جمیەرو ئازادی ژەنا ئێزدی (تاژێ) و ڕاوەبەری خۆسەری دیموکراتیکی شەنگالی جە ٢١و تشرینو یووەم و ٢٠٢٣ بە دروشمەو "ئازادی پەی ڕابەر ئاپۆی، ڕاوەبەری پەی شەنگالی" بەشداری هەڵمەتەو"ئازادی پەی عەبدوڵا ئۆجالانی، چارەسەری سیاسی پەی پەرسو کوردی" بیەن کە جە ١٠و تشرینی یووەم و ٢٠٢٣ جە ئاستی میان نەتەوەینە دەسش پەنەکەردەن و بە گردوو هێزو وێشۆ تا ئارۆ بە چالاکی، ڕاپیمای و گلێربییەیۆو، سیمینار و و وانایۆ پارێزنامەکا بەردەوامیش هەن.

چوارچێوەو ئی هەڵمەتێنە، تاژێ و ڕاوەبەری خۆسەری شەنگالی بە دروشمەو "سەرۆک مێمانو یانەو شمەن"هەڵمەتێوەش دەس پەنە کەرد. جە چوارچێوەو ئی چالاکیەینە یۆ بە یۆ سەردای و بنەیانەکا کریۆ، ڕسمێو و نامیلکێ ژیوای ڕابەرو گەلو کوردی عەبدوڵڵا ئۆجالانی و پارادایمەکا تاوتوێ مکەرا.

ئارۆ ئەنجوومەنو ژەنە عەرەبا دەگایەکا شەنگالیچ جە هەمان چوارچێوەنە بەشدارێ هەڵمەتەکێ بیێ و ئەرەیاوناشا: "ئێمە بە گردو هێزیماوە پاڵپەشتی ژەنا ئێزدی کەرمی."

بەیاننامەکە، کە جەلایانو فاتمە ئیبراهیمۍ ئەندامەو ئەنجوومەنیۆ ونریاوە پی جۊرەنە:

"ئێمە پێسەو ئەنجوومەنوو ژەنە عەرەبا شەنگالی پاڵپەشتی وێما پەی گرد ژەنە ئێزدیا ئەرەیاونمی و واچمی گرد بوارەکانە ئینایمی چەنیتا، هەرپاسە چەنی ژەنە ئێزدیێ بیێنی هێزێوە جە گلێرگەنە، ئێمەیچ هێزشا چنە هورگێرمی."

گرد لایێ زانمی جە ساڵەو ٢٠١٤ینە چێش  سەرو گلێرگەو ئێزدیرە ئاما، بەتایبەتی ژەنا ئێزدی، جە بڕفانای کوشتەی، کۆمکوژی و دەسدرێژیی گێرتەی تا گرد چێوێ، بەڵام ئارۆ وینمی ژەنا ئێزدی سەرەڕاو ئانەی گرد جۆرە ئەشکەنجێوە و کارەساتۍ سەرشارە ئاما، ئیسە گلێرگەکەی ڕاوە بەرا و مدرامان مکەرا. چێکۆ سڵام جە هێز و ورەی بەرزیشا کەرمی و واچمێ با دنیا ئی هێزەیە وینۆنەو بشناسۆش. ئێمە جارێوە تەر داوا جە گرد ڕێکوزیایەکا، دەوڵەتی و یاگە پەیوەندیدارەکا کەرمۍ کە ئانەی سەرو ئێزدییەکارە ئامان پێسەو کۆمکوژیی بشناسدێش."

بە دروشمەو"بژیۋۆ سەرۆک ئاپۆ"، "بژیۋۆ ژەنەی ئازادە" و "بژیۋۆ مدرامانو شەنگال" ی بەیاننامەکە کۆتاییش ئاما.