بنەیانەو زیندانییە گیریایاو ئیمرالی کە زیاتەر جە ٣٧ مانگان گۆشەگیرێ کریێنێ، پێسەو گرد حەفتێوی، ئی حەفتەیچە داواو دیداریشا کەرد.  

محەمەد ئۆجالان، براو عەبدوڵا ئۆجالانی و پارێزنەر مەزڵوم دینچ، داواو دیداریشا پێشکەش بە داواکاری گردینو بورسای و ڕاوبەرایەتیی زیندانو ئیمرالی کەرد.

عەلی کۆنار براو عومەر خەیری کۆناری و پۆلات یڵدرم براو حامیلی یڵدرمی و مەلیحە چەتینە واڵێ وەیسی ئاکتاشی، کە زیندانوو ئیمرالیینە گۆشەگیرێ کریێنێ، بە هەمان مەبەست داواو دیداریشا کەردە.

پەیوەندییەکاو ڕابەرو گەلو کوردی عەبدوڵا ئۆجالانی  چەنی جیهانو بەری بە تەمام پڕچیان. داواو دیدارەکا جوابێ نمەدریاوە، بڕێو جارێ دماو چند مانگێوی پارێزنەەرێ هاگادارێ مکریاوە، کە سزاو دیسپلینیشا ملەرە سەپیێنە.