دەستەیەک بە سەرۆکایەتیی پەروین بوڵدان هاوسەرۆکی گشتیی هەدەپە لەگەڵ نوێنەرانی ٢٦ وڵاتی ئەندامی یەکێتیی ئەوروپا کۆبوونەوەیەکى ئۆنلاینیان ئەنجامدا. لە کۆبوونەوەکەدا گۆشەگیریی سەر ئیمراڵی ئیدانە کرا.
پەروین بوڵدان هاوسەرۆکی گشتیی هەدەپە، ئەبرو گیونەی وتەبێژی هەدەپە، فەلەکناس ئوجا و هشیار ئۆزسۆی هاووتەبێژانی کۆمیتەى پەیوەندییەکانی دەرەوەى هەدەپە و ئەندامی کۆمیتەکە نازمی گیور، بە میوانداریی نوێنەرایەتیی تورکیا لە یەکێتیی ئەوروپا، کۆبوونەوەیەکی ئۆنلاین-یان لەگەڵ نوێنەرانی ٢٦ وڵاتی ئەندام لە یەکێتیی ئەوروپادا رێکخست.
'گۆشەگیری لەمپەری بەردەم چارەسەرییە'
لە کۆبوونەوەکەدا شیکاری بۆ پەیوەندیی نێوان یەکێتیی ئەوروپا و تورکیا قەیرانەکانی رۆژهەڵاتی دەریای سپیی ناوەڕاست کرا. رۆژەڤی تایبەتیش سیاسەتە نایاسایی و بێمافییەکانی گۆشەگیری بوو لە دژی عەبدوڵا ئۆجالان رێبەری گەلی کورد و راپۆرتی سی پی تی لەو بارەیەوە بوو.
کۆبوونەوەکە بۆ ماوەى کاتژمێرێک بەردەوام بوو و پەروین بوڵدان هاوسەرۆکی گشتیی هەدەپە رایگەیاند، دەبێت یەکێتیی ئەوروپا و وڵاتانی ئەندام لە دژی بەڕێوەبەریی دەسەڵاتپەرەستی تورکیا هەڵوێستێکی روون و ئاشکرایان هەبێت. راشیگەیاند، سەوەریی مافەکان و یاسا و دیموکراسی لە پەیوەندیی نێوان یەکێتیی ئەوروپا و تورکیادا دەبێت دەستنیشان و روون بکرێتەوە.
بوڵدان ئاماژەى بەوەکرد، لە بابەتی چارەسەرکردنی کێشەى کورددا گۆشەگیری رۆڵێکی گرنگ و خراپ دەگێڕێت و باسی لە راپۆرتەکەى سی پی تی لەوباریەوە کرد و راشیگەیاند، دەبێت کۆمەڵگەى نێونەتەوەیی لە دژی سیستمی گۆشەگیری لە ئیمرأڵی و پێشێلکردنی مافەکانی مرۆڤ لە زیندانەکانی تورکیادا بەرپرسیارانە بجوڵێتەوە.
'هەلومەرجە خراپەکان کراون بە دیکۆمێنت'
ئەبرو گیونەى وتەبێژی هەدەپە لەو کۆبوونەوەیەدا ئاماژەى بەوەکرد، بە بڵاوکردنەوەى راپۆرتەکەى سی پی تی لە ئیمراڵی و زیندانەکانی تورکیادا هەلومەرجی خراپەکان بە دیکۆمنێتکران و راشیگەیاند، گۆشەگیری کە بە تایبەتی لەسەر ئۆجالان بەڕێوەدەچێت دەبێت بە خێرایی کۆتایی پێ بێت.
هەروەها لە کۆبوونەوەکەدا داوا لە یەکێتیی ئەوروپا و نوێنەرانی وڵاتانی ئەندام لە یەکێتیی ئەوروپا کرا، کە بۆ بەجێهێنانی داواکانی ناو راپۆرتەکەى سی پی تی، چاودێریی حکومەتی تورکیا بکەن بۆ ئەوەى ئەو داوایانە جێبەجێ بکات.
ژ.ت
