گوڵستان کلچ کۆچیگیتە ئەرەیاوناش ڕابەر ئاپۆ پەی چارەسەری پرسو کوردی دەرفەتێوە تاریخی پێشکەش مکەرۆ و واتش: "پەنەوازا دەمودەس هەلومەرجو هەرمان کەردەی پەی ئێژا ئۆجالانی ئاماڎە بکریۆ، گۆشەگیری هورگیریۆنە و پەی ئازادیی هەنگامەی دەمودەسیە بنریۆ."
گوڵستان کلچ کوچوگیتە سەرۆکەو فراکسیونو گروپو دەم پارتی، جە پەرلەمانەنە کۆنگرێوە ڕۆنامەوانێش ئەنجامدا و ڕۊژەڤەکێش هورسەنگنۍ .
جە سەرەتاو قسەکاشەنە سەروەشیش ئاراستەو کەسوکارو ٧٨ قوربانیا ئێرکەوتەکەو بۆلووی کەرد.
گوڵستان کلچ کوچوگیتە جە درێژەو قسەکاشەنە سەرنجش وست سەرو گلێرۆبییە ٤سەعاتییەکەو شاندو دەم پارتی چنی ڕابەر ئاپۆی جە ٢٢ی کانوونو دووەمی جە ئیمرالی واتش: "جە دیدارەکەنە ئەنجامو قسەکا چنی لایەنە سیاسییەکا و، ڕەخنە، و لواشۆنیرەو پێشنیارو لایەنە سیاسییەکا، پێشکەشو ئێژا ئۆجالانی کریێنێ. هەرپاسە هورسەنگنای وەرفراوان سەرو گرڏو مژارەکا کریان. مشۆم واچمێنە کە ئێژا ئۆجالان شانسێوەن پەی چارەسەرو پرسەکا، بە هەڵوێس و پێگەو وێش پەی گەلوو تورکیای، گەلا وەرکەوتوو دلێڕاسەی و چارەسەرو دیموکراسیانەو پرسو کوردی دەورێ گرنگ گێڵنۆنە. وێش ئەرەیاونانش مشۆم بە دڵنیاییۆ ئی پرسە چارەسەر کریۆنە."
گوڵستان کلچ کۆچیگیتە جەختش چانەیە کەردۆ کە مشۆم ئی دەرفەتە تاریخیێ بە جدی هورسەنگنایش پەی کریۆنە و واتش: "پەنەوازا وێما جە قسێ بێ کەڵکێ و بەفیڕۆدای کاتی ئی دەرفەتە تاریخییە بەدوور گێرمێنە و بە قسێ چارەسەرییانەی کە هیواو گلێرگەین، تاومێنە بە شێوێوە ئەرێنی ئەنجام هورگێرمێنە. پۆکەی بە وەشکەردەو ژینگێوە سەرکۆتەی مشۆم حکومەت جەخت جە هەنگامە کردارییەکا بکەرۆوە، ئاشکران کە پرۆسەکە تەنها بە ئاما و لوای وەڵێ مەگنۆنە، پۆکەی پەی ئانەی بە خێرایی چوارچێوێوە یاسایی بنیات نریۆنە، مشۆم پەرلەمان دەسوەڵێ وزۆنە و جە بارودۆخو ئیسەینە وەرپرسیارەتی جە ئەستۆ گێرۆنە، هاتا ئێژا ئۆجالان بتاوۆنە دەورو وێش گێڵنۆنە و پەی ئانەی ئی دەرفەتە تاریخیێ جەدەسەنە نەشۆنە، پەنەوازا دەمودەس هەلومەرجو هەرمانەکەردەی ئێژا ئۆجالانی خاستەر کریۆنە، مشۆم گۆشەگیریش هورگێرانە، پەی مسۆگەرکەردەی ئەمنیەتی و، سەلامەتی و ئازادیی هەنگامێ خێرێ نریانە."
گوڵستان کلچ کۆچیگیتە ئاماژەش پانەیە کەرد، جە چوارچێوەو قسەکەردەی شاندەکەینە، ئارۆ دەسەو ڕاوەبەری مییانگەو پارتەکەیشا سەرو ئا پڕۆسەیە گلێرۆبییەیشا ئەنجامدا، نەخشەڕای تازێ وێشا دیاری مکەرا و چا بارۆ قەرار هورگیریۊنە.
