە ئاواتی هەموو هەڤاڵە شەهیدەکانمان بوون، بێگومان مسۆگەر دەکەین.

'سەرکەوتنی بیردۆزیی ئازادی مسۆگەر دەبێت'

لە فەلسەفەی تێکۆشانی بزوتنەوەی ئاپۆییدا، شەهید لە بەرزترین ئاستدا نوێنەرایەتی راستیەکان دەکەن و گەورەترین نرخن. چونکە شەهید بە رەنج و فیداکاری و خوێنی خۆی بووەتە پارێزەرێکی نەمری وڵات و ژیانی ئازاد. شەهیدان لەگەڵ نرخە مێژوویەکانی گەلی کورد بوونەتە یەک و سیمبوولی پێداگری گەلن بۆ سەرخۆبوون و ئازادی. بۆیە رێبەر ئاپۆ، شەهید وەکو رێبەری مەعنەوی و یەکەکەش وەکو پارتی شەهیدان پێناسە دەکات. پەکەکە لە سەرەتای دروستبوونیەوە، پارێزەری شکۆ و هەبوونی گەلی کوردە. وەکو رێبەر ئاپۆش دەڵێت، 'شەهیدان بەرزمان دەکەنەوە و بڕیاری ئازادیش نوێدەکەنەوە'. وەکو چۆن بە شەهیدبوونی هەڤاڵ حەقی قارەر بڕیاری پارتیبوون درا و رێگای ئازادی دەستی پێکرد، بە هەمان شێوە ئەمڕۆش بە شەهیدبوونی هەڤاڵانی وەکو دیار غەریب، بیردۆزی ئازادی مسۆگەر دەبێت.

شەهید هەڤاڵ هەڵمەت یەکێکە لە پێشەنگە گەورەکانی بزوتنەوەی ئاپۆیی کە بە رەنج و فیداکاریەکی گەورەوە لە ناو تێکۆشانی ئازادیخوازی گەلی کورددا جێی گرت و تا دوایین هەناسەش ملیتانی هێڵی رێبەر ئاپۆ بوو. هەڤاڵ هەڵمەت بە کۆمەڵایەتیبوون و گەلپارێزیەکەی و زانابون و خاکیبوون و هاوڕیەتیەکی گەرم و بە جۆش و خرۆشیەکەی، دەناسرایەوە. ئازاری گەلەکەی لە ناوخی خۆیدا هەستی پێدەکرت، برینە مێژوویەکانی نیشتیمانی دایکی لە قوڵایی دڵیدا هەست پێدەکرت. بۆیە هەڤاڵ هەڵمەت بە عەشقێکی گەورە بۆ ئازادی هەوڵیدا، بە کینێکی گەورە لە بەرامبەر داگیرکەر و خائینان شەڕی کرد و بە بڕوایەکی گەورە بۆ بونیادنانی ژیانێکی نوێ رەنجی کێشا. هەڤاڵ هەڵمەت بۆ ئەوەی گەلی کورد راستی خۆی و دوژمنی داگیرکەر بە باشی بناسێت، هەم لە رووی بیردۆز و پەروەردە و خەباتە ئەکادیمیەکان و هەم لە رووی پراکتیک و سیاسیشدا، رەنجێکی گەورەیدا. لە چوارچێوەی فەلسەفە و رامانی رێبەر ئاپۆدا، رۆناکی خستە سەر لایەنە شاراوە مێژوویەکانی کورد و کوردستان. هەڤاڵ هەڵمەت خزمەتکردنی گەلەکەی، هەمیشە کردی بە پێوانە و لە بەرامبەر ئەو قڕکردن، نادادی و ستەمەی کە داگیرکەران و هاوکارانیان لە بەرامبەر گەلی کورد دەکەن، بوو بە پەرژینی خۆڕاگری و پاراستنی گەل.
هەڤاڵ هەڵمەت ملیتانێکی فیدایی، کادیرێکی پێشەنگ و بە ئەزمون، بەڕێوەبەرێکی زانا و دڵسۆز، هاوڕێەکی دڵسۆز و نمونەی کوردایەتی ئازاد بوو کە هیوا و ئاوات و عەشقی ئازادی هەمیشە لە ناو دڵیدا بوو، لەگەڵیدا دەژیا. بە رۆحێکی گەورەی بەرپرسیارێتی، دڵ و مێشکێ خۆی بۆ یەکێتی گەلی کورد و دروستبوونی نەتەوەی دیمۆکراتیک و بونیادنانی کوردستانێکی ئازاد، کرد بە یەک. شەهید هەڤاڵ هەڵمەت خۆشەویستی گەلی لە فکر و زکر و چالاکیەکانی خۆیدا بە بنەما دەگرت، بۆیە خۆشەویستی گەل بوو. بە هۆی هەمان کارەکتەرەەوە بوو، کە هەڤاڵ هەڵمەت لە لایەن دوژمنی خوێڕێژ و نۆکەرترین و جاسووسترین و گەندەڵترین لایەن بە ئامانج گیرا. بەڵام شەهید هەڤاڵ هەڵمەت بە شەهیدبوونی، بوو بە شکۆ و خۆشەویستی و رۆناکیەکی نەمر لە ناو دڵ و مێشکی کوردی ئازاددا.

