پەژاک "هەنگاوی کرداری لە پێناو هاوئاهەنگی هێزه سیاسیەکانی رۆژهەڵاتی کوردستان" بڵاوکردەوە

پەژاک بۆ دروستکردنى هەنگاوی کرداری لە پێناو هائاهەنگیى هێزە سیاسییەکانى رۆژهەڵاتى کوردستان دا پرۆژەیەکى بە ناوی "هەنگاوی کرداری لە پێناو هاوئاهەنگی هێزە سیاسیەکانى رۆژهەڵاتى کوردستان" بڵاوکردەوە.

پرۆژەکەى پارتى ژیانى ئازادى کوردستان (پەژاک) باس لە گۆڕانکارییەکانى ناوچەکە و دۆخى رۆژهەڵاتى کوردستان و گرنگیى پێشەنگایەتیکردنى خەباتى گەلی کورد و بوونى هاوئاهەنگی لە بواری دیپلۆماتیک و سەربازی بۆ داهاتووى رۆژهەڵاتى کوردستان کوردستان خستووەتەڕوو.

لە پرۆژەکەى پەژاکدا ١١ خاڵ بۆ هەنگاوی کرداریى و هاوئاهەنگیى هێزە سیاسییەکانى رۆژهەڵاتى کوردستان خراوتەڕوو.

مانگێک لەوە پێش کۆمەڵگەى دیموکراتیک و ئازادى رۆژهەڵاتى کوردستان (کۆدار) و پارتی ژیانى ئازادى کوردستان (پەژاک) پرۆژەیەکیان بە ناوی بۆ هەنگاوى دیموکراتیک لە سەرتاسەرى ئێران خستبووە ڕوو.

دەقى پرۆژەکەى پەژاک بۆ هاوئاهەنگیى هێزەکانى رۆژهەڵاتى کوردستان

کوردستان و گەلی کورد نزیکەی سەد ساڵه که بۆ گەیشتن به دێموکراسی و ئازادی قوربانی دەدەن. فراوانتر لە چوارچێوەی حیزبی، گەلی کورد، ئازیزترین ڕۆڵەکانی خۆی بۆ گەیشتن به ئازادی فیدا کردووه‌. ڕێبەرانی مەزن لەم ڕێگایەدا شەهید بوون. لە قۆناغی ئێستاشدا هەم لە بواری سەربازی و هەم لە بواری سیاسی، کوردستان بە هەموو ڕەخنە و لاوازیانەی کە هەیەتی، سیاسی‌ ترین، بەڕێکخستن کراو‌ترین، دینامیکترین و چالاکترین جیۆگرافیای سیاسی ئێرانە. لەسەر ئەم بنەمایە پێشەنگ، ناوەند و دڵی گۆڕانکاری داهاتووی ئێران دەبێت. کوردان شوێنکەوتوو یان کارتێکی سیاسی لە هاوسەنگیەکانی ئێران و هاوکێشە هەرێمیەکان نین و نابن. کوردان پێشەنگی خەبات و تێکۆشان بوون، بەنرخترین بەهایان بۆ ئازادی داوە. هەر بۆیە پێویستە گەلی کورد و رێکخراوەکانی ببنە ناوەندی کۆکردنەوەی هێزە سیاسیەکانی ئێران نەک ئەوەی کە پارتە کوردیەکان ببنە شوێنکەوتووی ئەو ڕێکخستنانەی که ناچالاک بوون یان هیچ توانایەکی سیاسی و کرداریان لە ناوخۆی ئێران نیە. ئێمە نابێت ئەوە لەبیر بکەین که بۆ ئازادی گەلەکەمان خاوەنی بەرنامه و پرۆژەین. لە بواری دیپلۆماتیک و سەربازی، ئەوە ڕێکخراو و پارتەکانی دیکەن که پێویستیان بە هاوکاری گەلی کورد هەیە. بەڵام ئەمە بە بێ پێکهێنانی بەرەیەکی نەتەویی‌ـدیموکراتیک و یەکێتی هەموو پارت و ڕێکخستنەکان و یەکێتی گەلی کورد بەدی نایەت. هاوکاری و هاوئاهەنگی لەگەڵ هێزه سیاسیەکانی دیکەی ئێران پێویستە، بەڵام ئەگەر ئەم هاوکاریە لە چوارچێوەی بەرەیەکی نەتەویی و هاوبەش نەبێت، کوردان تەنها دەبنە جێبەجێکار و ئۆبژە‌ بۆ بەرژەوەندی سیاسی ئەوان و خۆیان لە بەرژەوەندیە نەتەویەکانیان بێ‌بەش دەمێنن. ئێمە لە بەرامبەر گەلەکامان ڕاستگۆ و شەفاف بووین و دەبین.

