١٨٧ رۆژنامەنووسی باشوور و باکوور و رۆژهەڵات و عێراق لە باشووری کوردستان بە بڵاوکردنەوەى ڕاگەیاندراوێکی هاوبەش داوای ئازادکردنی ئەو ٢١ رۆژنامەنووسەی باکووری کوردستان دەکەن، کە لە ٨ی حوزەیراندا لەلایەن هێزە ئەمنییەکانی تورکیاوە دەستگیرکرابوون.
دەقی ڕاگەیاندراوە هاوبەشەکە و ناوەکان:
پشتیوانی هاوپیشەکانمانین لە باکووری کوردستان
بەرەبەیانی ٨ی حوزەیران، پۆلیسی تورکیا هەڵمەتێکی ڕەشبگیریی بۆسەر ڕۆژنامەنووسانی کورد لە باکووری کوردستان دەستپێکرد و لەو چوارچێوەیەدا ٢١ ڕۆژنامەنووسی ئاژانسەکانی ژن نیوز، مەزۆپۆتامیا، ڕۆژنامەی خوەبوون، کۆمەڵەی دیجلە و فورات و پرۆدیکشنی پێل و پیا-یان دەستگیرکرد.
دەستگیرکردنی ڕۆژنامەنووسانی باکووری کوردستان دابڕاو نییە لەو هێرشە بەرفراوانەی دەوڵەتی تورکیا بۆ سەر باشوور و ڕۆژئاوای کوردستان و هەوڵێکە بۆ چاو و گوێ داخستنی هاوڵاتیان لە هێرشەکان.
بەو ڕەشبگیرییە دەوڵەتی تورکیا بنەماکانی دیموکراسییەت پیشێل دەکات و دژ بەو یاسایە کار دەکات، کە بەندەکانی بانگەشەی فەراهەمکردنی ئازادیی کاری ڕۆژنامەوانیی دەکات لە تورکیا و باکووری کوردستان.
ئێمە وەک ڕۆژنامەنووسانی باشووری کوردستان و عێراق و ڕۆژنامەنووسانی باکوور و ڕۆژهەڵاتی کوردستان، کە لە باشووری کوردستان کاری ڕۆژنامەوانیی ئەنجام دەدەین، دژی دەستگیرکردنی هاوپیشەکانمانین و هەر هەوڵێک بۆ بەرتەسککردنەوەی ئازادیی کاری ڕۆژنامەوانیی ئیدانە دەکەین، داواش لە ڕێکخراوەکانی داکۆکییکردن لە مافی ڕۆژنامەنووسان دەکەین، فشار لە دەوڵەتی تورک بکەن بۆ ئازادکردنیان.
ژ.ت