'هەڤاڵ هەڵمەت بۆ ئەوەی رێگری بکات لە قڕکردنی کورد، هەوڵێکی زۆریدا'

ئەو ئامانجەی کە هەڤاڵ هەڵمەت گرتیە بەر و بۆ جێبەجێکردنی بۆی تێکۆشا، بونیادنانی یەکێتی دیمۆکراتیکی نەتەوەیی بوو لە ناو گەلی کورد دا. چونکە ئەمە لە خزمەتی ئازادی و سەرکەوتنی گەلی کوردا بوو. هەڤاڵ هەڵمەت بۆ پاراستنی نرخە نەتەوەییەکانی گەلی کورد، تێکۆشانێکی گەورەی لە دژی کارەساتی تەسلیمبوون و خۆفرۆشیدا. چونکە ئەو سیاسەتەی بەشێک لە رێکخستنە کوردیەکان، لەسەر ئەم بنەمایە بەڕێوەی دەبەن، لە هەر چوار پارچەی کوردستان و بە تایبەت لە باشوری کوردستان، گەلی کوردی رووبەرووی مەترسی قڕکردنێکی گەورە و لەناوچوون کردووەتەوە. هەڤاڵ هەڵمەت چونکە لە قوڵایی کارەساتە گەورەکانی وەکو ئەنفال و کیمیابارانی هەڵەبجە تێگەیشتبوو، بۆ ئەوەی رێگری بکات لە کارەساتی ئەم چەشنە و قڕکردنی گەلی کورد، هەوڵ و خەباتێکی زۆریدا.

دەوڵەتی فاشیستی تورک بە شێوەیەکی دڕندانە بەردەوامە لە هێرشەکانیدا. دەبێت بەو هێرشانەی ئەنجام دەدرێن، ئەوە تێبگەین کە دوژمن بڕیاری قڕکردنی سەرتاسەری کوردی داوە و بۆ ئەو ئامانجەش، هەموو جۆرە هێرشێک ئەنجام دەدات. گۆشەگیری توندکراوی سەر رێبەر ئاپۆ، فشار و زۆرداری سەر گەلەکەمان، هێرش و کۆمەڵکوژیەکانی سەر هەر چوار پارچەی کوردستان و هەوڵە داگیرکاریەکانی سەر ناوچەکانی ئازادیی، لە هەرێمەکان پاراستنی میدیا، ئەم پلانە قێزەوەنانە دەخەنە روو. بەڵام هەموو رۆژێک رووبەرووی تێکۆشان و خۆڕاگری گەریلاکانی ئازادی بووەتەوە. دەوڵەتی تورک لەو شوێنانەی گوایا داگیری کردوون، چەقبەستوو بووە و بەردەوام کوژراوی هەبووە. لە دوایین هێرشەکەی بۆ سەر حەفتانینش ویستی جارێکی دیکە خۆی تاقی بکاتەوە، بەڵام لە هەموو کاتێک زیاتر خۆڕاگریەکی گەورەی بینی. لەگەڵ ئەو هەموو دەرفەتە تەکنیکیانەی لەبەر دەستیدان، بە دەیان کوژراو و برینداری هەیە و دەشیبێت.