ئاشکرایە گەلی کورد نیگەرانی ئەوەیە که بەرژەوەندی نەتەوەیی لە رۆژهەڵاتی کوردستانیش ببێتە قوربانی بەرژەوەندی حیزبی، تاکڕەوی حیزبی، دەست بەسەرداگرتن و کێبڕکێی دەسەڵاتخوازانە. گەلی کورد خوازیاری یەکێتی هەموو پارتە کوردیەکان و پێکهێنانی بەرەیەکی نەتەوەیی-دیموکراتیک لە کوردستانە؛ بەرەیەک کە وەڵامدەری جیهان و پێشەنگی ڕاستەقینەی دیموکراسی و ئازادی بێت لە ئێران. ئەگەر هەر پارت، لایەن و یان ڕەوتێکی سیاسی لەم بەرپرسیارێتیە خۆی بدزێتەوە، دیارە که داخوازی و داواکاریە ڕەواکانی گەلی کوردی بەرچاو نەگرتووە و داهاتوو‌ی سیاسی کوردستانی لە ئەگەری هەرجۆره گۆڕانکاریەک لە ئێران لەگەڵ مەترسی زۆر جدی و نەبەخشراو ڕووبەڕوو کردووە. کلیلی دیموکراسی لە ئێران و ئازادی کوردستان، کۆدەنگی، هاوئاهەنگی گەلی کورد و هەموو‌ ڕێکخستن و پارتە کوردیەکانە. گەلی کورد بە چاودێری کردنی دۆخی قەیراناوی ئێستای ڕۆژهەڵاتی ناوەڕاست و ئێران لە ئەگەری هاتنە ئارای هەرجۆره شەڕێکی ناوخۆیی لەنێوان کوردان لە داهاتوودا نیگەرانە. ئەگەر وەک هێزه سیاسیەکانی کوردستان خۆمان بە لایەنگری داخوازیەکانی گەلەکەمان دەزانین ناچار بە ڕەواندنەوەی نیگەرانیەکانی ئەوانین. گەلی کورد نیگەرانە لەوەی که ڕۆڵەکانی ئەوان ببنە قوربانی گۆڕانکاریەکانی ئێران، بەڵام لە ئێرانی داهاتوودا هەموو شتێک لەسەر مێزی دانوستاندن لەگەڵ هێزەکانی دیکەی ئێرانی، لە ئەگەری ناکۆکی و نەبوونی کۆدەنگی لە دەست بدەن. ئێمە ئەزموونێکی وەهامان لە سەرەتاکانی شۆڕشی ساڵی ۱۳۵۷ و لە دانوستاندن لەگەڵ دەوڵەتی ناوەندی هەبووە. کەسایەتییە سیاسیەکان، ڕووناکبیران، ژنان و لاوان و ڕێکخراوە مەدەنیەکان پێویستە ڕۆڵی چالاکانەی خۆیان بگێڕن و لەم قۆناغە هەستیارە مێژووییەدا، ڕەوتە سیاسیەکان، حیزب و لایەنەکان ناچار به هاوئاهەنگی بکەن. ڕێگای ئازادی ئێمە لە یەکێتی و یەکگرتوویی نێوان هەموو لایەنە سیاسیەکانی ڕۆژهەڵات و پشتبەستن بە پوتانسیەڵ و توانا و لێهاتووییە ناوخۆییەکاندا تێدەپەڕێت. بێگومان ئەم یەکێتیە، سێبەری قورسی خۆی لە واشینگتۆن و فەرەنسا و لەگەڵ هێزە ئێرانیەکانی دیکە و هەروەها لەگەڵ زلهێزە جیهانیەکان دەخاتە سەر مێزی دانوستان. پژاک باوەڕی به سیاسەتێکی ڕوون، دیار، کراوە و وەڵامدەر به گەلی کوردە و هەموو حیزبەکانی دیکەی رۆژهەڵاتی کوردستانیش بەبێ جیاوازی بۆ ئەم مژارە گرنگە بانگهێشت دەکات.

پژاک و کۆدار به شێوازێکی گشتی نەخشەڕێگای خۆیان بۆ ئێران پێشکەش کرد. ئێمە لەو باوەڕەداین که کێشەی کورد بە بێ چارەسەر‌ی کێشەی ئازەربایجان، بەلووچستان و ئەهواز و هەموو جیاوازیە باوەڕی و مەزهەبیەکانی دیکە چارەسەر‌ نابێت. نەبوونی پرسپەکتیڤی «سیاسەتی دیموکراتیک» دە‌توانێت هەموو ئەم جیاوازی و تایبەتمەندیانە ڕووبەڕووی داهاتوویەکی نادیار بکاتەوە. لە لایەکی دیکە بە باوەڕێکی قووڵ بە پێشەنگی ژنان لە هەموو بوارەکانی خەبات و تێکۆشان، پێویستە ڕاشکاوانە دەستنیشان بکەین که هیچ شێواز و ڕێگاچارەیەکی ئازادیخوازانه و یەکسانی خوازانە که ژنان نەکاتە ناوەندی تێکۆشان ناتوانێت یەکسانی و ئازادی پێک بهێنێت.

