وەختوو چێشتەی، وەری داخ دابێشەرە و گڕە جە زەمینی بەرزە بیێبێوە. 
قسمەت پاسە بێ نەختێو دێر گنمێ ڕا. گەرمی هەوای تاقەتوو زاڕۆڵاش ڪەم ڪەردەبێ. ڕاما بڕیە تا نزیڪی دەگای. دلێ دەگای چۆڵ و هۆڵ بێ. ڕۆخانەو دلێ دەگای بێدەنگ و بێ‌ڪشە بڕێو یاگێشوەنە ڪەرگەڪڕێت چەنە نیایاوە.
دلێ دەگایما ئاستە جیا و ڕوو بە هەواری ڪەوتێمێ ڕا. ئاخرین یانەو دەگاینە بوەو فێنڪێ هەواو هەورای چڕەیما چڕێ. دار و درەخت پێسەو چەترێ سەروو جادٚەی خاڪیش گێرتەبێ و وەڵاتش ڪەردەبێ سێوەر.
دانەدانە هەوارەڪا جیا ئازێمێ. چەمێما تەژنەو تەماشای بێنێ. جادٚەو ڪەراخوو ڕۆخانەی دەسڪەن بێ و شاڪەڵەڪێش و دیوارچنی تەوەنا دڵوو یۆی تازە ڪەرێنێوە. وەختێو تەماشاو ڪەڵەڪە بەرزەڪا ڪەرێنمێ دلێ دڵوو وێمەنە هەزار جارێ شڪوروو خودٚای ڪەرێنا و دەس وەشی ئا ئوسایە ڪه مانیایش پەی گرینگ نەبیەن و تەنیا یاوەرش قوڵەنگەڪەش و پیڪ و نوێڵەڪەش بیەن.
شێنەشێنەی ڕا بڕێنمێ. هەوار بە هەوار وەشتەر گنێ وەراچمەما. یاگش بێ، نزیڪ بە دە تا پانزە یانا بە یۆوە مەحەلێوەشا گێرتێبێ.  قمێوە وەشە بە شەریڪی کە وەربەرەڪەنە بینایبێشا وەختوو هەرمانا و جل شتەی، تەشتە جلێ گێرێنێ دەسشاوە و جەمێ بێنێوە و شنیێنێ ڪاروو باری.
زاڕۆڵێچ وەروو بەرەینە یانەقۆڵێ بینێنێ. یۆ  پەڕ بە دڵ ئاواتە وازێ چەنیشا بۆ و وێش ڪەرۆ مێمانوو یانەی دڵە بێ خەمەڪەیشا ڪە تەنیا دڵەڕاوڪێ و خەمشا ئانەن، یاخودٚا بزڵە یام و وەرێوە نەی بە ڪتووپڕ ڕاش گنۆ سمش بنیو سەروو بانوو یانەڪەیشا و دارە ڕاڪەیشا خراو ڪەرۆ. 
چەمێم نۆقمێ تەماشای بێبێنێ. چاگەنە جە گرم و قاڵوو شاری دوورە ڪەوتێبێناوە. واچێنێ مەژگم مدران و فرمانش دان تەنیا ویروو ئی ساتەینە بە! فرە پەنەم وەش بێ. زاڕوڵێ وەش‌حاڵتەر جە وێما.
هاژەو ئاوێ گنێ گۆشاما و خەمێما بڕێ. یۆ حەز ڪەرێ چا یاگێنە جە هازوو ماشینەڪەی ڪەم بۆوە تاکوو سێوەروو دارە وەزەڪانە نیشیرە و شەڪەتی چن وەختا جە عەمری ویردەیت بدٚەی دەموو ئاوەڪێوە و پەی هەمیشەی دەرەدماش بنیەی.
پاو ئانەیە گرد لایە وەرەقاقڕ دابێشەرە و شێڕەو جێرجێرا وەڵاتش گێرتەبێ، فرەفرە فێنڪ بێ. وردە هانێ ڪەراخوو ڕۆخانەی بێدەنگ و بە خوڕیە نەرم و نیان گنێنێ دلێ دەرەی و بێ‌دەنگیش ماڕێنێ. یو دڵش گەش بێوە.
جادٚە چۆڵ بێ و ئێمەیچ وێما هەوڵ نەڪەرێنمێ. نەختێو ڕاما بڕیە. چن هەوارێما جیا ئاستێ.  ڕاڪێما سەرەوڪۆش بێ و وردەوردە بەرز و بەرزتەرێ بێنمێوە.
قەدٚیمیێ سڵاموو خودٚایشا سەر بۆ، یاگێوەشا ئاوەدٚان نەڪەردەن بێ نام و نیشان بۆ. گردوو هەوارەڪا نامێشا بێ. حەر جە دەرەو واردەگای گنیشوەنە تا سەرچەمەو پلوورێ و هەواروو شانشینی و کوڕی‌مریەم و فروودگای و...  گردش نامێشا هەنە و پا نامێرە یۆ مەشناسۆشا.
یاوانی سوورەتفی. ڪەوتانی ویروو بەرنامەو ڕاوایاری ڪە چن ڕوێ چیوەڵ جە بێسارانی و هەوارەڪاش گێرتەبێشا و وڵاوە بیەبێوە. نەختێو حەسرەتوو ئانەیە ڪەوت دڵم ڪە چن هەوارێ و هانێشا جیا ئاستێنێ و بە پەلەپەل وێشا یاونان هەوارە بەرزەڪا تا فێنڪشا بۆوە. 
ڪەننەتەقەما ڕەد ڪەرد و ئاخیجان چەمێما ڪەوتێ بە زیارەتەڵان و گڵڪۆ باوایم ڪە چن ساڵێ چیوەڵی فەوتش ڪەردەبێ و بنێوە داروو "تەیلێ" سەروو قەبرەکێشوە تاتەیم نیایبێ و یاوایبێ سەمەر. دلێ دڵوو وێمەنە ڕەحمەتێوەم یاونا پەیشا و جە خودٚای گەورەی داواو عەفەویم ڪەردێ. 
ڪەوێڵێ هەوارەڪا فرێشا ڕەنگ و بۆ قەدٚیمشا مەنەن. دیوارچنیشا بە زۆروو دەسان و ماڕای درڪا.
لاو وێموە واچێنا داخۆم ڪەسێوتەر بۆ زۆروو بازواو ئا شێرەپیاو قەدٚیمیاشە بە میراس بەردەبۆ؟
چەمێما نقموو تەماشای بیێبێنێ. فێنڪی هەوای، هاژەو ئاوێ، ئاودٚانی هەوارەڪا و خوڵەڪەی گەرم و گوڕەو هەوارنشینا خەمێما تاسنێ و وەشحاڵما ڪەرێ.
 چن شەتاوێما ئیدٚەس و ئەودٚەس ڪەردێ. ڕاسە ڕاو دەرەی چیروو چەترەو دارە وەزا و قیژەو قژاڪەی و قڕەو قاڵاوا. وردە پەلەوەرا مۆسیقایوەشا خەڵاتوو هەرد و بەردی ڪەردەبێ. یۆ ئاواتەوازوو دەنگ هۆرگیرێو بێ ڪە تاق و تەنیا ئا دەنگا هۆرگێرۆ تا ڪاتوو دڵتەنگی گۆش گێری هەتایش بۆ.

درێژەش هەن...

نویستەی/ خانم شەریفی

سەرچەمە/ کاناڵەو ئەنجۆمەنو ڕۆجیاری