هامسەرۆکەو ئامەڎو فیدراسیۆنو جەمەکا پەشتیوانی یاسایی چنی بنەیانەو زینڎانیا و زینڎانیا مێد- TUHAD- FED ئەیلەم بیریتانە ئاماژەش پانەی کەرد کە گۆشەگیری دلۍ گرڎوو گلێرگەیرە وەڵا بیەنۆ و واتش، "گۆشەگیری پرسوو گرڎوو گلێرگەیا، نەک تەنیا پرسوو زینڎانیا."
چالاکی بایکۆتوو زینڎانیا دژوو گۆشەگیری بەردەواما، جە لێوەتەریچۆ چالاکی 'دەنگ بڎە ئازاڎیی' ۋەروودەم و گێرتەخانەکانە ملۊڕاوە.
هامسەرۆکەو ئامەڎو TUHAD-FED ئەیلەم بیریتانە سەرنجش وست سەروو گرنگی چالاکیەکا و بانگەوازو ئانەیش کەرد بانۍ بە دەنگوو زینڎانیا.
بیریتانە ئانەش یاڎ ئاوردۆ کە زیاتەر جە ٢٥ ساڵان ئیمراڵینە گۆشەگیری سەخت بریۆڕاوە، ٣ ساڵێچا مەتاویۆ هیچ زانیاریێوە هۊەربگیریۆ و واتش: " دژوو ئی سیستەمیە جە ٢٧و ئابیوە هەم جە زینڎانەکانە هەم جە بەروو زینڎانەکانە چالاکی جیاواز ئەنجام مڎریۆ. ئێمەیچ پېسە کەسوکارو زینڎانیکریایا، پەی ئانەی بیمۍ بە دەنگوو زینڎانیکریایا ۋەروودەم و زینڎانەکانە بە دروشمەو 'بە دەنگوو ئازاڎیی' چالاکی ئەنجام مڎەیمۍ."
گۆشەگیری جە گرڎوو مێڎانەکانە وەڵا بیەنۆ
بیریتانە ئاماژەش پانەی دا بنەیانەکە گەرەکشابۍ دەنگشا بیاونا بە وەزارەتوو دادی و لووۍ پەی ئەنقەرەی، چا چەمپنەکەوتەیشا کەرد و واتش: "جە هەمان وەختەنە ۋەروودەم و بارەگاو ئاکەپەینە جە فرەو شارەکانە چالاکی 'دمایی بە گۆشەگیری باردۍ' ئەنجام دریا. گۆشەگیری تاوانێنە دژوو مرۆڤایەتی. سیستموو گۆشەگیری جە دورگەو ئیمراڵی جە گرڎوو مێڎانەکا ژیۋاینە وەڵابیەنۆ. کاریگەریش سەروو گرڎ لێوە وەشکەردەن. گرڎ کارۍ نایاسایی، نا دادپەرەەری و دژە دیموکراتیکی دەرەنجاموو گۆشەگیرییا. ئی سیستەمە ئینا بەروو مرۆڤایەتیوە و کاریگەریێوە فرەش سەروو زینڎانیا هەن."
بیریتانە ماچۆ پیویسا بیمۍ بە دەنگوو زینڎانیا و واتش: "ڕا جە ئەرەیاۋنایما گیریۆ کە مافێوە دیموکراتیکیمانە. ئینەیچ هەر گۆشەگیرییا. جە گرڎ ئەرەیاۋنێوە ڕۆنامەوانینە تەوقە مڎرییەیمۍ. ۋەروو ئی گرڎ ڕاگیریا داوا جە ئاشتی وازا مکەرمۍ، دەنگشا جە ۋەرا ۋەر بە گۆشەگیریینە هۊربڕا. گۆشەگیری پرسوو گرڎوو گلێرگەین نەک بە تەنیا پرسوو زینڎانیا. مەتاومۍ زانیاری جە بارەو زینڎانیاوە هۊرگێرمۍ، ماوۍ چێوەڵتەر دووۍ زینڎانیۍ بە شێوێوە گوماناوی گیانشا جە دەسدا. پۊکاتی پەیوەس بە زینڎانیا ئێمە نیگەرانێنمۍ. پێویسا هامدەنگۍ بیمۍ پەی ماڕای گۆشەگیری ئیمراڵی."
