رۊو یەکشەممەی ڕۊدیارو ٢٠٢٢/١٠/١٦ی، جە شارو هەڵەبجەی، کۆنیشت پەی ئەشناسایی (کۉبەرهەمو ڕازوانی هۆرامی) ساز کریا کە جە نۋیستەی و ئاماڎەکەردەی مامسا (جەمال بێدار)ین.
جە کۆنیشتەکەنە کە ژمارێوی فرێ جە ۋەرپەرسە حزبیۍٚ و حکومییەکان، هەر پاسە دۆستدارانو زۋانی هۆرامی ئامادۍٚ بیۍٚ، کۉبەرهەمو ڕازوانی هۆرامی قسۍٚ و باسێش سەر کریۍٚ و ئەشناسنیا بە بەشداربییەکان.

کۉبەرهەمو (ڕازوانو هۆرامی) پڕۆژەو ڕێکوزیاو (ژیوای)ین، بە پشتیوانی وەزیرو ڕۆشنویری هەرێمی حەمەو حەمەمسەعید-ی و ڕاوەبەریی گردیی ڕۆشنویری و هونەرو هەڵەبجەی چاپ کریان.
کۆبەرهەمەکە ٦ بەرگێن و تەمامو بەشەکانو ڕازوانی هۆرامی چوون (نامێ، یاگەنامێ، یاوەرنامێ، یاوەرکار، چەمە، کار، ئامرازەکێ، نیشانەو ڕەگەزی) جەوێش مگێرۆنە شێوازو نۋیستەییش بەرئاوردکارییەن میانو ڕازوانو هۆرامی و کرمانجی وارینینە.