جە گوزارشتێوە تازێنە جە لایەنو کۆمیسیۆنو ئەوەکۊڵیای نەتەوە یۆگێرتەکانە وەڵاکریانۆ، ئەرەیاۋییان کە دۆڵەتو تورکی جە سەرنیشتوو ۋەرکۊتوو سوریاینە درێژە بە هرووژمەکاش پەی سەرو ناوچە مەدەنیەکا مڎۆ و ئانەیچ وزیان ڕووە کە ئا هرووژمۍ گنانە خانەو تاوانەو جەنگیۆ.
کۆمسیۆنو ۋنەپەرسایۆ سەر بە نەتەوەیۆگێرتەکا، گوزارشتەی تایبەتەش بە ئاژەو سوریای جە مابەینو ١و کانونی دووەمی تا ٣٠ی حوزەیرانی وەڵاکەرڎۆ. گوزارشتەکۍ ئاراسەو ٥٧ەمین ئەرەنیشتەو ئەنجومەنو مافەکا مرۆڤو نەتەوەیۆگێرتەکا مکریۆ کە جە ٩و ئەیلولیوە دەسشپنەکەرڎەن و تا ٩و تشرینو یوەمی بەردەوام مبۆ. گوزارشتەکۍ سەرو بنەماو ئەوەکۊڵیای مەیدانی و چەمپنەکۊتەی چنی ٣٨٥ کەسا و رێکوزیایا مەدەنی جیاجیای ئاماڎۍ کریێنە و جە ڕاو دیمەنیچۆ بە بەڵگە کریێنە.
جە گوزارشتەکێنە جگە جە ئاژەی سیاسی و ئابوری سوریای، باس جە پاشێلکارییەکا مافەکا مرۆڤی بە مەڵامەتوو پێوەرەدایەکا چا وڵاتەیچەنە کریان. جە گوزارشتەکێنە سەرنج وزیان سەرو هرووژمە ئاسمانییەکا دۆڵەتو تورکی پەی سەرو سەرنیشتی و ۋەرکۊتوو سوریای و جەنگ جە ناوچە ئەرەگیرکریایەکا تەرینە و تاوانەکا دژ بە مرۆڤایەتی.
پاشێلکاری یاسۍ بەردەواما
جە گوزارشتەکێنە باس چانەی کریان کە جە سەرەتاو جەنگیوە جە سوریانە تا ئیساتۍ، گۆرەتەرین قەیرانی مرۆیی ئینا ئارانە جە فرەو هرووژمانە جە ڕاو بە ئامانج گێرتەی حەڵکی مەدەنی و ناوچە ئەرەنیشتەییەکاوە تاوانەو جەنگی ئەنجام مڎریۆ. هەرپاسە ئانەیچ وزیان ڕووە کە فرەو ناوچانە پاشێلکاری پېسە گێرتەی هەڕەمەکی، ئەشکەنجە، بێسەروشۆنکەرڎەی زۆرەملێ، مەردەی وەختو دەسبەسەرینە و هۆرکەندەی زۆرەملێ مەدەنیەکا جە ماواو ۋێشانە بەردەواما.
هەرپاسە جە گوزارشتەکێنە جە بارەو سوریایۆ باس چانەی کریان بە مەڵامەتوو بیەو جەنگو غەززەی، پێوەرەدای و ۋەریۆکۊتەی بەینو هێزەکا جە ناوچەکەنە و ئۆپراسیۆنە سەروازییەکۍ زیاتەتەرۍ بیێنۍ و ئانەیچ وزیان ڕووە کە هرووژمەکۍ داعشی زیاتەرۍ بیێنۍ.
جە هەرێمە ئەرەگیرکریایەکانە تاوانۍ قورسۍ ئەنجام مڎریا
جە گوزارشتەکێنە بە ۋەرفراوانی باس جە پاشێلکەرڎەی مافەکاو مرۆڤی جە لایەنو دەوڵەتو تورکیوە جە هەرێمە ئەرەگیرکریایەکانە کریان و ئانە وزیان ڕووە کە جە هەرێمە ئەرەگیرکریایەکانە دەوڵەتو تورکی ئەشکەنجە، مامەڵەی خراپ و تنوتیژی رەگەزی ئەنجام مڎۆ و بەردەواما چا تاوانا. جە گوزارشتەکێنە باس جە ژمارێوە فرە نمونۍ و شێوازو ئەشکەنجەی قورسی و دژواری کریان.
مگنانە خانەو تاوانەکا جەنگیۆ
جە گوزارشتەکێنە ئەرەیاۋییا کە ۋنەپەرسایۆ جە رووەدایەکا ناوچەکەی هەڵای بەردەواما و باس چانەیچ کریان ژمارێوە فرە چا کەسا کە گیریێنۍ راسەوخۆ جە لایەنو میتیوە ئەوەکۊڵیایشا چنی کریان.
جە گوزارشتەکێنە بە فراوانی باس جە تاوانەکا سوپاو سوریای ئازاڎی و گروپە چەتەکا سەر پا سوپۍ کریان.
دۆڵەتو تورکی هرووژم مکەرۆ سەرو ناوچە مەدەنی نشینەکا
جە گوزارشتەکێنە باس جە هرووژمەکا تورکیای پەی سەرو هەرێمەکاو چێرو کۆنتڕۆڵو ئیدارەو ۋێڕاوەبەری سەرنیشتوو ۋەرکۊتوو سوریای کریان و ئانەیچ وزیان ڕووە کە دۆڵەتو تورکی هرووژم مکەرۆ سەرو مەدەنیەکا و ناوچە مەدەنی نشینەکا. هەرپاسە سەرنج وزیان سەرو هرووژمەکا دۆڵەتو تورکی پەی سەرو کۆبانێ، حەسەکەی و قامیشلۆی.
جە گوزارشتەکێنە ئانەیچ دەسنیشان کریان کە تورکیا مشۆم پابەڼ بۆ جە جابەجێکەرڎةی یاسای مېیاننەتەوەیی و سەرنجش وستەن سەرو هرووژمە ئاسمانییەکا دۆڵەتو تورکی و ئانەیچ وزیان ڕووە کە ئا هرووژمۍ گرڎ ئینۍ چوارچێوەو تاوانەو جەنگینە.