ئەم وڵامە مێژوویەی گەریلا، ئەوە دەخاتە روو کە هێڵی شەهید هەڤاڵ هەڵمەت کە خۆی تێدا فیدا کرد، تا چەند بەهێزە و سەری نەوڤی ناکات. لە چوارچێوەی هەوڵی داگیرکردنی کوردستان و قڕکردنی گەلی کورددا، هێرش و پەلاماری دڕندە و نامەردانە کرانە سەر گەل و بزوتنەوەکەمان. شکۆ، پیرۆزی و دەسکەوتێک کە هی کورد بێت، بە دڕندەترین شێواز هێرشی دەکەنە سەر. وەک چۆن جاش و جاسووس و خیانەتکاران، لە شەهیدکردنی هەڤاڵ هەڵمەتدا بوون بە هاوکاری رژێمی فاشیستی ئەردۆغان، ئەمڕۆش هەمان رێکخستن و لایەن لە داگیرکردنی خاکی باشوری کوردستان و شەهیدکردنی هاوڵاتیانی کورددا رۆڵ دەبینن و دەستیان هەیە لە رشتنی خوێنی گەلەکەماندا. دەوڵەتی تورک ئەم هێرش و بڕیارانە بە تەنها نایکات و نایدات. هەموو کەسێک ئەوە باش دەزانێت کە دەوڵەتی تورکیا لە لاوازترین سەردەمی خۆیدایە.
هێزە دەرەکیەکان کە دەبینن رۆژ بە رۆژ هزر و رامانی رێبەر ئاپۆ لە لایەن گەلی رۆژهەڵاتی ناوەڕاستەوە زیاتر پێشوازی لێدەکرێت و هەوڵی مسۆگەرکردنی ئەم بیردۆزە هەیە، ئەمە بۆ دواڕۆژیان وەکو هەڕەشەیەک دەبینن. لە رۆژی بڕیارەکەی ئەمریکاوە لەسەر پارتەکەمان تا ئێستا، پەیتا پەیتا هەڤاڵە پێشەنگەکانمان شەهید دەبن. بەڕێوەبەرانمان بە تاکتیکی هێزە دەرەکیەکان بە ئامانج دەگیرێن. هەموو کەسێک ئەوە باش دەزانێت کە ئەگەر هاوکاریی هێزە دەرەکیەکان نەبێت، ئەردۆغانی فاشیست و باخچەلی ناتوانن لە بەرامبەر خۆڕاگری و تێکۆشانی ئازادی لەسەر پێ بمێننەوە. وەکو چۆن ئەو پلان و ستراتیجیانەی دەوڵەتی فاشیستی تورک لە بەرامبەر کورد دەیکات، ئاشکرا دەبن، بە هەمان شێوە پێویستی بە ئاشکراکردنی پلانەکانی هێزە دەرەکیەکانە بۆ سەر گەلی کوردیش. لە راستیدا دەبێت ئەو عاقلمەندەی بڕیاری قڕکردنی کورد دەدات بە باشی بناسرێت. تێکشکاندنی ئەردۆغانی فاشیست، بە واتای تێکشکاندنی هێزە دەسەڵاتخوازەکان و کاپیتالیستە. کاتێک ئەمە بەدی هات، دەبێتە دەستکەوتێکی جیهانی بۆ تێکۆشانی ئازادی و دیمۆکراسی.

'هێرشەکانی دژی گەلی کورد، لە دژی دواڕۆژی دیمۆکراتیکی هەرێمەکەیە'

دەبێت رای دیمۆکراتیک ئەوە باش بزانێت کە هێرشەکانی سەر گەلی کورد، تەنها لە دژی ئێمە نین، بەڵکو لە دژی ژیان و دواڕۆژی دیمۆکراتیکی هەرێمەکەیە. وەکو چۆن گەلی کورد لە هەر ناوچەک کە تێیدا دەژیت، لە دژی فاشیزمی ئەردۆغان لە خۆڕاگریدایە و لەو پێناوەشدا قوربانی گەورە دەدات، بە هەمان شێوە دەبێت هێزە دیمۆکراتەکان، ژینگەپارێزەکان، ئازادیخوازەکان و دۆستانی گەلی کوردیش بەو شێوازە و بە رۆحیەتە رووبەرووی ئەو قۆناغە مەترسیدارە ببنەوە.

