وتەبێژی دەم پارتی ئایشەگوڵ دۆغان دەربارەی ئەنجامی کۆبوونەوەی مەجلیسی پارتەکە و لیژنەی بەڕێوەبردنی ناوەندنی لە ناوەندی گشتی دەم پارتی، کۆنگرەیەکی ڕۆژنامەوانی بەست، سەرەتا ١٢٦ هەمین ساڵیادی ڕۆژنامەگەریی کوردی پیرۆزکرد و گوتی: "سەرەڕای قوربانیدانەکان، ڕێگەی حەقیقەت بەردەوامە".

دۆغان ڕایگەیاند پارتەکەیان کۆبوونەوەکەدا نەخشەڕێگای خۆی دیاریکردووە، دووپاتی کردەوە بە هەوڵ و کۆششی هەمەلایەنە دەم پارتی لە هەڵبژاردنی ٣١ ی ئادار سەرکەوت و بووە هیوا بۆ وڵاتێکی دیموکراتیک و ئازادی و شکۆدار.

هەروەها ئاماژەی بەوە کرد هەڵبژاردن لە هەلومەرجێکی یەکسان بەڕێوەنەچوو، هێزەکانی دەسەڵات هەموو دەرفەتەکانی دەوڵەتیان دژی دەم پارتی خستەگەڕ، تەنانەت خودی سەرۆککۆماری وڵاتەکە تەیب ئەردۆگان لە کەمپینی هەڵبژاردن بەشداریکرد و گوتی: "ئەوەی دەنگ نەدات، خزمەت ناکرێت"، سەرباز و پۆلیس بۆ ساختەکاری هێنرانە کوردستان، بەڵام گەل بە دەسەڵاتی گوت ئیتر بەسە و دژی ڕژێمی قەیوم وەستانەوە.

جەختی لەوە کردەوە، دەم پارتی، پارتی کوردان و گەنجان و ژنان و بندەستانە بۆیە لەگەڵ سەرکەوتنی دەم پارتی، هیوا و ئایندە سەرکەوتن، گوتی: "پێویستە پارتە باڵادەستەکان هەنگاوی نوێ بنێن، بۆ چارەسەری ئاشتیانە و دیموکراسیانەی پری کورد دەبێت هەنگاوی ڕوون و چارەسەرساز بنرێن. دەبێت وەک ئۆپۆزیسیۆن و دەسەڵات، بەم جۆرە نرخاندن بکەین".

دۆغان تیشکی خستەسەر ئەنجامدانی ڕێپێوانی ئازادی و جەژنی نەورۆز لەکاتی هەڵبژانەکاندا، گوتی: "دەنگدەرانی دەم پارتی دژی شەڕ و سیاسەتی نکۆڵی چوونە سەر سندووقەکان، داوای سیاسەتی دیموکراتیکیان کرد. گوتیان نا بۆ ئۆپەراسیۆن. گوتیان نا بۆ گۆشەگیری سەر بەڕێز ئۆجالان".

هەروەها دووپاتی کردەوە لە کۆبوونەوەکدا نەخشەڕێگای پارتەکەیان تاوتوێ کردووە و سیاسەتی هێڵی سێیەمیان وەک نەخشەڕێگا قبووڵ کردووە و بۆ کۆکردنەوەی هەمووان لەسەر ئەم هێڵی سیاسەتە بەردەوام دەبن، لە هەڵبژاردنەکانیش هەر ئەم هێڵە سەرکەوت.