دەوڵەتوو تورکی و پەدەکە گرڎ ڕووۍ پشێوی و ئاژاوێوە تازۍ منیاوە. ئیساتێچ پەی دما وستەی هۊرچنیەکا جە پانیشتەنە، پەدەکە بڕۍ هێزێش فاڕێنۍ پەی ئا مەنتیقا کە جەنگشا چنەن پەی ئانەی بڎۊشا کوشتەی و بە واتەی ئانەی کە "ئێمە ئینایمۍ جەنگەنە" هۊرچنیەکەی دما وزۆ.
جە قۆناغێوەنە کە یەرەگۊشەو ئەنقەرە، بەغڎای و هەولێری چنڎین مانگېن ئاماڎەکاری پەی جەنگێوە تازەی دژوو جمیەروو ئازاڎیی کوردسانی مکریۆ، ئاماژە سەرەتاییەکۍ ئۆپراسیۆنوو ئەرەگیری جە هەرێموو مەتینای سەر بە هەرێمەکاو پارێزنای مەدیاینە بەرکۊتەن. پەی ئانەی ئۆپراسیۆنەکە هەنگام بە هەنگام بلۆڕاوە، جموجوڵی سەروازی جە تەرەفوو دەوڵەتوو تورکی و پەدەکەیۆ چا هەرێمەنە ئەنجام مڎریۆ.
مەتینا شەوەی ۋییەردێوە ئینا چێروو هجوومی دژوارینە
پەی ئانەی ناڕەزایەیی دلۍ رای گرڎینە وەش نەبۆ، سەبارەڎ بە پەرە ئەسایەکا ئۆپراسیۆنەکاوە زانیاری وەڵا مەکریۆوە. ئەرەیاۋییا کە سوپاو تورکی جە شەوەی ۋییەردێوە هەرێموو مەتیناینە هجوومی دژوارش دەسپنەکەردەن. حەرپاسە ئانەیچ وزیان ڕووە کە پەی ئانەی پەدەکە جە ئۆپراسیۆنەکەنە چالاکانەتەر دەور گێڵنۆنە بڕۍ ئاماڎەکاری کریان.
سیناریۆیۍ تازەو جەنگی
جە چوارچێوەو ئا ئۆپراسیۆنانەی کە ئاماڎەکارییەکێش فرەو هەرێمانە ئەنجام مڎریا، ئەرەیاۋییان کە بە سەرمەشقی پەدەکەی حۊڵ مڎریۆ پلانەی تازۍ وزیۆنەگەڕ. حەرپاسە ئا زانیاریۍ ئاماژە پانەیچ مکەرا کە سوپاو تورکی جە ڕووانی ئایندەنە بڕۍ هێزۍ سەر بە پەدەکەی وزۆنە وەڵۍ ۋێش و بەرەو شۊنەکا هەپەگەی جە مەتینانە ئاراسەشا بکەرۆ.
"پێشمەرگەکا بە کوشتەی مڎۆ"
ئەرەیاۋییا کە هجوومەکە پی جۆرە ڕێکوزیۆ و دماتەریچ وەختۍ هەپەگە ۋەرپەرچوو ئا هجوومەیە بڎۆوە، ئا هێزەی گورزەش وەرگنۆ پېسە 'پێشمەرگە'ی نیشانە مڎریۆ. ئەرەیاۋییا کە ئاماڎەسازی پەی پشێویێوە پا جۆریە کریان. ئامانجی سەرەکی ئانەیچ بریتیا چانەی پەدەکە گەرەکشا ئا قۊرتۍ کە تووشش ئامېنۍ، بە جەنگ پەردەپۆششا بکەرۆ.
پەی دماوستەی هۊرچنیەکا
ئانەیچ وزیان ڕووە، کە ئەگەر پیلانەکۍ سەرەگنۆ نێچیرڤان بارزانی مێنە ۋەروودەم و کامێرەی و ماچۆ، "ئێمە ئینایمۍ ئاژەو جەنگینە. هۊرچنیەی چی هەلومەرجەنە ئەنجام مەڎریۆ. ئێمە بە مەڵامەتوو ئی ئاژە نائاساییەیۆ هۊرچنیەی دما وزمۍ".
زانیا کە پەدەکە قورسایی ۋێش وستەن سەروو ئا پلانۍ، پەی ئانەی مەڵامەت و پاڵنەرەکاو جەنگی خوڵقنۆ دەسووبردش کەردەن جە ئەنجامدای ئا ئاژاوەگێڵنیەینە. جە هەمان وەختەنە دەوڵەتوو تورکی پەی ئانەی ئی پلانۍ وزۊنە بواروو پڕاکتیکیۆ گرڎوو هێزەکاو ۋێش وستێنۍ حاڵەتوو ئاماڎەیۆ.
هیج بەرێوە نەمەن نەڎۊش ۋنە، دمایین حەل..
جە لېوەتەرۆ پەدەکە؛ پەی ئانەی جە پانیشتوو کوردسانی جە قەیرانەو ئابووری رزگارش بۆ، بەرە نەمەنەن نەڎۆش ۋنە. پەدەکە کە جە گفتووگۆکاشەنە چنی ئەمریکای، حکومەتەکەو سودانی، هێزە شیعەکا عێراقی و چی دماییەیچەنە چنی ئێرانی ئەنجامش بەدەسناردەن، پلانەو ئانەیش هەنە بە گێچەڵێوە پی جۆرە جە پانیشتوو کوردسانینە ئاژێوە نائاسایی خوڵقنۊنە و پەی دما وستەو هۊرچنیەی ڕێوە جیاواز بارۆنە ئاراوە. پەدەکە ئاماڎەکاری مکەرۆ پەی ڕزگارکەردەو دەسەڵاتەکەیش پێشمەرگەکا بە کوشتەی بڎۆ. ئەگەر ئا پلانۍ سەر گێرۆ، پەدەکە و دەوڵەتوو تورکی ئیسفاڎەش ۋنەمکەرا.