لە یەکەمین ساڵیادی شەهیدبوونی هاوڕێ هەڵمەتدا، کوردستان لە هەموو کاتێک زیاتر پێویستی بە پێشەنگ و شۆڕشگێری وەکو هاوڕێ هەڵمەت و زین و قاسم هەیە. دەبێت ئەوانەی دەستیان بە خوێنی هەڤاڵان و گەلەکەمان سوورە، داڵدە نەدرێن و ناڕەزایەتیەکی توندیان لەبەرامبەر پیشان بدرێت. ئەوانەی کۆتایی بە دوژمنانی ناو خۆیان نەهێنن، ئایا چۆن دەتوانێت یەکڕیزی و یەکێتی نەتەوەیی بەدی بهێنێت؟

بۆیە بۆ ئەوەی داری ئازادی و یەکێتی نەتەوەیی بڕوێت و گەش ببێت، دەبێت کرمی دارەکە لەناو ببرێت. دەبێت بە سەدان زین و مەمی سەردەم کە عاشقی گەلەکەیانن، بۆ ئەوەی جارێکی دیکە بە خیانەتی بەکۆ'کان تێک نەچن و گیان لەدەست نەدەن، کۆتایی بە بەکۆ'کانی ئەم سەردەمە بهێنرێت. بۆ ئەوەی کۆتایی بە قڕکردنی گەلی کورد نەهێنرێت و دەستکەوتەکانی کورد پارێزراو بن و فاشیزم و داگیرکاری هەڵوەشێنرێتەوە، تاکە رێگا پێداگریە لە سەر تێکۆشانی هەڵمەت و قاسمەکان. لە بەرامبەر هێرشی ئەم چەشنە، ئەو فەرمانانەی شەهیدە گەورەکانمان وەکو حەقی قارەر، مەزلوم دۆغان، کەمال پیر تا دەگاتە بێریتان، زیلان، سەما، ڤیان، شیرین، هەڵمەت، زین ئاڤێستا و قاسمەکان پێیان کردووین، بیکەین بە بنەما. فەرمانەکانیان بۆ ئێمە، 'خۆڕاگرییە لە بەرامبەر داگیرکاری و فاشیزم و خیانەتکاران'.

وەکو چۆن دەوڵەتی فاشیستی تورک لە راستی و تێکۆشانمان دەترسێت، دەبێت بە هەمان شێوە خیانەتکارانیش لە هێزی ئێمە بترسن. وەکو چۆن سوێندمان بۆ کۆتایی پێهێنانی فاشیزمە، هاوکات بەڵێنیش دەدەین کە تۆڵەی هەڤاڵانمان دەکەینەوە. ئێمە جارێکی دیکە بانگەوازی ئاڕاستەی هەموو گەنجان، بە تایبەت ژنانی کورد، دۆستانی گەلەکەمان، رۆشنبیر، هونەرمەند، رێکخراوە مەدەنیەکان، هێز و کەسایەتە دیمۆکرات و ئازادیخوازەکان دەکەین کە بۆ تێکۆشانی دژی داگیرکاری، لە سەرتاسەری کوردستان و تورکیا، لە دژی گۆشەگیری توندکراوی سەر رێبەر ئاپۆ و قڕکردنی گەلان تێکۆشانیان بەرفراوانتر بکەن و لە خۆڕاگریدا بن. کات، کاتی یەکێتی گەلی کوردە، کات، کاتی ئەوەیە خاوەنداری لە شکۆمەندیەکانمان بکەن، کات، کاتی ئەوەیە لێپرسینەوەی مێژوویی لە دوژمنان بکەن و ئازادی رێبەر ئاپۆ و ژنان و گەلان مسۆگەر بکرێت."

ز.ش