کەجەدەکە – ئە رایگەیاند کە مانگی ئازار بۆ گەلی کورد مانگی کۆمەڵکوژی و بەرخۆدانە و داوای لە گەلی کوردستان کرد کە لەدژی هێرشی قڕکەری دەوڵەتی تورک لە هەموو جێگەیەک لەسەر بناغەی یەکێتی نەتەوەیی بەرخۆدان گەش بکەن و ئازادی مسۆگەر بکەن.
کۆنگرەی کۆمەڵگاکانی دیموکراتی کوردستان لە ئەوروپا (کەجەدەکە – ئە) بە بۆنەی ساڵیادی کۆمەڵکوژیەکانی هەلەبجە، قامشلۆ، گازی و عەفرین راگەیەنراوێکی بڵاوکردەوە.
لە راگەیەنراوەکەدا هاتووە کە مانگی ئازار لەلایەن گەلی کوردستانەوە وەک مانگی کۆمەڵکوژی و بەرخۆدان دەبینرێت و گەلی کورد بە بەرخۆدان و تێکۆشان بەهاکانی پاراستووە.
لە راگەیەنراوەکەدا هاتووە، " سەدامی دیکتاتۆر لە ساڵی ١٩٨٨دا لە هەلەبجە بە گازی کیمیایی و خەردەل ٥٠٠٠ کەسی بێتاوانی کۆمەلکوژ کرد، دەوڵەتی داگیرکەری تورک لە ١٢ی ئازاری ١٩٩٥ لە ناوچەی گازی ئەستەنبوڵ کۆمەڵکوژی ئەنجامدا. رژێمی سوریا لە ١٢ی ئازاری ٢٠٠٤ هەوڵیدا فیتنە لەنێوان کورد و عەرەبدا دروست بکات و کۆمەڵکوژی کرد. فاشیزمی ئاکەپە و مەهەپە لە ١٨ی ئازاری ٢٠١٨ بە هەمان عەقڵیەت و سیاسەتی کۆمەڵکوژی عەفرینی داگیرکرد. ئەو سیاسەتانەی داگیرکەری و کۆمەڵکوژیە نەیتوانی تێکۆشانی ئازادی گەلی کورد راوەستێنێت و تووڕەیی و بڕیاری گەلەکەمانی بۆ تێکۆشان گەورەتر کرد.
دەوڵەتی تورکک بە هەمان عەقڵیەت و ئامانج ئەمڕۆ بە شێوەیەکی گشتگیر لە کوردستان هێرش ئەنجام دەدات. هەر وەک چۆن کۆمەڵکوژی لە هەلەبجە و قامشلۆ سەری نەگرت، دەوڵەتی تورکیش لە بەرانبەر تێکۆشانی ئازادی گەلەکەمان تێک دەچێت و کەوتووەتە نێو قەیرانێکی قورس.
مێژوو جارێکی دیکە پیشانیدا کە فشاری و توندوتیژی، تێکۆشانی ئازادی، یەکسانی و دیموکراستی ناتوانێت بوەستێنێت. چەکی کیمیایی و بایۆلۆژی و ئەتۆمی، هەرچ چەکێک بەکاربهێنرێت، بە کۆمەڵکوژی و توندوتیژی تێکۆشانی دیموکراسی ئازادی راناوەستێت. ناتوانن لە بەردەم تێکۆشانی یەکسانی و ئازادی گەلی کورد ئاستەنگی دروست بکەن.
ئەو عەقڵیەتەی کە لە هەلەبجە بە چەکی کیمیایی و بایۆلۆژی هەوڵدا تێکۆشانی گەلەکەمان بوەستێنێت، بە هەمان شێوە، لە عەفرین، شەنگال، باشور، مەخمور و باکور ئەمڕۆش هێرش دەکاتە سەر گەلەکەمان و بەهاکانمان و هەوڵ دەدات تەمەنی خۆی درێژ بکات.
بە ناوی کەجەدەکە – ئە داوا لە هەموو گەلی کوردستان دەکەین کە لەدژی هێرشی قڕکەر و داگیرکەران، ئەرکی ویژدانی و ئەخلاقی خۆیان جێبەجێ بکەن، لەسەر بناغەی یەکێتی نەتەوەی بەرخۆدان گەورە بکەن و ئازادی گەلەمان کە داواکاری شەهیدانە مسۆگەر بکەن."
ف.ق
