بەیانی ئەمڕۆ، دەوڵەتی توركی داگیركه‌ر لە ڕێگەی فڕۆكەی بێ فڕۆكەوانەوە ئۆتۆمبێلێكی له‌ نزیك گوندی به‌رلوتی كه‌لار كردە ئامانج و بەهۆیەوە چوار كەس شەهیدبوون و كەسێكی تریش برینداربوو.

له‌باره‌ی ئه‌و هێرشه‌وه‌، فراكسیۆنی یه‌كێتیی نیشتمانیی كوردستان (یەنەکە) لە په‌رله‌مانی عێراق ڕاگەیەندراوێكی بڵاوكردەوە و تێیداهاتووە: پێشێلکردنی سەروەریی خاک و ئاسمانی عێراق بەشێوەیەکی بەردەوام لە لایەن تورکیاوە مایەی قبوڵکردن نییە.

راشیگه‌یاندووه‌، ئەم ڕەفتارە قێزەونانەی تورکیا بووەتە بارگرانیی لەسەر وڵاتانی ئیقلیمی و نێونه‌ته‌وه‌یی، ئێمە لە فڕاکسیۆنی یەکێتی نیشتیمانی کوردستان بەتوندیی ئیدانە و مەحکومی دەکەین.

فراكسیۆنی یه‌نه‌كه‌ ئاماژه‌ی به‌وه‌شكردووه‌: دیارە تورکیا لە سۆنگەی هزری دژایەتییکردنی دراوسێکانی  و بۆ جێبەجێکردنی پلانە دزێوەکانی هەر ڕۆژە و سوچێکی ئەم وڵاتە دەکاتە ئامانج ، دوێنی لە شەنگال و ئەمڕۆ لەکەلار کۆمەڵێک خەڵکی سڤیلی بە ناهەقی شەهید بوون.

باسی له‌وه‌شكردووه‌، ”ئێمە لە فراکسیۆنی یەکێتی نیشتیمانی، کە هەمیشە جەختمان کردووە لەسەر پاراستنی سەروەریی خاک وئاسمان و کەرامەتی دەوڵەت و هاوڵاتیانی عێراق ، دوا لە حکومەتی عێراق دەکەین بە  ئەرکە نیشتیمانییەکەی هەڵستێت و سەروەریی دەوڵەت و گیان و موڵکی هاوڵاتیانی خۆی بپارێزێت و سنوورێک بۆ ئەم کردەوە دووژمنکاریانەی دەوڵەتی تورك دابنێت”.

هـ . ب