ئێلحنە ١و ئایاری بە کۆبییەیۆینە  پارکنە ٨ و ئادارو ژەنا مەبارەک کریا. فرەو پارت و ڕێکوزیا و سەندیکا و پەرلەمانتار و کەسایەتییەکێ و کرێکارێ بەشدارێ چالاکییەکەی بێنێ. دەیان هەزار کەسێ شارە جیاوازەکاوە ئامێ ئێلح، درووشمەکا پێسەو "نا پەی جەنگی، ئاشتیما گەرەکا" و پاگێرتەیرەی سەرو سۆسیالیزمی، پاگێرتەیرەین سەرو ئینسانیەتی" و "زوانما شکۆ و بییەیمانە" و "ژەنی، ژیوای، ئازادی" و "بژیوۆ ١و ئایاری" بەرزێ کریێوە.

بە نامێ کۆمیتەو ئامادەکاریی کۆبییەیۆکەیوە، فەیسەڵ کارتال، تیشکەش وستە سەرو خراپیی دۆخو  خانەنیشا، واتش مشۆم سیستمو باجی بە شێوێوی دادپەروەرانە ڕێک بوزیۆ و واتش: "پەی ئازادی و ئاشتی و دیموکراسی، ئیتر ماچمێ وەسێن ئی ڕەوشە".

دمایی سکرتێرو کۆنفیدراسیۆنو سەندیکاو کرێکارە جەماوەرییەکا (کەسک) دۆنە جەوهەر، ١و ئایاریش مەبارەک کەرد و واتش ئیتر ماچمێنە نا پەی سیستمی خراپو سەرمایەی، واتش: "ئێمە هومێدێوەنمێ پەی پێوەژیوای ئازادیی گەلا، پێویسا درێژە بە کۆشیای هامبەشی بدەیمێ و ڕێکوستەیما قەوەتتەر بکەرمێن".

هامسەرۆکو دەم پارتیی شارەکەی، موستەفا مەسعود تەکیک واتش سەبەبو هەژاریی وەڵاتەکەی، جەنگی ٤٠ ساڵەن.

هامسەرۆکەی گردینەو دەبەپەی، چیدەم کلیچگون ئوچارە واتش کۆشیای کرێکارا و زەحمەتکێشا پەی یەکسانیین، تورکیانە قەیرانێ و ئاورایی فرێنێ، سەبەبیهەقەتینیچ دەسەڵاتو ئاکەپە و مەهەپەین، واتش: "سامانو وەڵاتی پەی جەنگی خەرج مکریۆ، ئی جەنگە، جەنگو کرێکارا و زەحمەتکێشا نییا. هۆکارو ئی قەیرانەیە، سیاسەتو جەنگی و چارەسەرنەکەردەی پەرسەو کوردینە. نمەتاوانێ ڕاسیی کوردی بە جەنگ بفاڕا. ملوێنان کوردێ ماچانێ ڕابەرو گەلو کوردی عەبدوڵا ئۆجالان ئیرادەشانە پەی چارەسەرو پەرسەو کوردی. ئادێچێ مزانانێ جە چارەسەری دیموکراتیکنە، دەورو بەڕێز ئۆجالانی چند گرنگا. جیای چارەسەری، ڕووە کەرانێ گۆشەگیری. ئەگەر کۆشیایما کەرمێوە یۆ، متاومێ ئی وەڵاتەیە بکەرمێنە وەڵاتو ڕەنجی و ئازادیی".

دمایی بە گۆرانیێ کوردی و ورپڕای، کۆبییەیۆکە دماییش ئاما.