لەم قۆناخە هەستیارەدا پژاک ئەم خاڵانەی ژێر بە پێویست دەزانێت و روناکبیران و شارەزایان و ئەحزابی کوردی بانگهێشت دەکات بە شێوازی پلوڕالیستی و هەرەوەزی چارەنوسی داهاتوی کۆمەڵگای خۆی بە دەستەوە بگرێت و بۆ کۆمەڵگایەکی دمۆکڕاتیک و سکولار هاوکار و هاوهەنگاو بن و بۆ دامەزراندنی کوردستانێکی ئازاد و دمۆکڕاتیک رۆڵی مێژویی خۆیان بگێڕن.

 

١- پێکهێنانی کۆمیسیۆنی هاوبەش بۆ نەهێشتنی ناکۆکی نێوان هێزە سیاسیەکان و حیزبە کوردیەکان که تێیدا ڕۆڵی سەرەکی به ڕووناکبیران و ئاکادمیسیەنەکان درابێت.

٢- پێکهێنانی مەجلیسی نەتەویی و دموکراتیک و فەراحزبی بە بەشداری نوێنەرانی حیزبەکان و کەسانی ناحیزبی، رێکخراوە مەدەنیەکانی رۆژهەڵاتی کوردستان کە یەکێک لە ئەرکەکانی چاودێری هەڵسوکەوتی حیزبەکان دەبێت که هەموو حیزب و لایەنە سیاسیەکانی کورد لە بەرامبەریدا وەڵامدەر بن.

٣- پێکهێنانی هێزێکی سەربازی و ئارتەشی نەتەویی و هاوبەش لە چوارچێوەی پاراستنی ڕەوا.

٤- پێکهێنانی ئەنجومەنێکی سەربازی وەڵامدەر به مەجلیسی نەتەوەیی و دمۆکڕاتیک چاودێری.

٥- پێکهێنانی ئەنجومەنی دیپلۆماتیکی هاوبەش، بۆ نوێنەرایەتی کردنی کوردان لە کۆڕبەندی جیهانی و هەرێمی، لەژێر چاودێری مەجلسی نەتەویی و دمۆکڕاتیک.

۶- پێکهێنانی میدیا و تەلەفزوێنی هاوبەش بۆ بڵاوکردنەوەی سیاسەتەکانی مەجلیسی نەتەویی لە ئاستی کوردستان و ئێران.

۷– پێکهێنانی ناوەندێکی لێکۆڵێنەوەی ستراتیژیکی کوردستان لە ئوروپا بە بەشداری کوردانی تاراوگە و لێکۆڵەرانی ناوخۆیی بۆ ڕاوێژکردن لەگەڵ مەجلیسی نەتەویی، حیزبەکان و ڕێکخستنە سیاسیەکان.

۸– پێکهێنانی ناوەندێک بۆ ڕێخستنی چالاکیە هاوبەشەکان ( وەک کۆنفرانسەکان، کۆبوونەوەی ناڕەزایەتی، مانگرتنی کرێکاری و نافەرمانی مەدەنی) بۆ هاوئاهەنگی کۆمەڵگا‌ی رۆژهەڵاتی کوردستان.

۹– پێکهێنانی دامەزراوە و ڕێکخستنی فەراحزبی تایبەت به ژنان لەسەر بنەمای خەسارناسی و چارەسەری کێشەکانی بواری ژنان بە جەختکردنەوە لە بڕیاردانی هاوبەش و پراکتیکی تەریب لەپێناو چارەسەری قەیرانی کۆمەڵگا‌ی ژنانی رۆژهەڵاتی کوردستان.

۱۰– پێکهێنانی کۆمیتەیەکی هاوبەش بۆ ئەوەی چالاکانە و ڕۆژانە چاودێری دۆخی زیندانیانی سیاسی کورد لە زیندانەکانی کۆماری ئیسلامی ئێران و تێکۆشان بۆ ئازادی هەمو زیندانیانی سیاسی بکات.

مەجلیسی پاڕتی ژیانی ئازادی کوردستان- پژاک

٢١-٠٥-١٣٩٧

١٢/٨/٢٠١٨

...