چالاکوو مافەکاو ئینسانوو میسڕی، ئەیمەن نەسڕی ئەرەیاوناش گۆشەگیریی سەروو ڕابەروو گەلوو کوردی عەبدوڵا ئۆجالان ئینا بەروو پیمەروو یاسا میاننەتەوەییەکاوە و واتش: "پێویسا ڕێکوزیا میاننەتەوەییەکێ بەزووی دەس بوزانە دلێ هەرمانەکێ".
پارێزنەراو نویسگەی یاسایی سەدەی پەی ورگێرتەی گۆشەگیریی ڕەهاو سەروو ڕابەروو گەلوو کوردی عەبدوڵا ئۆجالانی و عومەر خەیری کۆناری و حامیلی یەڵدرمی و وەیسی ئاکتاشی ڕاپۆرتێوە تایبەتەشا پێشکەش بە نەتەوە یۆگێرتەکا کەردە.
پارێزنەرێ ڕاو ڕاپۆرتەکێوە ئاماژەشا پانەیە کەردەن دەوڵەتوو تورکی ڕاو چەمپەنەکەوتەیشا قەدەغێ کەردێنە، جەختشا کردکەردەنۆ پێویسا ڕاپۆرتەکێ وەرەچەم بگیریۆ و هەنگامەی بەپەلێ بنریۆ.
سەرۆکو فۆرومو عەرەبی-ئەوروپی پەی دیالۆگ و مافەکاو ئینسانی ژنێڤنە، ئەیمەن نەسڕی پێوەس بە گۆشەگیریی ڕەهاو سەروو ڕابەروو گەلوو کوردی عەبدوڵا ئۆجالانیوە پەی ئاژانسوو هەواڵوو فورات (ANF)ی دوا.
ئەیمەن نەسڕی واتش گۆشەگیری سەروو ڕابەروو گەلوو کوردی عەبدوڵا ئۆجالانی دژوو یاسای و پیمەرە میاننەتەوەییەکان و تورکیا ڕاو دیداری و دەسکەوتەی زانیارییش وستەنرە، واتش: "ئینە یاگێ شەرمەزاریینە. حەرچند ئەشکەنجەی دەروونییچ بۆ، بەڵام زیندانەنە ئەشکەنجە هەن. زیندانییەکێ ڕۆی ڕۆشن نمەوینا و نمەتاوا مافەکاشا بەکار بارانێ. ئینەیچ ئایندەنە کاریگەریی مکەرۆ سەروو ژیوایشا".
نەسڕی داواش وەنەو ڕێکوزیا میاننەتەوەییەکا کەردە، کە وەراوەروو گۆشەگیریی ئیمراڵییوە هەڵوێستشا بۆ و هەنگامە بنیا، واتش: "پێویسا ئەنجوومەنی میاننەتەوەیی مافەکاو ئینسانی و ئۆفیسوو کۆمیسەری باڵاو مافەکاو ئینسانی بەزویی بەیا وەرۆ. چونکوم ڕابەر ئاپۆ کەسایەتیێوی نامیەن، دەور و یاگێوی گەورێ و بەنرخەش دلێ گلێرگەینە هەن".
