ئۆپراسیۆنی داگیرکەریی دەوڵەتى تورک بۆ سەر باشووری کوردستان بەردەوامیی هەیە.
سوپای تورک لە ١٦ی حوزەیراندا بە پشتیوانیی ئاسمانی هێرش و ئۆپراسیۆنی داگیرکەریی کردە سەر ناوچەى حەفتانین لە باشووری کوردستان و لەو کاتەوە رووبەڕووی بەرخودانێکى گەورەی گەریلا بووەتەوە، ئەو رژێمە فاشیستە بەرپرسانی هەرێمیش دەکاتە هاوکار و یارمەتیدەری هێرشە داگیرکەرییەکەى.
بەپێی زانیارییەکانی ئاژانسەکەمان لە سەرچاوە هەرێمییەکانەوە، بەرپرسانی هەرێم لە باشووری کوردستان لەم چەند رۆژەى رابردوودا کارەبای ناوچەى حەفتانینیان بڕیوە و رێگاش بە هاووڵاتییانی ئەو ناوچەیە نادەن خواردەمەنی و پێداوێستی لەگەڵ خۆیان بۆ ناوچەکەی خۆیان ببەن.
دەوڵەتى تورکی داگیرکەر لە ١٩ی حوزەیرانی ٢٠٢٠دا شێلادزێی بۆردومانکرد و بەو هۆیەوە ٥ هاووڵاتیی شەهید کردبوو، گەلیش لە دژی ئەو تاوانەی دەوڵەتى تورک راپەڕین، بەڵام بەرپرسانی هەرێم لەو ناوچەیەدا بنکە و بارەگاکانی سوپای تورکیان پاراست و رێگایان نەدا گەلی راپەڕیو لێیان نزیک ببنەوە.
بڕینی کارەبای ناوچەى حەفتانین و کەمکردنەوەى هاتووچۆی هاووڵاتییان بۆ ناوچەکەیان و رێگریکردن لەوەى هاووڵاتییانی ئەو سنوورە خۆراک و پێداویستی لەگەڵ خۆیان نەبەن بۆ ناوچەکەیان و هەروەها پاراستنی بنکە سەربازییەکانى سوپای تورکی داگیرکەر لە توڕەیی خەڵکی راپەڕیو، بە هاوکاریکردنی بەرپرسانی هەرێم بۆ دەوڵەتى تورکی داگیرکەر و یارمەتیدانی ئەو دەوڵەتە داگیرکەرە لێکدەرێتەوە، کە دەستدرێژیی کردووەتە سەر خاک و سەروەریی باشووری کوردستان.
ژ.ت